2 Tɛsalonika 1

Nchaʼtə

1 Nɔ nyɔ̀ʼ Bɔɔ, Sabanu*1:1 Nɔ bɛ ibɛʼ-yə yie-wo ndə bə kə́ tíi ɔ nə Sala. leʼnə Timɔti nyɔ̀ʼ ŋwɔʼnə-ɔ̄ŋ.

Baʼa nɔ tʉʼ nyɔ̀ʼ tʉ bʉə-chɔshi mu Tɛsalonika ndə bɔ̂ŋ bɛ tʉ Nyii mbʉ Tie-yʉʼʉ leʼnə Jiso Klai Tiekətʉ.

2 Tə buuŋjyu ghɔŋbə fyiighʉ́ənə Nyii mbʉ Tie-yʉʼʉ ghɔŋbə Jiso Klai Tiekətʉ bɛ tʉ bii.

Məkwèʼhə bʉə ndʉʉ ndə bə tʉʼ chɔ́ŋhə bɔŋ

3 Bəliŋ-baʼa, baʼa nɔ kie ndə mə-kə́-kɔ́ ndɔ tʉ Nyii yie-bii təvɛʼtəvɛʼ. I nɔ kʉ̀ʼnə ndə məchìi nɔ bʉʼka məmɔʼfyiihə-ii ndəŋ Nyii nɔ tʉʼ kʉ̀ʼ gɛ̀ nə shʉbə leʼnə ŋkʉ̂ʉ ndə bii kie tʉ ŋwɔŋtə-ii bɔŋ-kə́-leʼ kóʼ ghɔ yɔ́ŋyɔ́ŋ. 4 Nɔ bɛ yɔŋ ndə baʼa tʉʼ kwɛ̀ŋ fyiihə-aʼ bʉʼka bii mu-bəchɔshi-Nyii-hə. Baʼa nɔ tʉʼ kwɛ̀ŋ fyiihə-aʼ bʉʼka məlyʉ̀ʉtə́nə ndə bii lyʉ̀ʉtə́nə bɔŋleʼ mɔ̀ʼfyiihə-ii ndəŋ Nyii mu məchɔ́ŋhə ndə bə tʉʼ chɔ́ŋhə bii leʼnə ŋgʉəʼ ndə bii tʉʼ tíŋ hə muŋgɔ.

5 Nchəŋnchəŋ bənu-ɔ̄ŋ nɔ tʉʼ dʉ̀ʼ mbɔ Nyii nɔ tʉʼ kwɛ̀ sɔ́ʼ-ɛ ndyʉndyʉ, mbɔ Nyii chʉʼ yi nyíɛ bii, bii kʉ̀ʼnə ndə məŋíi mu sɔ́ʼ-ɛ ndə bii tʉʼ nyíɛ ŋgʉəʼ bʉʼka yɔŋ. 6 Nyii bu chìi nukə ndə i bɛ kʉ̀ʼnə. Ɔ bu kɔ́ ŋgʉəʼ tʉ bʉə ndə bɔ̂ŋ tʉʼ chìi bii kə́ nyíɛ ŋgʉəʼ. 7 Ɔ bu chìi fʉʉkə tɔ́ liɛŋ-bii ndə bii tʉʼ nyíɛ ŋgʉəʼ leʼnə mbəŋ-yaʼ ghɔ. Ɔ bu chìi yɔ̄ŋ-yə ndʉʉ ndə bə bu kɛ̀ʼ Jiso Tiekətʉ hə yuo ghɔŋbə bʉəntəŋ-bi ndə bɔ̂ŋ shʉ́ə daa, 8 nə viʼi kwíinə, ndə mətyú ŋgʉəʼ tʉ bʉə ndə bɔ̂ŋ tɛ́ŋ Nyii təmə kə́ fɔ̀ʼ nukə ndə ntəŋjyujyu te Jiso Tiekətʉ-yʉʼʉ ghɔ̀ŋ fɛ. 9 Bɔ̂ŋ bu nyíɛ ŋgʉəʼ təmə liʼ-i ghɔ fɛ, bə wɔ̀ʼtə bɔŋ mbʉə Tiekətʉ gɛ̀gɛ̀ ghɔŋbə məgʉ́ə kəghʉəʼ-ɛ. 10 Ndʉʉ ndə ɔ bu nə gwè, yɔ̂ŋ-ghɔ̄, ɔ bu fí məgʉ́ə mu bʉə-bi bənchəŋ i bɔŋ-bu-leʼ chíe chu bʉə-bi bənchəŋ ndə bɔ̂ŋ bɛ́ŋ ɔŋ. Bii bu yi bɛ nuɔ bɔŋ ghɔ bʉʼka bii nɔ kə bɛ́ŋ nubə ndə baʼa kə gìe tʉ bii te ɔ.

11 Nɔ bɛ luu-i le ndə baʼa tʉʼ gháaNyii tʉ bii təvɛʼtəvɛʼ. Baʼa kə́ gháaNyii mbɔ ɔ chìi bii kʉ̀ʼnə ndə ntɛ məchímbi ndə ɔ nɔʼ tíi bii chɔ. Tə ɔ kɔ́ ghʉəʼkə tʉ bii ndə məfɔ̀ʼ nu-jyujyu-bə inchəŋ ndə məmɔʼfyiihə-ii ndəŋ ɔŋ kʉ̀ʉ mbɔ bii fɔ̀ʼ. 12 Yɔ̄ŋ-yə nɔ bɛ mbɔ yie-Jiso Tiekətʉ-yʉʼʉ chʉʼ kie məgʉ́ə mu məchimbi-bii, ɔ bɔŋleʼ kɔ́ kuŋhə tʉ bii, tíŋ hə bɔ̌ŋ buuŋjyu Nyii-yʉʼʉ leʼnə mbʉ Jiso Klai Tiekətʉ.