1 Bəliŋ-baʼa, mɔ kie ndə mə-kə́-nyɔ̀ʼ tʉ bii te ŋgwɔʼmbi ghɔŋbə ndʉʉ ndə nubə-ɔ̄ŋ bu fyú chɔ sê fɛ. 2 Bʉʼka bii bənchəŋ nɔ kínə jyujyu mbɔ chî-Tiekətʉ-kə bu bɔ̀ʼtə gwè nə lʉʼ ndə ɔ gwè bətyuʼ. 3 Ndʉʉ ndə bʉə bu dùʼ kə́ ghɔ̀ŋ mbɔ, "Yəŋbə inchəŋ nɔ bɛ iyùtə bɔŋleʼ kə́ bɛ jyujyu," ndʉʉmɛ, bɔ̂ŋ bu kwɔnə nyíɛ ŋgʉəʼ shʉ́əshʉ́ə bìatə bɔŋ ndə yɔʼ-Nyii-kə byùu woke le, təmə wo bɔŋ kʉʉ nyʉ́ʉ fɛ.

4 Bəliŋ-baʼa, təmə bii bɔŋ kə́ bɛ mu kənjəŋ ndə yɔ̂ŋ-ghɔ̄ bu yi bɔ̀ʼtə bii nə lʉʼ fɛ. 5 Bii bənchəŋ bɔŋ kə́ bɛ bʉə ndə bii kie kɛʼɛ, kə́ bɛ mu mbi súunə. Bʉʼʉ kaa bʉə ndə bɔ̂ŋ bɛ ndʉʉbətyuʼ byuunɔ kə́ tə́nə mu kənjəŋ fɛ. 6 Nɔ, kə bʉʼʉ mə-kə́-bɛ́ŋ nə bəbɛʼbʉə fɛ, b̈ʉʼʉ bɔŋ gòʼ nə shʉtə-ʉʼʉ ighʉ́ʉnə bɔŋleʼ kə́ yá ŋwɔŋ-yʉʼʉ. 7 Bʉʼka b̃ʉə ndə bɔ̂ŋ tʉʼ bɛ́ŋbɛ́ŋ nɔ bɛ́ŋ ndʉʉbətyuʼ, bʉə búu məndʉʼ kə́ búu ndʉʉbətyuʼ. 8 Bɔŋ ndə bʉʼʉ bɛ bʉə ndə bʉʼʉ bɛ mu mbi súunə, b̈ʉʼʉ yá ŋwɔŋ-yʉʼʉ, mɔ̀ʼ fɔ-chɔ̂-bə mbʉə bʉʼʉ ndə məkyʉ̀hə fyiihə-ʉʼʉ ndə bɛ məmɔʼfyiihə-ʉʼʉ ndəŋ Nyii ghɔŋbə ŋkʉ̂ʉ, ghʉʉkə ndə bʉʼʉ tʉʼ kyʉ̀hə tʉkə-ʉʼʉ nə yɔŋ kə́ bɛ məyʉ́əʼnə-yʉʼʉ ndəŋ ŋkwaa ndə i gwè hə kəghɔ-Nyii. 9 Bʉʼka Nyii chʉʼ kə kɔ́ŋ bʉʼʉ mbɔ bʉʼʉ bu nyíɛ ŋgʉəʼ ndə tʉʉbʉə-e fɛ, bɔŋ mbɔ bʉʼʉ bu kie ŋkwaa-ɛ tíŋ hə bɔ̌ŋ Jiso Klai Tiekətʉ-yʉʼʉ, 10 ndə ɔ kə kwú yie-bʉʼʉ mbɔ kə bʉʼʉ bu bíe mbi byuunɔ kə bʉʼʉ bu nɔʼ kwú loo..., bʉʼʉ bɔŋ bu bɛ mɔʼɔ. 11 Nɔ, b̈ii kə́ kwèʼhə ŋwɔŋtə-ii bɔŋleʼ bɔ́ ŋwɔŋtə-ii haʼ ndə bii tʉʼ fɔ̀ʼ nɔ.

12 Baʼa nɔ tʉʼ fʉ̀ʉtə bii, bəliŋ-baʼa, mbɔ b̈ii kɔ́ yʉʼ kuŋhə tʉ bʉə ndə bɔ̂ŋ tʉʼ fɔ̀ʼ mu bii, bʉə ndə bɔ̂ŋ bɛ bəntəŋbəshʉ-bii bɔŋleʼ kə́ tʉ́ʼ bii ndəŋ fia-Tiekətʉ. 13 B̈ii kɛŋ dʉ̀ʼ ŋkʉ̂ʉ tʉ bɔŋ shʉ́əshʉ́ə bʉʼka fɔʼɔ-yʉə mu bii. B̈ii kie fyiighʉ́ənə mu bii.

14 Bəliŋ-baʼa, baʼa nɔ tʉʼ kwèʼhə bii mbɔ b̈ii shyùutə tyunə-bʉə-nduunə-bə, kwèʼhə bʉə kəfaa kwú, kwáa bʉə ndə bɔ̂ŋ mə kwáa bʉə ndə bɔ̂ŋ lʉ́ʉtə bɔŋleʼ kə́ yá fyiihə-ii ndəŋ bɔŋ bənchəŋ.

15 B̈ii láa mbɔ wo mə tyú bʉ̂ʼʉ tʉ wo nə bʉ̂ʼʉ fɛ, bɔŋ b̈ii kə́ kɔ̀ɔtə ndə mə-kə́-fɔ̀ʼ bʉʉ tʉ ŋwɔŋtə-ii bɔŋleʼ fɔ̀ʼ tʉ bʉə bənchəŋ.

16 T̈ʉʉtə-ii kə́ bʉ̀ʉ təvɛʼtəvɛʼ. 17 B̈ii kə́ gháaNyii təvɛʼtəvɛʼ. 18 B̈ii kə́ kɔ́ ndɔ tʉ Nyii ndə nukə təmiyɔŋ ndə i fyú tʉ bii, bʉʼka nɔ bɛ nukə nɔ ndə Nyii kʉ̀ʉ mbɔ b̈ii kə́ fɔ̀ʼ ndə bii nɔʼ tùo biibə Klai Jiso.

19 Kə bii mə lʉ́əŋhə LyʉʉhəNyiikə mu mbʉə-bii ndə wo lʉ́əŋhə viʼi le fɛ. 20 Kə bii mə jɛ́ŋhə ntəŋ ndə LyʉʉhəNyiikə kɛ̀ʼ tʉ wo fɛ. 21 B̈ii bɔŋ yúotə nubə inchəŋ, yá nu-jyujyu-kə tə́nə chɔ shʉ́əshʉ́ə. 22 B̈ii shùʼ wukə-ii ndəŋ ntɛ-bʉ̂ʼʉ-hə inchəŋ.

23 Nduɔ, N̈yii, ndə ɔ̃ kɔ́ bʉʼʉ nə fyiighʉ́ənə, sʉ̀ bii nə mbəŋ-ɛŋ b̈ii tʉ́ʉnə gɛ̀ kùu, bɔŋleʼ tʉ́ʼ mbʉəhə-ii nchəŋnchəŋ-ɛŋ, bəyihə, lyʉʉhəkə leʼnə ŋkwê-mbʉə-yii təmə kwɔtəkə chɔ fɛ ndəŋ chîkə ndə Jiso Klai Tiekətʉ-yʉʼʉ bu bʉ̀nə gwè chɔ. 24 Mbəŋ-ɛŋ ndə ɔ tíi bii nɔ bɛ wo gìe shʉəŋ, ɔ bu fɔ̀ʼ haʼ ndə ɔ kə ghɔŋ.

25 Bəliŋ-baʼa, b̈ii gháaNyii tʉ baʼa ghɔ.

26 B̈ii gìe tʉ bʉə bəchəŋ ndə bɔ̂ŋ nɔʼ bɛ́ŋ Nyii nə nchaʼtə ndə i bɛ ŋkʉʉ.

27 Mɔ nɔ tʉʼ kàhə bii yie-Tiekətʉ mbɔ b̈ə tíi ŋwɔʼnə-ɔ̄ŋ tʉ bʉə bənchəŋ ndə bɔ̂ŋ nɔʼ bɛ́ŋ Nyii.

28 Tə Jiso Klai Tiekətʉ-yʉʼʉ dʉ̀ʼ buuŋjyu-i tʉ bii.