1 Nɔ nyɔ̀ʼ Bɔɔ, Sabanu* leʼnə Timɔti nyɔ̀ʼ ŋwɔʼnə-ɔ̄ŋ.

Baʼa nɔ tʉʼ nyɔ̀ʼ tʉ bʉə-chɔshi mu Tɛsalonika ndə bɔ̂ŋ bɛ tʉ Nyii mbʉ Tie-yʉʼʉ ghɔŋbə Tiekətʉ-yʉʼʉ Jiso Klai.

Tə buuŋjyu-Nyii ghɔŋbə fyiighʉ́ənə bɛ tʉ bii.

2 B̃aʼa nɔ chʉʼ kɔ́ ndɔ tʉ Nyii yie-bii bənchəŋ bɔŋleʼ kwɛ́nə bii təvɛʼtəvɛʼ ndʉʉ ndə baʼa tʉʼ gháaNyii. 3 Baʼa kə́ kwɛ́nə bii bəshʉ-Nyii mbʉ Tie-yʉʼʉ, te ntɛ-fɔʼɔ-yii ndə i gwè hə ndəŋ məmɔʼfyiihə-ii ndəŋ Nyii, ntɛ-fɔʼɔ ndə bii kə fɔ̀ʼ tʉ bəbɛʼbʉə bʉʼka ŋkʉ̂ʉ ndə bii kie tʉ bɔŋ leʼnə ntɛ ndə bii kə lyʉ̀ʉtə́nə ndə məyʉ́əʼnə ndəŋ Jiso Klai Tiekətʉ-yʉʼʉ.

4 Bʉʼka baʼa nɔ kínə mbɔ, bəliŋ-baʼa, ndə Nyii kʉ̀ʉ, mbɔ ɔ nɔʼ séʼ bii ndə məbɛ yi-yə bʉə. 5 Bʉʼka baʼa nɔ kə gwè nə ntəŋjyujyu tʉ bii təmə bɛ bə haʼ nə ŋgie-chu-kə fɛ i bɔŋ nɔ kə leʼ bɛ nə ghʉəʼkə ghɔŋbə LyʉʉhəNyiikə baʼa bɔŋleʼ kə kínə shʉəŋ-ɛŋ gɛ̀ kùu. Bii nɔ kínə ntɛ-bʉə ndə baʼa kə dʉ̀ʼ tʉ bii ndə məbɛ yɔŋ ndʉʉ ndə bʉʼʉ kə bɛ mɔʼɔ, i nɔ nə bɛ ndə bʉʉ-yii. 6 Bii nɔ nə lʉ̀ hə kəwu-baʼabə Tiekətʉ. Buŋ ndə bii kə nyíɛ ŋgʉəʼ daa ndʉʉ ndə mbʉ kəŋgie kə gwè tʉ bii, bii nɔ kə fí nə tʉʉjyu ndə LyʉʉhəNyiikə kɔ́ tʉ bii. 7 Nɔ, bii nɔ bɛ fʉʼkənu tʉ bʉə ndə bɔ̂ŋ nɔʼ bɛ́ŋ Nyii bənchəŋ mu Masɛdonia leʼnə Akia. 8 Bʉʼka ntəŋ Tiekətʉ ndə i kə gwè hə kəghɔ-bii kə bʉ́ʼ haʼ kətyunə bʉə-Masɛdonia ghɔŋbə Akia fɛ, bɔŋ bəsɔʼka te məmɔʼfyiihə-ii ndəŋ Nyii nɔʼ kə wɔ̀ʼnə gɛ̀ ndə yəŋbə inchəŋ. Nɔ, i nɔ kə chìi təmə baʼa leʼ kie nubɛʼkə ndə məgìe tʉ bʉə te bii fɛ. 9 Bʉʼka bɔ̂ŋ bənchəŋ nɔ tʉʼ kwə́ʼ te ntɛ ndə bii kə fí baʼa ndə ndʉʉ ndə baʼa kə gwè tʉ bii, leʼnə ntɛ ndə bii kə shìe liɛŋtə-ii ndəŋ bənyii, kíahə ŋwɔŋ-yii tʉ Nyii ndə mə-kə́-fɔ̀ʼ tʉ Nyii-shʉəŋ ndə ɔ bɛ ŋɛnə. 10 Bɔŋleʼ kə́ chyìi Vaa-ɛ ndə məgwè hə yuo, ndə ɔ kə bʉ̀nə kóʼhə ɔŋ ndʉʉ ndə ɔ kə kwú, Jiso ndə ɔ chʉ̀ʼ tʉkə-ʉʼʉ ndəŋ tʉʉbʉə shʉ́əshʉ́ə Nyii ndə i tʉʼ gwè.