1 Kə̂lìʼ, ndʉʉ ndə baʼa kə mə-leʼ-bìʼ yá fyii-yaʼ gɛ̀ nə shʉbə fɛ, baʼa kwɔ̀ʼtə mbɔ nɔ bʉ̀ʉ baʼa káa Atɛŋ tətɛʼ baʼa chìi chɔ, 2 tə́ŋ Timɔti liŋ-yaʼ mu njaa-Nyii, ndə baʼa bɔŋ tʉʼ fɔ̀ʼ tʉ Nyii mɔʼɔ ndə məlɔ̀ʼ ntəŋjyujyu te Klai, mbɔ ɔ yá bii tʉ́ʼ bɔŋleʼ kwèʼhə bii ndə məmɔʼfyiihə-ii ndə bii mɔ̀ʼ ndəŋ Nyii. 3 Baʼa nɔ kə chìi mbɔ wo hə mu bii mə yi gwù bʉʼka məchɔ́ŋhə ndə bə tʉʼ chɔ́ŋhə bii fɛ. Bʉʼka bii nə mbəŋ-yii nɔ kínə ntɛ-ŋgʉəʼ-maa-ɔ̄ŋ, nɔ bɛ ntɛ-kənu ndə Nyii kʉ̀ʉ mbɔ bʉʼʉ tíŋ hə muŋgɔ. 4 Bʉʼka ndʉʉ ndə baʼa kə bɛ bʉʼʉ mɔʼɔ, baʼa kə́ shyíi bii bəshʉ mbɔ bʉʼʉ la bu yi nyíɛ ŋgʉəʼ, haʼ ndə i nɔʼ fyú sê, bii kə́ kínə.

5 Bʉʼka yɔ̄ŋ-yə, ndʉʉ ndə mɔ kə mə leʼ bìʼ yá fyii-ɔ fɛ, mɔ tə́ŋ Timɔti tʉ bii ndə məkínə nukə te məmɔʼfyiihə-ii ndəŋ Nyii, kə́ fàa mbɔ ndʉʉbɛʼ Sata, wo ndə ɔ̃ mùutə bʉə ndə məgwù mu bʉʼʉ nɔʼ mùutə bii təmə bii leʼ kə́ mɔ̀ʼfyiihə-ii ndəŋ Klai fɛ, ŋgʉəʼ-yaʼ bɛ njʉnjʉ. 6 Bɔŋ nduɔ, Timɔti nɔʼ bʉ̀nə gwè shyíi baʼa nə bəsɔʼka jyujyu te məmɔʼfyiihə-ii ndəŋ Nyii leʼnə ŋkʉ̂ʉ ndə bii kie. Ɔ nɔ shyíi baʼa mbɔ bii la tʉʼ kwɔ̀ʼtə baʼa jyujyu, kə́ kʉ́ʉ ndə mənyíɛ baʼa, haʼ ndə baʼa tʉʼ kʉ́ʉ ndə mənyíɛ bii, 7 bʉʼka yɔ̄ŋ-yə, bəliŋ-baʼa, ndə nchəŋnchəŋ ŋgʉəʼ leʼnə mbʉə liŋnə ndə baʼa bɛ muŋgɔ, bəsɔʼka-yii te məmɔʼfyiihə-ii ndəŋ Nyii nɔʼ yá fyiihə-aʼ. 8 Fyiihə-aʼ nduɔ nɔ bʉ̀nə bɛ jyujyu bʉʼka baʼa nɔ kínə mbɔ bii nɔ tə́nə shʉ́əshʉ́ə biibə Tiekətʉ.

9 Nduɔ bɛ ntɛ-ndɔ ka ndə bəkɔ baʼa kɔ́ tʉ Nyii yie-bii? Baʼa nɔ tʉʼ kɔ́ ndɔ ɛ bʉʼka nchəŋnchəŋ tʉʉjyu ndə baʼa kie bəshʉ ɔ yie-bii. 10 Bɔŋleʼ kə́ gwía tʉ ɔŋ shʉ́əshʉ́ə ndʉʉnəchî ghɔŋbə ndʉʉbətyuʼ mbɔ bʉʼʉ yi nyíɛnə shʉtə-ʉʼʉ, baʼa chʉʼ mìʼtə fɔkə ndə i tʉʼ byúu mu məchimbi-yii te məmɔʼfyiihə-ii ndəŋ Nyii.

11 Nduɔ, N̈yii, mbʉ Tie-yʉʼʉ nə mbəŋ-ɛŋ leʼnə Jiso Tiekətʉ-yʉʼʉ shʉ̀tə fia tʉ baʼa ndə məbʉ̀nə gwè tʉ bii. 12 Tə mbʉ Tiekətʉ chìi ŋkʉ̂ʉ-yii te ŋwɔŋtə-ii leʼnə bʉə bənchəŋ gɛ̀ nə shʉbə yɔ́ŋyɔ́ŋ, gʉ́ə tə bɛ nə yaʼ-yə ŋkʉ̂ʉ tʉ bii. 13 Baʼa nɔ tʉʼ gháa yɔ̄ŋ-yə mbɔ Nyii, mbʉ Tie-yʉʼʉ chʉʼ kwèʼhə bii, bii kɛŋ bɛ təmə kwɔtəkə fɛ bɔŋleʼ bɛ ŋkʉʉ bəshʉ ɔ ndʉʉ ndə Jiso Tiekətʉ-yʉʼʉ bu gwè ghɔŋbə bʉə-bi bənchəŋ.