1 Mɔ nɔ tʉʼ kʉ́ʉ mbɔ bii kínə ntɛ ndə mɔ nɔʼ kɔ̀ɔtə shʉ́əshʉ́ə ndə məfɔ̀ʼ bʉʼka biibə bʉə ndə bɔ̂ŋ bɛ Laodesia leʼnə bʉə bənchəŋ ndə bɔ̂ŋ gòʼ təmə nɔʼ nə nyíɛ shʉ-ɔ fɛ. 2 Mɔ nɔ chìi yɔ̄ŋ-yə mbɔ i chʉʼ kwèʼhə bɔŋ, bɔŋ bɔŋleʼ fúu ŋwɔŋ-yʉə mu ŋkʉ̂ʉ mbɔ bɔ̂ŋ kɛŋ kie fyii shʉ́əshʉ́ə bʉʼka mu kətʉ-yʉə nɔʼ kɛŋ súunə jyujyu ndə nukə ndə Nyii kə lə̀ŋ, ndə bɛ mbʉ Klai nə mbəŋ-ɛŋ, 3 ndə ɔ kɛ̀ʼ mukətʉ-súunə ghɔŋbə ntɛ ndaa Nyii inchəŋ ndə i bɛ nə lə̂ŋ.

4 Mɔ nɔ tʉʼ gìe yɔ̄ŋ-yə bʉʼka wo mə yi fə́ʼhə bii nə bəŋʉʉ, ndə i bɛ nə shʉəŋ. 5 Bʉʼka kaʼ mɔ buŋ gòʼ təmə bɛ bʉʼʉ mɔʼɔ nə ŋkwê mbʉə-ɔ fɛ nɔ, bɔŋ kə́ bɛ bʉʼʉ mɔʼɔ mu fyii-mɔ, tʉʉ-ɔ tʉʼ bʉ̀ʉ ndə mənyíɛ ndə bii tə́nə shʉ́əshʉ́ə təmə fɔkə məŋɛ̀hə bii ndə məmɔʼfyiihə-ii ndəŋ Klai fɛ.

6 Nɔ, nduɔ ndə bii kie Klai Jiso Tiekətʉ mu məchimbi-bii nɔ, bii nɔ kie ndə mə-kə́-tòʼ haʼ nɔ, 7 kə́ dùhə ghûutə-ii i dɔ̀ŋnə mu ɔŋ, bɔŋleʼ kə́ bɔ́ŋ məchimbi-yii ndəŋ ɔŋ ndə bə bɔ́ŋ njaa le. B̈ii tə́nə shʉ́əshʉ́ə ndə məmɔʼfyiihə-ii ndəŋ ɔŋ, haʼ ndə bə kə dàhə bii, b̈ii bɔŋleʼ kə́ kɔ́ ndɔ yɔ́ŋyɔ́ŋ.

8 B̈ii láa le mbɔ wo mə yi lʉ̀ bii ndə fʉə nə fə́ʼhə ndə i gwè hə ndə ndaa-bʉəməsʉʉ-hə ndə i bɛ njʉnjʉ, gwè hə ndə nuʼ bʉəməsʉʉ bɔŋleʼ gwè hə kəghɔ-lyʉʉhəbə ndə bɔ̂ŋ tʉʼ sɔ́ʼ wʉʉnəmbikə təmə kə́ bɛ bə yi-yə ndə i gwè hə kəghɔ-Klai fɛ. 9 Bʉʼka ntɛ-Nyii-hə inchəŋ nɔ bɛ mbʉə-ɔ. 10 Bə nɔʼ chìi bii, bii gɛ̀ kùu ndə bii bɔŋ bɛ mbyu wo-imɔʼ nɔ. Klai nɔ bɛ kətʉ wotəmiyɔŋ ndə bɔ̂ŋ tʉʼ sɔ́ʼ ghɔŋbə bʉə ndə bɔ̂ŋ kie ghʉəʼkə ndə məsɔ́ʼ.

11 Ndʉʉ ndə bii kə gwè tʉ Klai, bə fɔ̀ʼ mu fyiihə-ii təmə fɔ̀ʼ woməsʉʉ fɔ̀ʼ bii nə ghɔkə-i fɛ, bɔŋ fɔ̀ʼ Klai fɔ̀ʼ bii ndə i bɛ məfyúhə ghʉəʼ-bʉ̂ʼʉ-kə mu mbʉə-bii. 12 Bʉʼka ndʉʉ ndə bii kə fí muu, bə nɔ nə tyúu biibə Klai mɔʼɔ, kʉ̂ʉ bɛ ndʉʉ-ghɔ̄ i dʉ̀ʼ mbɔ bii bɔŋ nɔ bʉ̀nə kóʼ mɔʼɔ ndə məchímbi fefe tíŋ hə bɔ̌ŋ məmɔ̀ʼfyii ndə bii mɔ̀ʼfyiihə-ii ndəŋ ghʉəʼ-Nyii-kə ndə ɔ kə bʉ̀nə kóʼhə ɔŋ ndʉʉ ndə ɔ kə kwú.

13 Bɔŋ mbəŋ-yii, ndə bii nɔʼ kə kwútə mu bʉ̂ʼtə-ii ghɔŋbə ghʉəʼ-bʉ̂ʼʉ-kə ndə bə kə gòʼ təmə nɔʼ fɔ̀ʼ mu fyii-bii fɛ, Nyii chìi bii, bii bʉ̀nə kie məchímbi biibə Klai mɔʼɔ, kʉ̂ʉ sʉ̀fyii-i hə ndəŋ bʉ̂ʼtə-ʉʼʉ inchəŋ, 14 ndə ɔ jɔ̀ʼtə ŋwɔʼnə ndə bə kə nyɔ̀ʼ ŋkwo-yʉʼʉ muŋgɔ ghɔŋbə nuʼ ndə i kə yá bʉʼʉ, ɔ tyʉ́əŋhə yɔ̄ŋ-yə tʉ́ʼ bɔ̌ŋ, kwɛ̀ŋ ndəŋ tyʉntɔɔnəkə. 15 Ɔ fí fɔ-chɔ̂-bə kəghɔ-bʉə ndə bɔ̂ŋ tʉʼ sɔ́ʼ ghɔŋbə bʉə ndə bɔ̌ŋ kie ghʉəʼkə ndə məsɔ́ʼ, mɔ̀ʼ tʉvyiikə-ʉə ŋgwʉʉnə, ndə ɔ lʉ̀ bɔŋ ndə bəŋgwìa chɔ̂ tòʼ dʉ̀ʼ bɔŋ tɔʼnə fia.

16 Nɔ, kə bii mə mɛ̀ʼtə wo mɔ̀ʼ nuʼ tʉ bii te fɔyubə, fɔkə ndə bii kie ndə mənú byuunɔ chîbə ndə bʉə tʉʼ fyúhə mu tʉ-ŋgʉʼʉmbi-kə ndə məgháaNyii, byuunɔ mə yú nchəŋtə kətʉ chi leʼnə Chîlɔʼkə fɛ. 17 Nubə-ɔ̄ŋ nchəŋnchəŋ-ɛŋ nɔ haʼ lyʉʉhə-bənu-bə ndə i bíe bəshʉ gwè ndə Klai bɛ ŋkɛŋ-ɛŋ. 18 Kə bii mə mɛ̀ʼtə bʉə lyʉ̀ʉ mbɔ bii lʉ̀ ŋwɔŋ-yii sê ndə bɛ yi-mbii-yə bɔŋleʼ kə́ lyʉ̀ʉ mbɔ bii kə́ lə̀ʼtə bʉəntəŋNyii fɛ. Yɔ̄ŋ-yə bu chìi bii bɛ́ kɛŋbə ndə Nyii nɔʼ kə kɔ̀ʼnə tʉ bii. Bʉə-bɔ̄ŋ nɔ tʉʼ tə́nə ndəŋ nubə ndə bɔ̂ŋ nyíɛ mu njəŋ təmə kə bɛ́ŋbɛ́ŋ fɛ. Nɔ bɛ yʉə-yə ntɛ ndə bɔ̂ŋ tʉʼ kwɔ̀ʼtə nə bʉəməsʉʉ, i kə́ chìi bɔ̂ŋ kə́ ŋàʼtə, i bɔŋ kə́ bɛ njʉnjʉ. 19 Bɔ̂ŋ nɔʼ fɔ̀ʼ ŋwɔŋtə-ʉə ndə məchyúunə ndəŋ mbʉ kətʉ ndə bɛ Klai ndə ɔ tʉʼ yúʼ mbʉə bɔŋleʼ yá mbʉ mbʉə kəyəŋ kəmɔʼ nə yuhəbə-bi ghɔŋbə ndundumə, i kə́ kʉ̀ʼ ndə ntɛ məkʉ̀ʼ ndə i gwè hə kəghɔ-Nyii.

20 Kaʼ biibə mbʉ Klai nɔʼ kə kwú mɔʼɔ, ɔ bɔŋ-nɔʼ-leʼ yɔ̀ʼtə ghyʉʉtə ndə lyʉʉhəbə ndə bɔŋ tʉʼ sɔ́ʼ wʉʉnəmbikə-ɔ̄ŋ kə kɔ́ʼtə bii nə yɔŋ, chìi ka ndʉʉmɛ, bii kə́ chí mbi fi nə kie wʉʉnəmbikə kie bii? Kə́ tʉ́ʼ ntɛ-nuʼ-hə ndə i tʉʼ ghɔ̀ŋ mbɔ, 21 "Kə a mə yá yɔ̄ŋ-yə kie fɛ. Kə a mə yúotə yɔ̄ŋ-yə fɛ. Kə a mə kə̀ŋ yɔ̄ŋ-yə fɛ." 22 Nchəŋnchəŋ nuʼ-ɔ̄ŋ ghɔŋbə nubə ndə bə tʉʼ dàhə nɔ mɔ̀ʼ haʼ woməsʉʉ ndə g̃hʉəʼkə-ʉə mì ndʉʉ ndə a nɔʼ fɔ̀ʼ nə yɔŋ. 23 Bɔŋ ntɛ-nuʼ-hə-ɔ̄ŋ, tʉʼ kwáa ndə məbyʉ̀hə bʉə ndəŋ fia-bʉəbʉə-tə ndə mbʉə kʉ̀ʉ fɛ, buŋ ndə i tʉʼ dʉ̀ʼ shʉ, fi nə i tə́nə ndəŋ ndaa ndə bə tʉʼ shyíi bʉə ndə mə-kə́-lə̀ʼtə Nyii ndə ntɛ ndə woməsʉʉ kʉ̀ʉ, kə́ làhə shʉ ndə məlʉ̀ ŋwɔŋtə-ʉə sê, kə́ chɔ́ŋhə mbɔʼ-yʉə.