1 Kaʼ bə nɔʼ bʉ̀nə kóʼhə biibə Klai mɔʼɔ, b̈ii tʉ́ʼ shʉtə-ii ndəŋ nubə ndə i bɛ yuo, kəyəŋ ndə Klai bɛ chɔ, kə́ dùʼ ndəŋ kwiiləŋ Nyii. 2 B̈ii tʉ́ʼ ndaahə-ii ndəŋ nubə ndə i bɛ yuo, kaa nu-kəchisê-bə fɛ. 3 Bʉʼka bii nɔʼ kwú lə̀ŋ məchimbi-yii biibə Klai mu Nyii. 4 Ndʉʉ ndə bə bu tɛ́ʼ Klai ndə ɔ bɛ məchimbi-yii nɔ, bə bu tɛ́ʼ bii bɔŋ mɔ̀ʼ mu məgʉə-e.

5 Nɔ, ndʉʉghɔfii, b̈ii yí nu-kəwʉʉnəmbi-bə ndə i bɛ mu mbʉə-bii nə bəsəŋ, nu-nyàatəŋwɔŋ-bə, ntɔ-bəsəŋ-mə, ntɔmə ndə məchìi bʉ̂ʼʉ leʼnə ntɔmə ndə məkie tətɛʼ bii ndə i bɛ nə məgháa bənyii. 6 Bʉʼka nubə-ɔ̄ŋ, tʉʉbʉə-Nyii nɔ bu shíʼ ndəŋ bʉə ndə bɔ̂ŋ gòʼ təmə kə́ yʉ́ chu-i fɛ.* 7 Bii nɔ nə kə́ fɔ̀ʼ haʼ nubə-ɔ̄ŋ vɛʼ ndə bii kə bɛ muŋgɔ. 8 Bɔŋ nduɔ, bii nɔ kie ndə məmɛ̀ʼ nubə-ɔ̄ŋ inchəŋ nə tʉʉbʉə, fyiighɔ́ʼnə, məbàa shʉ, məgìe nu-bʉəbʉə-bə kətʉ wo leʼnə ŋkwu-bəŋgie-bə. 9 Kə bii mə kə́ chʉ̀ə lɛɛŋkə tʉ ŋwɔŋtə-ii fɛ, bʉʼka bii nɔʼ shùɔ nduɔŋ nuʼ ghɔŋbə nchiinə bənu bʉəbʉə mbʉə bii, 10 nɔʼ mɔ̀ʼ gwo mbʉə fefe ndə bɛ nuʼ fefe mbʉə bii, ndə bɛ mə-kə́-kwɛ́nə ndaahə-ii bəchibəchi ndə a tʉʼ yétə ndə məkínə mbɔŋ-aŋ bɔŋleʼ bɛ ndə ɔ. 11 Mu məchímbi fefe-ɔ̄, nuɔ imɔʼ bɛ ŋkʉ̂ʉ ndəŋ ibɛʼ-yə nuɔ fɛ, bʉə ndə bɔ̂ŋ gòʼ təmə bɛ bʉə-Juu fɛ ghɔŋbə bʉə-Juu, bʉə ndə bə nɔʼ fɔ̀ʼ bɔŋ ghɔŋbə bʉə ndə bə gòʼ təmə nɔʼ fɔ̀ʼ bɔŋ fɛ, bəntoʼŋgwe, bʉə liʼ muŋkɔ, fʉəhə, wo ndə ɔ gòʼ təmə bɛ fʉə fɛ bɔŋ Klai nɔ bɛ nubə inchəŋ bɔŋleʼ kə́ bɛ mu bɔŋ bənchəŋ.

12 Bii nɔ bɛ bʉə-Nyii ndə ɔ kʉ̀ʉ bii bɔŋleʼ séʼ bii ndə məbɛ yi-yə bʉə. Nɔ ndʉʉmɛ, bii nɔ kie ndə məmɔ̀ʼ nubə-ɔ̄ŋ mbʉə bii tʉvyiikə, nuʼ jyujyu, məlʉ̀ ŋwɔŋ sê, mbuɔnəbə, məyá fyii bɔŋleʼ bɛ́ŋ wotəmiyɔŋ ndə ntɛhə ndə ɔ bɛ. 13 B̈ii kə́ yá fyiihə-ii tʉ ŋwɔŋtə-ii, kaʼ wo kie nukə te liŋ-iŋ, ɔ̈ sʉ̀fyii-i hə ndəŋ bʉ̂ʼʉ-e. Nɔ, haʼ ndə Tiekətʉ kə sʉ̀fyii-i hə ndəŋ bʉ̂ʼtə-ii bii nɔ kie ndə məsʉ̀fyiihə-ii hə ndəŋ bʉ̂ʼ-bəbɛʼbʉə-tə ghɔ. 14 Bɔŋ fɔŋ-kənu ndə məbìʼ ndəŋ nubə-ɔ̄ŋ, b̈ii mɔ̀ʼ ŋkʉ̂ʉ mbʉə-bii ndə ĩ kɔ́ʼ nubə inchəŋ ndə mə-kɛŋ-dùʼ nə ŋgiekə imɔʼ. 15 Tə fyiighʉ́ənə ndə i gwè hə kəghɔ-Klai sɔ́ʼ mu fyiihə-ii bʉʼka Nyii nɔʼ kɛŋ tíi bii ndə mbʉə imɔʼ ndə məkie fyiighʉ́ənə-ɔ̄ŋ, b̈ii bɔŋleʼ kə́ kɔ́ ndɔ tʉ Nyii.

16 Ŋgie-Klai-bə nɔ kie ndə məbɛ mu fyii-bii jyujyu, b̈ii kə́ dàhə bɔŋleʼ tʉ́ʼtə ŋwɔŋtə-ii nə ntɛ-mukətʉ-súunə-hə inchəŋ. B̈ii kə́ yùɔ lyuutə mu Ŋwɔʼnə təLyuu, lyuutə ndə i tʉʼ lə̀ʼtə Nyii bɔŋleʼ yùɔ ibɛʼ-yə lyuutə ndə i gwè hə kəghɔ-LyʉʉhəNyiikə, b̈ii kə́ yùɔ tʉ Nyii nə ndɔ mu fyiihə-ii. 17 Nukə təmiyɔŋ ndə bii tʉʼ fɔ̀ʼ byuunɔ kə́ gìe, bii nɔ kie ndə məfɔ̀ʼ yie-Jiso Tiekətʉ, ndə bii tʉʼ kɔ́ ndɔ tʉ Nyii mbʉ Tie tíŋ hə bɔ̌ŋ ɔŋ.

18 Bəke, b̈ii ke ŋwɔŋ-yii tʉ bələŋ-bii, ndə ntɛ ndə i kʉ̀ʼnə tʉ Tiekətʉ. 19 Bələŋ, b̈ii kʉ̀ʉ bəke-bii, təmə kə́ chyʉ́nə tʉ bɔŋ fɛ. 20 Vâambuɔ, bii nɔ kie ndə məyʉ́ chu bətie-bii ndə nubə inchəŋ, bʉʼka i nɔ tʉʼ kɔ́ tʉʉjyu tʉ Tiekətʉ. 21 Bətie-vâa, kə bii mə kə́ byìi tʉʉ vâa-bii fɛ, təmə mbʉəhə-ʉə bu lʉ́ʉtə. 22 Fʉəhə, b̈ii yʉ́ chu-bətiefɔʼɔ-bii kəwʉʉnəmbi-fɛ̄ŋ ndə nubə inchəŋ. Kə bii mə-kə́-yʉ́ chu-yʉə bə haʼ ndə mə fàa shʉ ndʉʉ ndə bɔ̂ŋ bɛ sê, mbɔ bɔ̂ŋ chʉʼ kə́ tíi yie-yii jyujyu fɛ, b̈ii kə́ fɔ̀ʼ tʉ bɔŋ nə mu fyii shʉəŋ, kə́ fàa bə Tiekətʉ. 23 Nukə təmiyɔŋ ndə bii tʉʼ fɔ̀ʼ, b̈ii fɔ̀ʼ nə fyii-yii inchəŋ fi nə bii tʉʼ fɔ̀ʼ bə tʉ Tiekətʉ təmə kə́ fɔ̀ʼ tʉ woməsʉʉ fɛ, 24 kə́ kínə mbɔ Tiekətʉ bu kɔ́ yii-yə yʉʉ ndə fɔbə ndə ɔ tʉ́ʼ tʉ bʉə-bi ndə kɛŋbə-ii. Bii nɔ tʉʼ fɔ̀ʼ bə tʉ Klai Tiekətʉ. 25 Bʉə bənchəŋ ndə bɔ̂ŋ tʉʼ fɔ̀ʼ bʉ̂ʼʉ, bə bu lɔ̀ʼ bɔŋ ndə bʉ̂ʼtə-ʉə bʉʼka Nyii kyinə túhə shʉ fɛ.