1 Nɔ, kaʼ bɛ mbɔ bii kie fyii tə́nə bʉʼka bii bɛ mu Klai, kaʼ bɛ mbɔ ŋkʉ̂ʉ-Klai nɔʼ yá fyii-a, kaʼ bɛ mbɔ a kie njunə bii LyʉʉhəNyiikə, kaʼ bɛ mbɔ a kie buuŋjyu ghɔŋbə tʉvyiikə tʉ bəbɛʼbʉə, 2 b̈ii kie ŋkwɔʼtə imɔʼ, kie ntɛ ŋkʉ̂ʉ imɔʼ, kie gyʉʉ imɔʼ bɔŋleʼ kie fyii imɔʼ ndə məchìi tʉʉ-ɔ bʉ̀ʉ gɛ̀ kùu.

3 Kə bii mə kə́ fɔ̀ʼ nukə lɛ́nə bɛ haʼ ŋwɔŋ-yii fɛ byuunɔ ndə mə-kə́-dʉ̀ʼ ŋwɔŋ njʉnjʉ fɛ. B̈ii lʉ̀ ŋwɔŋ-yii sê, nyíɛ bəbɛʼbʉə b̈ɔ̂ŋ gʉ́ə shʉ-bii chàa ŋwɔŋ-yii. 4 Kə wo mə kə́ kwɔ̀ʼtə bə haʼ nukə ndə i bu kwáa ɔ fɛ, bɔŋ kwɔ̀ʼtə nukə ndə i bu kwáa bəbɛʼbʉə ghɔ.

5 B̈ii kie ntɛ-fyii ndə Klai Jiso kə kie.

6 Ɔ nɔ nə bɛ ntɛ imɔʼ ghɔŋbə Nyii

bɔŋ təmə lʉ̀ mbʉ mə bɛ ndyʉndyʉ ghɔŋbə Nyii

ndə nukə ndə ɔ kie məyá tə́nə chɔ fɛ.

7 Ɔ bɔŋ nɔ kə chìi ŋwɔŋ-ɛŋ ndə məbɛ wo njʉnjʉ,

bɛ ntɛ imɔʼ ghɔŋ vaafɔ̀ʼ,

bə bí ɔ, ɔ gwè bɛ woməsʉʉ.

8 Ndə ɔ kə bɛ kəchisê fɛ̄ŋ nə mbɔʼ-mbʉə-woməsʉʉ,

ɔ lʉ̀ ŋwɔŋ-ɛŋ sê, ndə məyʉ́ chu-Tie

tə bə yí ɔ, buŋ tɔ̀ɔnə ɔŋ ndəŋ kətyʉ.

9 Bʉʼka yɔ̄ŋ-yə, Nyii kɛŋ kóʼhə ɔŋ ghɔʼ daa,

kɔ́ yie tʉ ɔŋ ndə i chàa yietə inchəŋ.

10 Mbɔ bə kʉ̂ʉ kə tíi yie-Jiso nɔ, bə bʉ́ʉnə sê bəshʉ ɔ bənchəŋ,

lʉ̀ hə yuo, gwè dàa kəchisê, gɛ̀ dàa mu sê,

11 bʉə bənchəŋ bɔŋleʼ gìe hə chu-bɔŋ ŋgwʉʉnə mbɔ Jiso Klai nɔ bɛ Tiekətʉ,

i kɔ́ kuŋhə tʉ Nyii mbʉ Tie.

12 Nɔ, mbʉətə bəliŋ-bɔŋ, ndə bii nɔʼ kə kə́ yʉ́ chu-Nyii ŋgɔŋŋgɔŋ, kə i mə lìʼ haʼ ndə bʉʼʉ bɛ mɔʼɔ fɛ, b̈ii bìʼ fɔ̀ʼ yɔ́ŋyɔ́ŋ vɛʼ ndə mɔ gòʼ təmə bɛ sê fɛ, kə́ fɔ̀ʼ nə faakə leʼnə ŋgwonəkə ndə mədʉ̀ʼ mbɔ Nyii nɔ ŋkwaa-yii. 13 Bʉʼka nɔ bɛ Nyii ndə ɔ tʉʼ fɔ̀ʼ mu məchimbi-bii, ndə məkɔ́ fyii tʉ bii ndə məkʉ̀ʉ ghɔŋbə ghʉəʼkə ndə mə-kə́-fɔ̀ʼ nubə ndə i kɔ́ tʉʉjyu tʉ ɔŋ.

14 B̈ii kə́ fɔ̀ʼ nubə inchəŋ təmə kə́ luŋtə fɛ byuunɔ kə́ yá bəŋʉʉ fɛ, 15 mbɔ bii chʉʼ bɛ vâa-Nyii ndə bɔ̂ŋ bɛ ndyʉndyʉ təmə kwɔtəkə fɛ byuunɔ mɔ̀ʼmbɛ mu kəwʉʉnəmbi ndə bʉə gə́ŋtə bənu ghɔŋbə bʉə-bʉ̂ʼʉ bɛ chɔ fɛ. B̈ii kə́ báa mu bɔŋ nə bəlɔʼɔ kəwʉʉnəmbi, 16 kə́ yá ŋgiekə ndə ĩ kɔ́ məchímbi shʉ́əshʉ́ə, mbɔ kʉ̂ʉ yi bɛ Chîkə ndə Klai bu yi bʉ̀nə gwè nɔ, mɔ kə́ ŋàʼtə mbɔ mɔ la kə nyʉ́ʉ ndʉʉ njʉnjʉ fɛ təmə bɔŋleʼ kə fɔ̀ʼ fɔʼɔ njʉnjʉ fɛ. 17 Kaʼ buŋ bɛ bə mbɔ b̈ə véʼ fɔbʉəkə-ɔŋ nə ndʉʼmə ndə məfɛ̀ʼndɛŋ bìa ndəŋ məkɔ́ ŋwɔŋ-yii tʉ Nyii nə fɔ-fɛ̀ʼndɛŋ-bə ndə i gwè hə ndəŋ məmɔʼfyiihə-ii ndəŋ Nyii, mu fyii-ɔ bɛ jyujyu, bʉʼʉ bənchəŋ bɔŋleʼ kie tʉʉjyu-ɔ. 18 Haʼ ndə nɔ, tʉʉ-yii ghɔ kə́ bʉ̀ʉ bɔŋleʼ sʉ́ʼnə bʉʼʉ mɔʼɔ.

19 Kaʼ Jiso Tiekətʉ bɛ́ŋ, mɔ nɔ tʉʼ kwɔ̀ʼtə mbɔ ndəŋ kʉʉkə məniʼ nɔ mɔ tə́ŋ Timɔti tʉ bii, mbɔ mɔ chʉʼ kie tʉʉjyu ghɔ ndʉʉ ndə mɔ yʉ́ bəsɔʼka-yii. 20 Bʉʼka mɔ leʼ kie wobɛʼ ndə ɔ fɛ, ndə ɔ kie fyii ndə ĩ gìe shʉəŋ ndə mənyíɛ mbɔ bii dùʼ jyujyu fɛ. 21 Bɔ̂ŋ bənchəŋ nɔ tʉʼ tyúu haʼ tʉkə-ʉə, təmə kə́ fɛ̀ʼ nubə ndə i bɛ tʉ Jiso Klai fɛ. 22 B̈ii bɔŋ kínə mbɔ Timɔti nɔʼ dʉ̀ʼ ŋwɔŋ-ɛŋ ndə məbɛ ŋkɛŋ wo, ndə vaa ghɔŋ tie-e, baʼa ɔ nɔ fɔ̀ʼ ndə məlɔ̀ʼ ntəŋjyujyu te Klai. 23 Ndʉʉghɔfii, mɔ nɔ tʉʼ kʉ́ʉ, mbɔ mɔ tə́ŋ ɔŋ tʉ bii nəndʉʉnəndʉʉ, ntɛ ndə mɔ bu nyíɛ ndə nubə tʉʼ tòʼ tʉ mɔ, 24 mɔ bɔŋ kə́ mɔ̀ʼfyii-ɔ ndəŋ Tiekətʉ mbɔ kʉʉkə məniʼ nɔ, m̈ɔ gwè nə mbəŋ-ɔŋ nyíɛ bii.

25 Mɔ nɔ tʉʼ kwɔ̀ʼtə mbɔ nɔ bʉ̀ʉ mɔ bʉ̀nə tə́ŋ liŋ-yʉʼʉ Ebaflɔdito tʉ bii, ndə baʼa ɔ nɔʼ fɔ̀ʼ mɔʼɔ tʉ bii. Ɔ nɔ bɛ wo ndə baʼa ɔ tʉʼ mɔ̀ʼ chɔ̂ məmɔ̀ʼfyii ndəŋ Nyii mɔʼɔ ndə ɔ nɔʼ fɔ̀ʼ tʉ mɔ nə wontəŋ-yii ndə mə-kə́-kwáa mɔ, 26 bʉʼka ɔ nɔʼ kə kə́ gwía nukə-ii bənchəŋ, i bɔŋleʼ kɔ́ ŋgʉəʼ tʉ ɔŋ bʉʼka ndə bii nɔʼ kə yʉ́ mbɔ ɔ kə kə́ yɔ́ʼyɔ́ʼ. 27 Ndə ŋgie-shʉəŋ-kə, ɔ nɔʼ kə yɔ́ʼ tə kə kʉ́ʉ kwú. Bɔŋ tʉ-Nyii-kə vyíi ndəŋ ɔŋ, kaa haʼ ndəŋ mbəŋ-ɛŋ fɛ, i nɔ nə vyíi haʼ ndəŋ mɔ ghɔ, təmə mɔ nɔ nə vínə tə bìʼ vínə.

28 Nɔ, i nɔ tʉʼ kɛŋ dʉ̀ʼ mu fyii-mɔ shʉ́əshʉ́ə mbɔ mɔ tə́ŋ ɔŋ tʉ bii, mbɔ tʉʉtə-i chʉʼ bʉ̀ʉ ndʉʉ ndə bii bu bìʼ nyíɛ ɔŋ, i bɔŋleʼ tɛ́ʼtə məchɔ́ŋhə ndə fyii-ɔ tʉʼ chɔ́ŋhə mɔ ghɔ. 29 B̈ii lʉ̀ ɔ nə tʉʉjyu inchəŋ yie-Tiekətʉ, bɔŋleʼ kɔ́ kuŋhə tʉ ntɛ bʉə-maa-bɔ̄ŋ, 30 bʉʼka ɔ kə bìa kwú bʉʼka fɔʼɔ-Klai. Ɔ kɔ́ tʉkə-i tʉ kwú ndə məlìʼ fɔ̀ʼ tʉ mɔ ndə bii kə gòʼ təmə mìʼtə fɛ.