1 Nɔ nyɔ̀ʼ mbəŋ-ɔŋ Bɔɔ nyɔ̀ʼ ŋwɔʼnə-ɔ̄ŋ, lɔntəŋNyii, kaa lɔntəŋNyii ndə ɔ gwè hə kəghɔ-woməsʉʉ fɛ təmə bɔŋleʼ tíŋ hə bɔ̌ŋ woməsʉʉ fɛ, ɔ bɔŋ gwè bə hə kəghɔ-Jiso Klai ghɔŋ Nyii mbʉ Tie, ndə ɔ kə bʉ̀nə kóʼhə ɔŋ ndʉʉ ndə ɔ kə kwú. 2 Ŋwɔʼnə-ɔ̄ŋ bɔŋleʼ gwè hə kəghɔ-bʉə bənchəŋ ndə bɔ̂ŋ nɔʼ bɛ́ŋ Nyii baʼa bɔŋ kə́ bɛ mɔʼɔ. Baʼa nɔ tʉʼ nyɔ̀ʼ tʉ chɔshi ndə i bɛ mu Galatia.

3 Tə Nyii mbʉ Tie-yʉʼʉ ghɔŋbə Tiekətʉ-yʉʼʉ Jiso Klai, dʉ̀ʼ buuŋjyu tʉ bii bɔŋleʼ kɔ́ bii nə fyiighʉ́ənə, 4 Jiso Klai nɔ kə kɔ́ ŋwɔŋ-ɛŋ ndə bʉ̂ʼtə-ʉʼʉ, ndə məfì tʉkə-ʉʼʉ ndə mbi bʉ̂ʼʉ-ɔ̄ laa nɔ, ndə ŋkʉʉnə tʉʉ-Nyii Tie-yʉʼʉ. 5 Tə məŋwɔʼ bɛ yi-yə təmə liʼ-i ghɔ fɛ. Ï bɛ haʼ nɔ.

6 I nɔ tʉʼ chàa mɔ mbɔ bii nɔʼ chʉʼ nyʉ́ʉ bɔ̌ŋ mbəŋ-ɛŋ Nyii ndə ɔ kə tíi bii tíŋ hə bɔ̌ŋ buuŋjyu-Klai, kə́ kíahə ŋwɔŋ-yii gɛ̀ ndə ntəŋjyujyu kədɔŋ. 7 Kaa bɛ mbɔ ibɛʼ-yə ntɛ ntəŋjyujyu bɛ ghɔ fɛ, bɔŋ mɔ nɔ tʉʼ gìe yɔ̄ŋ-yə bʉʼka mbɔ bʉəbɛʼbə nɔ bɛ ghɔ ndə bɔ̂ŋ tʉʼ chɔ́ŋhə bii, kə́ kʉ́ʉ ndə məbyùutə ntəŋjyujyu ndə i bɛ yie-Klai. 8 Bɔŋ kaʼ buŋ bɛ bə mbəŋ-yaʼ, byuunɔ wontəŋNyii ndə ɔ gwè bə hə yuo gwè lɔ̀ʼ ntəŋ Nyii ndə i bɛ ŋkʉ̂ʉ ndəŋ yi ndə baʼa kə gwè lɔ̀ʼ tʉ bii, ɔ̈ bɛ̀ʼ ndɔŋ-ɛŋ kəghɔ-Nyii. 9 Haʼ ndə baʼa nɔʼ kə gìe, nɔ, mɔ bìʼ gìe, kaʼ wotəmiyɔŋ kə́ lɔ̀ʼ ntəŋjyujyu tʉ bii ndə i bɛ ŋkʉ̂ʉ ndəŋ yi ndə baʼa nɔʼ kə lɔ̀ʼ tʉ bii, ɔ̈ bɛ̀ʼ ndɔŋ-ɛŋ kəghɔ-Nyii.

10 Mɔ tʉʼ kʉ́ʉ ŋkʉ̂ʉ nduɔ hə kəghɔ-bʉəməsʉʉ mɛ, kə hə kəghɔ-Nyii? Byuunɔ, mɔ tʉʼ kʉ́ʉ ndə məchìi tʉʉ-woməsʉʉ bʉ̀ʉ ndə mɔ mɛ? Kaʼ mɔ kʉ̌ʉ kə́ bíe kʉ́ʉ bɛ mbɔ kʉ̀ʉ woməsʉʉ kʉ̀ʉ mɔ, təmə mɔ mə bɛ vaantie-Klai fɛ.

11 Bəliŋ-bɔŋ, mɔ nɔ tʉʼ kʉ́ʉ mbɔ bii kínə mbɔ ntəŋjyujyu ndə mɔ kə́ lɔ̀ʼ tʉ bii, kə bɛ yi ndə i kə gwè hə kəghɔ-woməsʉʉ fɛ. 12 Bʉʼka mɔ kə kie hə kəghɔ-woməsʉʉ fɛ, təmə bə bɔŋ dàhə mɔ dàhə chɔ fɛ, mɔ bɔŋ nɔ nə kie hə kəghɔ-Jiso Klai ndə ɔ kə kɛ̀ʼ tʉ mɔ.

13 Bii nɔ nə yʉ́ ntɛ wo ndə mɔ kə bɛ yɔŋ, vɛʼ ndə mɔ kə́ tʉ́ʼ nuʼ-bʉə-Juu, ntɛ ndə mɔ kə́ chɔ́ŋhə chɔshi-Nyii shʉ́əshʉ́ə ndə məbʉ́əhə. 14 Mɔ nɔ nə kə́ gɛ̀ nə shʉbə ndə mbʉ nuʼ-bʉə-Juu tə kə́ chàa bəbɛʼbʉə mu kəyɔ-baʼa, mɔ kɛŋ kɔ́ fyii-ɔ shʉ́əshʉ́ə ndə nuʼ-bətie-baʼa.

15 Bɔŋ mbəŋ-ɛŋ, Nyii ndə ɔ nɔʼ kə séʼ mɔ, lʉ̀ hə bətɔ-naa-ɔŋ, ndə ɔ kə tíi mɔ nə buuŋjyu-i, 16 tʉʉ-i nɔ kə bʉ̀ʉ ndə məkɛ̀ʼ wo ndə Vaa-ɛ bɛ yɔŋ tʉ mɔ, mbɔ mɔ chʉʼ gɛ̀ lɔ̀ʼ ntəŋjyujyu te ɔ tʉ bʉə ndə bɔ̂ŋ gòʼ təmə bɛ bʉə-Juu fɛ, təmə mɔ gɛ̀ ndə məbíʼtə tʉ wobɛʼ təmiyɔŋ fɛ. 17 Təmə mɔ bɔŋ kóʼ gɛ̀ Jɛlosalɛŋ ndə məbíʼtə tʉ bʉə ndə bɔ̂ŋ nɔʼ kə bɛ bəlɔntəŋNyii bəshʉ mɔ fɛ, mɔ lɔ̀ gɛ̀ bə Alabia, buŋ bʉ̀nə bìʼ gɛ̀ Damasiko. 18 Ndʉʉmɛ, ŋgʉʼhə itia kʉ̂ʉ tíŋ, mɔ kóʼ gɛ̀ mətòʼ Jɛlosalɛŋ tʉ Bita ndə məkínə nuʼ-i, baʼa ɔ chí ndə chîbə njuɔ taa nə wuŋ. 19 Mɔ kə nyíɛ mbyu lɔntəŋNyiibɛʼ təmiyɔŋ fɛ, yaʼkɛŋ Jɛŋ liŋ-Tiekətʉ. 20 Ndə nubə ndə mɔ tʉʼ gìe tʉ bii, Nyii nɔ kínə mbɔ mɔ tʉʼ chʉ̀ə lɛɛŋkə fɛ. 21 Yɔ̄ŋ-yə kʉ̂ʉ tíŋ, mɔ kóʼ gɛ̀ mu bie Silia ghɔŋbə Silisia. 22 Wo chʉʼ kə kínə mɔ hə mu bʉə-Klai mu-bəchɔshi-hə mu Judia fɛ. 23 Bɔ̂ŋ nɔ nə kə́ yʉ́ haʼ yʉ́ ndə bə nə kə́ ghɔ̀ŋ mbɔ, "Wo-e ndə ɔ nə kə́ chɔ́ŋhə bʉʼʉ le, nɔ tʉʼ bʉ̀nə lɔ̀ʼ ntəŋjyujyu te məmɔ̀ʼfyii ndəŋ Jiso ndə ɔ nɔʼ nə kə́ kɔ̀ɔtə ndə məbʉ́əhə le." 24 Ndʉʉmɛ, bɔ̂ŋ kə́ lə̀ʼtə Nyii bʉʼka mɔ.