1 Ndʉʉmɛ, ŋgʉʼhə kʉ̂ʉ tíŋ njuɔ kwi nə wuŋ mɔ bʉ̀nə kóʼ gɛ̀ Jɛlosalɛŋ baʼa Banaba, lʉ̀ Tatu baʼa ɔ gɛ̀ mɔʼɔ. 2 Mɔ nɔ nə kóʼ gɛ̀ chɔ bʉʼka nukə ndə Nyii kə dʉ̀ʼ tʉ mɔ. Mɔ gɛ̀ mɔ̀ʼ ntəŋjyujyu ndə mɔ tʉʼ lɔ̀ʼ bɔ̌ŋbɔ̌ŋ mu bʉə ndə bɔ̂ŋ gòʼ təmə bɛ bʉə-Juu fɛ, bəshʉ bʉə ndə bə kə kínə bɔŋ ndə bəntəŋbəshʉ, nə faakə mbɔ ndʉʉbɛʼ mɔ nɔʼ kə fɔ̀ʼ fɔʼɔ bɔŋleʼ kə́ fɔ̀ʼ fɔʼɔ njʉnjʉ. 3 Bɔŋ təmə bə kwɛ̀ŋhə mbɔ b̈ə fɔ̀ʼ Tatu ndə baʼa ɔ kə bɛ mɔʼɔ fɛ, tʉ ɔ bɔŋ nɔ nə bɛ wo Gili.

4 Bəbɛʼbʉə-bɔ̄ŋ ndə bɔ̂ŋ kə́ kʉ́ʉ mbɔ b̈ə fɔ̀ʼ ɔ bɔ̂ŋ kə́ làhə shʉ mbɔ bɔ̂ŋ la bɛ bʉə-Nyii, bɔ̂ŋ nɔ kə nyáʼtə sʉ́ʉ mu baʼa ndə mə-kə́-yəŋ tiɛŋ yaʼ, kə́ kʉ́ʉ ndə mənyíɛ ntɛ ndə tʉkə-aʼ bu lʉ́ʉ baʼa tíŋ hə bɔ̌ŋ məyúnə-yaʼbə Jiso, Wo ndə Nyii Kùŋ Tə́ŋ bɔ̂ŋ chʉʼ chìi baʼa bɛ fʉəhə. 5 Təmə baʼa yʉ́ chu-yʉə buŋ məniʼ fɛ, bʉʼka baʼa nɔ kə́ kʉ́ʉ mbɔ b̈aʼa yá shʉəŋ ndə i bɛ mu mbʉ ntəŋjyujyu tʉ́ʼ tʉ bii.

6 Bʉə ndə bə kə kínə bɔŋ ndə məbɛ bəntəŋbəshʉ, kə bɔ̂ŋ kə bɛ ka, i kə bɛ nubɛʼkə tʉ mɔ fɛ bʉʼka Nyii kyinə túhə shʉ fɛ, nɔʼ m̈ɔ bìʼ ghɔ̀ŋ mbɔ mbəŋ-yʉə ndə bə kə́ tíi bɔŋ nə bəntəŋbəshʉ kə bìʼ nubɛʼkə ndəŋ mɔ fɛ. 7 Bɔ̂ŋ buŋ leʼ nyíɛ bə mbɔ Nyii nɔ kə kɔ́ mbʉ ntəŋjyujyu mu kəghɔ-mɔ ndə məgɛ̀ lɔ̀ʼ tʉ bʉə ndə bə gòʼ təmə nɔʼ fɔ̀ʼ bɔŋ fɛ, haʼ ndə bə kə kɔ́ tʉ Bita ndə məgɛ̀ lɔ̀ʼ tʉ bʉə ndə bə nɔʼ fɔ̀ʼ bɔŋ.* 8 Mbəŋ-ɛŋ, ndə ɔ chìi Bita ndə məbɛ lɔntəŋNyii tʉ bʉə ndə bə nɔʼ fɔ̀ʼ bɔŋ, nɔ chìi haʼ ɔ chìi mɔ ghɔ ndə məbɛ lɔntəŋNyii tʉ bʉə ndə bɔ̂ŋ gòʼ təmə bɛ bʉə-Juu fɛ. 9 Bɔŋ ndʉʉ ndə Jɛŋ, Bita leʼnə Jɔŋ ndə bɔ̂ŋ kə bɛ nə tɛʼnəbə, kə nyíɛ buuŋjyu ndə Nyii nɔʼ dʉ̀ʼ tʉ mɔ, bɔ̂ŋ chàʼtə baʼa Banaba ndə mədʉ̀ʼ mbɔ nukə ndə baʼa tʉʼ dàhə ghɔŋbə fɔʼɔ-Nyii ndə baʼa tʉʼ fɔ̀ʼ nɔ kʉ̀ʼnə bɔŋleʼ bɛ́ŋ mbɔ b̈aʼa lʉ̀ ŋgieNyiikə gɛ̀ nə yɔŋ tʉ bʉə ndə bɔ̂ŋ gòʼ təmə bɛ bʉə-Juu fɛ, mbəŋ-yʉə lʉ̀ gɛ̀ nə yɔŋ tʉ bʉə ndə bə nɔʼ fɔ̀ʼ bɔŋ. 10 Mbyu kənu imɔʼ ndə bɔ̂ŋ kə gìe tʉ baʼa nɔ bɛ mbɔ b̈aʼa la kwɛ́nə bʉə-mbʉʼ, kə́ bɛ haʼ nukə ndə i kə bɛ mu fyii-mɔ shʉ́əshʉ́ə ndə məfɔ̀ʼ.

11 Ndʉʉ ndə Bita kə gwè Antiɔk, mɔ sɔ́ʼ ɔ shʉ-ɔ, bʉʼka nukə ndə ɔ kə chìi kə kʉ̀ʼnə fɛ. 12 Bʉəbɛʼbə nɔ kə gwè hə kəyəŋ ndə Jɛŋ bɛ chɔ, tʉ Bita nɔ nə kə́ fəŋ yú fɔbə ghɔŋbə bʉə ndə bɔ̂ŋ gòʼ təmə bɛ bʉə-Juu fɛ. Bɔŋ ndʉʉ ndə bʉə-bɔ̄ŋ kə gwè, ɔ fyúhə ŋwɔŋ-ɛŋ, kə́ fàa nuɔ-bʉə ndə bə nɔʼ fɔ̀ʼ ndə bɔ̂ŋ tʉʼ kʉ́ʉ mbɔ b̈ə kə́ fɔ̀ʼ bʉə. 13 Ndʉʉmɛ, bəbɛʼbə bəʼ-bʉə-Juu-kə, bìa Bita ndə mənaa-mi, i bɛ tə Banaba bìa bɔŋ ndə mbʉ mənaa.

14 Bɔŋ ndʉʉ ndə mɔ kə nyíɛ mbɔ nuʼ-yʉə kə́ tòʼ ndyʉndyʉ ghɔŋbə ŋgie-shʉəŋ-kə ndə i fyú hə mu ntəŋjyujyu fɛ, mɔ gìe tʉ Bita bəshʉ bʉə bənchəŋ mbɔ, "Kaʼ mbəŋ-aŋ, bɛ wo-Juu, kə́ chí mbi ndə wo ndə ɔ gòʼ təmə bɛ wo-Juu fɛ, a bu kwɛ̀ŋhə bʉə ndə bɔ̂ŋ gòʼ təmə bɛ bʉə-Juu fɛ ndə mə-kə́-chìi nubə ndə bʉə-Juu təka? 15 Bə nɔ bí mbəŋ-yʉʼʉ nə bʉə-Juu, kaa ndə bʉə ndə bɔ̂ŋ gòʼ təmə bɛ bʉə-Juu bə bɔŋ kə́ tíi bɔŋ nə bʉə-bʉ̂ʼʉ fɛ. 16 Bʉʼʉ bɔŋ kə́ kínə mbɔ wo kyinə bɛ ndyʉndyʉ bəshʉ-Nyii bʉʼka mbɔ ɔ tʉ́ʼ nuʼ-Nyii fɛ, bɔŋ i nɔ bɛ bʉʼka mbɔ ɔ nɔ mɔ̀ʼfyii-i ndəŋ Jiso Klai,* nɔ, mbəŋ-yʉʼʉ ghɔ nɔʼ bɛ́ŋ Klai Jiso, mbɔ bʉʼʉ chʉʼ bɛ ndyʉndyʉ bʉʼka mbɔ bʉʼʉ nɔʼ mɔ̀ʼfyiihə-ʉʼʉ ndəŋ Klai, kaa bə bʉʼka mbɔ bʉʼʉ tʉ́ʼ nuʼ-Nyii fɛ, bʉʼka mbɔ mətʉ́ʼ nuʼ mə nə chìi wo bɛ ndyʉndyʉ tʉ Nyii fɛ."

17 Bɔŋ bʉʼka ndʉʉ ndə bʉʼʉ tʉʼ kɔ̀ɔtə ndə məbɛ ndyʉndyʉ mu Klai, bə bɔŋ kə́ nyíɛ bʉʼʉ haʼ ndə bʉə-bʉ̂ʼʉ nɔ, i dʉ̀ʼ mbɔ Klai tʉʼ fɔ̀ʼ ndə məkóʼhə kwii bʉ̂ʼʉ mɛ? I mə nə bɛ nɔ fɛ! 18 Kaʼ mɔ kə́ bʉ̀nə bɔ́ fɔkə ndə mɔ nɔʼ kə kùu, i dʉ̀ʼ mbɔ mɔ nɔ lʉ̀ ŋwɔŋ-ɔŋ ndə wo ndə ɔ tʉʼ bə́ʼ nuʼ-Nyii. 19 Nɔ nə bɛ bəshʉ, mbəŋ-ɔŋ ghɔ nɔ nə kə́ chí mbi ndəŋ ntɛ ndə nuʼ kʉ̀ʉ, bɔŋ ndʉʉ ndə bə kə fyúhə mɔ ndə mbʉ nuʼ, i chìi mɔ kie ghʉəʼkə ndə məchímbi ndə ntɛ ndə Nyii kʉ̀ʉ. 20 Bə nɔʼ kə kwɛ̀ŋ baʼa Klai mɔʼɔ yi. Məchimbi-ɔ leʼbie ntɛ ndə i kə bɛ bəshʉ fɛ, mɔ nɔ tʉʼ chí mbi nduɔ bʉʼka Klai nɔ tʉʼ chí mu mɔ. Məchi-ɔ nduɔ ndə woməsʉʉ, mɔ nɔ tʉʼ chí bʉʼka mɔ mɔ̀ʼfyii-ɔ ndəŋ VaaNyii, ndə ɔ kə kʉ̀ʉ mɔ kɔ́ ŋwɔŋ-ɛŋ yie-mɔ. 21 Mɔ mə tɛ́ŋ buuŋjyu-Nyii fɛ, bʉʼka mbɔ, kaʼ wo kʉ̌ʉ kə́ bɛ ndyʉndyʉ ghɔŋ Nyii bə bʉʼka mətʉ́ʼ nuʼ, i dʉ̀ʼ mbɔ Klai nɔ kwú njʉnjʉ.