1 Oo bənɔ̌ʼɔ bʉə-Galatia! Kwó nda kwó bii nə loʼbə? Bii nɔ kə nyíɛ luu ndə Jiso Klai kə kwú bʉʼka yɔŋ ntaa, fi nə mɔ tʉʼ dʉ̀ʼ tʉ bii ndəŋ futu ndə bə kə kwɛ̀ŋ Jiso yi. 2 N̈ɔʼ mɔ bíʼtə haʼ mbyu kənu tʉ bii imɔʼ, bii kə kie LyʉʉhəNyiikə bʉʼka bii kə tʉ́ʼ nuʼ mɛ, kə bʉʼka bii kə yʉ́ ŋgieNyiikə mɔ̀ʼfyiihə-ii chɔ? 3 Bii nɔ̌ʼ ka mənɔ? Bii kə chʉ́ʉhə nə LyʉʉhəNyiikə, kə́ kʉ́ʉ mbɔ bii bɛ ŋkɛŋ-bʉə-hə bəshʉ-Nyii nə yi-yə ghʉəʼkə mɛ? 4 Le bɛ mbɔ bii kə́ nyíɛ buŋmbi ŋgʉəʼ-ɛ njʉnjʉ mɛ, kaʼ bɛ mbɔ i kə bɛ njʉnjʉ leʼ shʉəŋ?

5 Mbəŋ-ɛŋ ndə ɔ kə kɔ́ Lyʉʉhəkə-i tʉ bii bɔŋleʼ fɔ̀ʼ nufinəbə mu bii, kə bɛ bʉʼka bii kə tʉ́ʼ nuʼ mɛ, mɛ kə bʉʼka bii kə mɔ̀ʼfyiihə-ii ndəŋ nubə ndə bii kə yʉ́?

6 I nɔ bɛ haʼ ndə Ablahaŋ kə mɔ̀ʼfyii-i ndəŋ Nyii bə súu yie ɔ mbɔ ɔ la tə́nə ndyʉndyʉ tʉ Nyii. 7 B̈ii kínə le mbɔ nɔ bʉə ndə bɔ̂ŋ mɔ̀ʼfyiihə-ʉə ndəŋ Nyii ndə bɔ̂ŋ bɛ ŋkɛŋ vâa-Ablahaŋ.

8 Ŋwɔʼnə-Nyii nɔ nə núhə bəshʉ mbɔ Nyii la bu nə chìi bʉə ndə bɔ̂ŋ gòʼ təmə bɛ bʉə-Juu fɛ ndə məbɛ ndyʉndyʉ bəshʉ ɔ tíŋ hə bɔ̌ŋ məmɔʼfyiihə-ʉə ndəŋ ɔŋ, ɔ lɔ̀ʼ ntəŋjyujyu tʉ Ablahaŋ bəshʉbəshʉ kə́ ghɔ̀ŋ mbɔ, "Bʉʼka mbəŋ-aŋ, lɔʼ-bətə̂ŋ-tə inchəŋ bu kie biʼbə." 9 Nɔ bɛ haʼ nɔ, ndə bʉə ndə bɔ̂ŋ mɔ̀ʼfyiihə-ʉə ndəŋ Nyii, bu kie biʼbə ndə Nyii nɔʼ nə kɔ̀ʼnə tʉ Ablahaŋ ghɔ, wo ndə ɔ nə mɔ̀ʼfyii-i ndəŋ Nyii.

10 Bʉʼka bʉə bənchəŋ ndə bɔ̂ŋ tʉʼ tʉ́ʼ nuʼ ndə məchìi bɔ̂ŋ bɛ ndyʉndyʉ bəshʉ-Nyii, ndɔŋ-Nyii nɔ ndəŋ bɔŋ, bʉʼka bə nɔ nyɔ̀ʼ mu ŋwɔʼnə-Nyii mbɔ, "Ndɔŋ-Nyii nɔ ndəŋ wotəmiyɔŋ ndə ɔ gòʼ təmə tʉʼ nubə inchəŋ ndə bə nyɔ̀ʼ mu Ŋwɔʼnə-nuʼ bɔŋ-kə́-leʼ fɔ̀ʼ fɛ." 11 Nduɔ, i nɔ kɛŋ bɛ itʉ́ʉnə mbɔ wo mə nə bɛ ndyʉndyʉ bəshʉ-Nyii bʉʼka nuʼ fɛ, bʉʼka mbɔ, "B̃ʉə ndə bɔ̂ŋ bɛ ndyʉndyʉ tʉ Nyii, nɔ chí mbi bə nə məmɔʼfyiihə-ʉə ndəŋ Nyii." 12 Bɔŋ ndə mətʉ́ʼ nuʼ kie nukə ndə məchìi ghɔŋ mə mɔ̀ʼfyii ndəŋ Nyii fɛ, bʉʼka ŋwɔʼnə-nuʼ nɔ ghɔ̀ŋ mbɔ, "Kaʼ bɛ mbɔ a tʉ́ʼ nuʼ-Nyii ndə məchímbi, a nɔ kie ndə mətʉ́ʼ inchəŋ." 13 Klai nɔʼ chʉ̀ʼ tʉkə-ʉʼʉ hə ndəŋ ndɔŋ ndə ĩ gwè hə ndə mətʉ́ʼ nuʼ, ndʉʉ ndə ɔ kə kwú ndəŋ tyʉntɔɔnəkə, ɔ bɛ̀ʼ mbʉ ndɔŋ ndəŋ ɔŋ ndə i kə kie ndə məgwè tʉ bʉʼʉ bʉʼka mɔ̀ʼmbɛ-yʉʼʉ, bʉʼka bə nɔ nyɔ̀ʼ mu ŋwɔʼnə-Nyii mbɔ, "Ndɔŋ Nyii nɔ ndəŋ wotəmiyɔŋ ndə ɔ lʉ́ʉ kətyʉ." 14 Bʉʼka fɔ̀ʼ Klai Jiso, Nyii nɔʼ bìʼ bʉə ndə bɔ̂ŋ gòʼ təmə bɛ bʉə-Juu fɛ nə biʼkə ndə ɔ nə kɔ̀ʼnə tʉ Ablahaŋ, mbɔ bʉʼʉ chʉʼ kie LyʉʉhəNyiikə ndə ɔ nə kɔ̀ʼnə bʉʼka məmɔ̀ʼfyii ndəŋ Nyii.

15 Bəliŋ-bɔŋ, bʉʼʉ lʉ̀ fʉʼkənu ndə bʉəməsʉʉ laa, ndʉʉ ndə bʉə gwìa ŋkaamə tə nɔʼ kɔ́ʼ, wo leʼ byùutə nukə chɔ byuunɔ bìʼ fɛ. 16 Nduɔ, mbʉ ŋkɔʼnə nɔ nə bɛ tʉ Ablahaŋ ghɔŋ vaa-ɛ. I kə ghɔ̀ŋ mbɔ vâa-bi fɛ, ndə bʉə buŋmbi fɛ, i nɔ nə te mbyu wo-imɔʼ mbɔ, "Tʉ vaa-a," ndə bɛ Klai. 17 Nɔ nukə nɔ ndə mɔ tʉʼ ghɔ̀ŋ mbɔ mbʉ nuʼ ndə i kə bʉ̀nə gwè hə bɔ̌ŋ ndə ŋgʉʼhə təghyʉʉ kwi nə wuŋ tia mə leʼ byùutə ŋkaamə ndə Nyii nɔʼ kə fəŋ kɔ́ʼ, ndə məchìi mbʉ ŋkɔʼnə fyú njʉnjʉ fɛ. 18 Bʉʼka mbɔ kaʼ kɔ-Nyii-kə kʉ̌ʉ kə́ gwè bə ndə mətʉ́ʼ nuʼ təmə i leʼ bɛ ŋkɔʼnə fɛ, Nyii bɔŋ kɔ́, yɔ̀ʼ ghɔkə-i tʉ Ablahaŋ bʉʼka ŋkɔʼnə.

19 Nuʼ kie məchìi ka ndʉʉmɛ? Bə nɔ kə bìʼ nuʼ bʉʼka nu-bʉəbʉə-bə, tə ndʉʉ i kʉ̀ʼnə ndə mbʉ vaa ndə mbʉ ŋkɔʼnə nə bɛ yie-ɔ nə gwè. Nyii tə́ŋ bʉəntəŋ-bi nə mbʉ nuʼ bɔ̂ŋ kɔ́ tʉ woməsʉʉ ndə ɔ bɛ lìʼ ntuu, ɔ gwè nə yɔŋ. 20 W̃o lìʼ ntuu nɔ bɛ ndə nukə ndə i kə̀ŋ bʉə bəbûu, Nyii bɔŋ bɛ tətɛʼ ɔ. 21 Bɔŋ nuʼ-Nyii tʉʼ shʉ́nə ghɔŋbə bəŋkɔʼnə-Nyii mɛ? Shʉəŋshʉəŋ i mə bɛ nɔ fɛ! Bɔŋ kaʼ bə nɔʼ kə kɔ́ mbyu nuʼ ndə bəkɔ i kɔ́ məchímbi, ndʉʉmɛ, mətə́nə ndyʉndyʉ bii Nyii bu gwè hə ndə mətʉ́ʼ mbʉ mbyu nuʼ. 22 Bɔŋ ŋwɔʼnə-Nyii nɔ ghɔ̀ŋ mbɔ bʉə bənchəŋ nɔ bɛ fʉəhə ndə bʉ̂ʼʉ, kə mbɔ ŋkɔʼnə ndə Nyii kə kɔ̀ʼnə bu tíŋ hə bɔ̌ŋ məmɔ̀ʼfyii ndə Jiso Klai kə dʉ̀ʼ,* bə kɔ́ tʉ bʉə ndə bɔ̂ŋ mɔ̀ʼfyii ndəŋ ɔŋ.

23 Nduɔ, məmɔ̀ʼfyii ndə Jiso kə dʉ̀ʼ, nɔ nə kə̂ gwè, bə nɔʼ chìi baʼa bɛ fʉəhə ndə nuʼ, tə bə nə kə kɛ̀ʼ məmɔ̀ʼfyii tʉ baʼa. 24 Ndʉʉghɔfii, nuʼ nɔʼ kə́ kyʉ̀hə baʼa, tʉ Klai buŋ nə gwè kə mbɔ baʼa bu bɛ ndyʉndyʉ tʉ Nyii tíŋ hə bɔŋ məmɔ̀ʼfyii. 25 Bɔŋ nduɔ ndə məmɔ̀ʼfyii nɔʼ gwè nɔ, baʼa leʼ bɛ ndə məkie ŋkyʉʉhəkə fɛ. 26 Bʉʼka bii mɔ̀ʼfyiihə-ii ndəŋ Klai Jiso, bii nɔ bɛ vâa-Nyii. 27 Bʉʼka wotəmiyɔŋ ndə ɔ nɔʼ fí muu, nɔʼ fúu nuɔ ghɔŋbə Klai, nɔʼ mɔ̀ʼ məchimbi-Klai mbʉə-ɔ, ndə w̃o mɔ̀ʼ ndyi le. 28 Nɔ, wo-Juu kaa ghɔ ŋkʉʉ ndəŋ wo ndə ɔ gòʼ təmə bɛ wo-Juu fɛ, fʉə bɛ ghɔ ŋkʉʉ ndəŋ wo ndə ɔ gòʼ təmə bɛ fʉə fɛ, təmə woləŋ kə bɛ ghɔ ŋkʉʉ ndəŋ woke fɛ, bʉʼka bii nɔ bɛ fɔkə imɔʼ mu Klai Jiso. 29 Kaʼ bii bɛ tʉ Klai, təmə bii nɔ bɛ ŋgwie-wo-Ablahaŋ, njuhə te ŋkɔʼnə ndə bə kə kɔ̀ʼnə tʉ Ablahaŋ.