1 Bɔŋ mbəŋ-aŋ nɔ kie ndə mədàhə nubə ndə i tòʼ ghɔŋbə nu-dàhə-bə ndə i kʉ̀ʼnə. 2 Tʉ́ʼ bələŋ ghəŋ mbɔ b̈ɔ̂ŋ kə́ yá ŋwɔŋtə-ʉə, b̈ɔ̂ŋ kə́ chìi nubə ndə i bu gwè nə kuŋhə tʉ bɔŋ, kə́ fɔ̀ʼ nubə nə ndaahə-ʉə. B̈ɔ̂ŋ kə́ mɔ̀ʼfyiihə-ʉə ndəŋ Nyii jyujyu, kie ŋkɛŋ ŋkʉ̂ʉ bɔŋleʼ lyʉ̀ʉtə́nə shʉ́əshʉ́ə ndə ntɛ ndə i kʉ̀ʼnə.

3 Dàhə bəke ghəŋ ndə mə-kə́-chimbi ndəŋ ntɛ ndə ĩ kɔ́ kuŋhə tʉ Nyii, kə bɔ̂ŋ mə bɛ bʉə ndə bɔ̂ŋ tʉʼ bʉ́əhə yie-bʉə-tə fɛ, byuunɔ bɛ fʉəhə ndə ndʉʼbuumə fɛ. Bɔ̂ŋ nɔ kie ndə mə-kə́-dàhə nubə ndə i bɛ jyujyu, 4 bɔŋleʼ kə́ dàhə vâabəke kəyɔwo ndə məkʉ̀ʉ bələŋ-bʉə ghɔŋbə vâa-bʉə. 5 B̈ɔ̂ŋ bɔŋleʼ bɛ ndəŋ ndaahə-ʉə, bɛ tʉ́ʉnə, kə́ fɔ̀ʼ chunjaa, kə́ fɔ̀ʼ nu-jyujyu-bə, ké ŋwɔŋtə-ʉə tʉ bələŋ-bʉə bʉʼka bʉə mə-kə́-kwə́ʼ bʉəbʉə te ŋgieNyiikə.

6 Bɔŋleʼ kwèʼhə vâakəyɔwo ghɔ ndə mə-kə́-ya ŋwɔŋtə-ʉə. 7 A nɔ kie ndə məbɛ fʉʼkənu ndə fɔʼ-jyujyu-tə. A nɔ kie ndə mə-kə́-dʉ̀ʼ shʉəŋ-aŋ ndə nubə ndə a tʉʼ dàhə bɔŋleʼ kie mə bɛ wo ndə bə tʉʼ kɔ́ kuŋhə tʉ ɔŋ, 8 kə́ kwə́ʼ ŋgiebə ndə i bɛ kʉ̀ʼnə ndə wo mə kie nukə ndə məmɔ́ aŋ chɔ fɛ, mbɔ bʉə-bàa-ba chʉʼ kie tʉvyiikə bʉʼka bɔ̂ŋ kie nukə ndə məgìe te bʉʼʉ fɛ.

9 Fʉəhə nɔ kie ndə məké ŋwɔŋtə-ʉə tʉ bətiefɔʼɔ-bʉə ndə nubə inchəŋ, kə́ kɔ́ tʉʉjyu tʉ bɔŋ ndə nubə inchəŋ, təmə kə́ túŋ bəŋʉʉ fɛ, 10 byuunɔ kə́ lʉ́ʼ bɔŋ fɛ. Bɔŋ bɔ̂ŋ nɔ kie ndə mə-kə́-dʉ̀ʼ mbɔ bɔ̂ŋ nɔ bɛ bʉə jyujyu bɔŋleʼ bɛ bʉə-kəŋgie-shʉəŋ, i chʉʼ chìi b̈ʉə nyíɛ nubə ndə bə tʉʼ dàhə te Nyii Ŋkwaa-yʉʼʉ i bɛ jyujyu.

11 Bʉʼka Nyii nɔʼ dʉ̀ʼ buuŋjyu-i ndə ĩ gwè nə ŋkwaa tʉ bʉə bənchəŋ, 12 kə́ dàhə bʉʼʉ ndə məfyúhə ŋwɔŋtə-ʉʼʉ ndə nubə ndə i gòʼ təmə kə́ kɔ́ kuŋhə tʉ Nyii fɛ ghɔŋbə ntɔ-kəwʉʉnəmbi-mə. Ɔ bɔŋ-kə́-leʼ dàhə bʉʼʉ mbɔ b̈ʉʼʉ kə́ chìi nubə nə ndaahə-ʉʼʉ, kə́ chí mbi ndyʉndyʉ bɔŋ-kə́-leʼ kɔ́ kuŋhə tʉ Nyii ndə mbi-ɔ̄ laa nɔ. 13 Ndə bʉʼʉ tʉʼ chyìi chîmbi-ghɔ̄-kə ndə bʉʼʉ yʉ́əʼnə ndə ghɔ nə tʉʉjyu, chîkə ndə Jiso Klai fɔŋ Nyii-yʉʼʉ ndə ɔ bɛ Ŋkwaa-yʉʼʉ bu yi kɛ̀ʼ ŋwɔŋ-ɛŋ chɔ mu məgʉə-e. 14 Ɔ nɔ kɔ́ ŋwɔŋ-ɛŋ yie-bʉʼʉ ndə məchʉ̀ʼ tʉkə-ʉʼʉ ndəŋ ntɛ-bənu-bʉəbʉə-hə inchəŋ bɔŋleʼ sʉ̀ bʉʼʉ, b̈ʉʼʉ bɛ bʉə ndə bʉʼʉ bɛ tʉ ɔŋ tətɛʼ ɔ, kə́ kie jyʉʉ ndə məfɔ̀ʼ nu-jyujyu-bə.

15 Dàhə nubə-ɔ̄ŋ bɔŋleʼ lʉ̀ ghʉəʼkə-a inchəŋ ndə məkwèʼhə bɔŋ bɔŋleʼ sɔ́ʼ bʉə ndə bɔ̂ŋ tʉʼ yʉ́ kəghɔ-a. Kə a mə mɛ̀ʼtə wo kə́ lɛ́nə aŋ ndə vaambuɔ fɛ.