Tito 3

Nuʼ-bəKʉlʉtɛŋ

1 Kwɛ́nə tʉ mbʉ bʉə ndə məké ŋwɔŋtə-ʉə tʉ bʉə ndə bɔ̂ŋ tʉʼ sɔ́ʼ bɔŋ ghɔŋbə bʉə ndə bɔ̂ŋ kie ghʉəʼkə ndə məsɔ́ʼ bɔŋ ndə məyʉ́ chu-yʉə, shʉ̀tə ŋwɔŋtə-ʉə ndə fɔʼ-jyujyu-tə təmiyɔŋ. 2 Shyíi bɔŋ mbɔ wo mə-kə́-gìe nu-bʉəbʉə-bə kətʉ ibɛʼ-yə wo fɛ, bìa məmɔ̀ʼ chyuutə, kə́ chʉ́əʼtə tʉ bʉə bɔŋleʼ kə́ kwə́ʼ ŋkɛŋ bəŋgie búɔnə tʉ bʉə bənchəŋ. 3 Bʉʼka bʉʼʉ nə mbəŋtə-ʉʼʉ, nɔ nə fəŋ bɛ bənɔ̌ʼɔ, kə́ kwɛ̀ŋhə. Bə nɔ kə́ fə́ʼhə bʉʼʉ, bʉʼʉ bɔŋleʼ kə́ bɛ fʉəhə ndəŋ ntɛ-məntɔ-hə ghɔŋbə məyú mbi. Məchimbi-yʉʼʉ kə́ bɛ ilə́ŋnə nə bʉ̂ʼʉ leʼnə məbàabʉʉ bəbɛʼbʉə, bəbɛʼbʉə kə́ bàa bʉʼʉ, bʉʼʉ bɔŋleʼ bàanə ŋwɔŋtə-ʉʼʉ. 4 Bɔŋ ndʉʉ ndə nuʼ jyujyu Nyii Ŋkwaa-yʉʼʉ ghɔŋbə ŋkʉ̂ʉ-i kə kɛ̀ʼnə, 5 ɔ kwáa bʉʼʉ. Kə bɛ bə bʉʼka fɔ̀ʼ ndə bʉʼʉ kə fɔ̀ʼ ndə məbɛ ndyʉndyʉ tʉ Nyii ndə i kə chìi ɔ̈ kwáa bʉʼʉ fɛ, bɔŋ nɔ kə bɛ bʉʼka tʉvyiikə-i ndə ɔ dʉ̀ʼ tʉ bʉʼʉ. Ɔ kwáa bʉʼʉ tíŋ hə bɔ̌ŋ LyʉʉhəNyiikə ndə ɔ kə sʉ̀ bʉʼʉ ndə mə-bʉ̀nə-bìʼ-bí bʉʼʉ bɔŋleʼ kɔ́ məchímbi fefe tʉ bʉʼʉ. 6 Nyii nɔʼ véʼ Lyʉʉhəkə-i ndəŋ bʉʼʉ yɔ́ŋyɔ́ŋ tíŋ hə bɔ̌ŋ Jiso Klai ndə ɔ bɛ Ŋkwaa-yʉʼʉ, 7 mbɔ tíŋ hə bɔ̌ŋ buuŋjyu-i, ɔ chʉʼ chìi b̈ʉʼʉ bɛ ndyʉndyʉ tʉ Nyii, bɔŋleʼ kie məchímbi təmə liʼ-i ghɔ fɛ, haʼ ndə bʉʼʉ kə yʉ́əʼnə ndəŋ ghɔ kə́ lɛ́nə fia. 8 Yɔ̄ŋ-yə nɔ bɛ ŋgie-shʉəŋ-kə nɔ ndə bəkɔ bə mɔ̀ʼfyii ndəŋ ghɔ. Mɔ nɔ tʉʼ kʉ́ʉ mbɔ ä kɛŋ kwàatə nubə-ɔ̄ŋ jyujyu mbɔ bʉə ndə bɔ̂ŋ bɛ́ŋ Nyii chʉʼ kɔ́ ŋwɔŋtə-ʉə ndə mə-kə́-fɔ̀ʼ nu-jyujyu-bə. Nubə-ɔ̄ŋ nɔ bʉ̀ʉ bɔŋleʼ kwáa tʉ bʉə bənchəŋ.

9 Bìa mətúŋ bəŋʉʉ bənɔ̌ʼɔ, bìa mə-kə́-súu bʉə-kəlɔŋ, bìa ŋkʉʉŋkʉʉ mu bʉə bɔŋleʼ bìa mə-kə́-mɔ̀ʼ chyuutə te nuʼ, bʉʼka i mə lɔ̀ʼ wo nə nubɛʼkə fɛ, təmə bɔŋ-mə-leʼ kwáa wo fɛ. 10 Shyùu tyunə-wo-kə ndə ɔ tʉʼ gwè nə ŋkʉʉŋkʉʉ vɛʼ mɔʼ byuunɔ vɛʼ bûu yɔ̀ʼ ghɔkə-a ndəŋ ɔŋ, 11 kə́ kínə mbɔ ntɛ wo-maa-ɔ̄ŋ nɔʼ shìe liɛŋ-ɛŋ ndəŋ shʉəŋ, nɔʼ chìi bʉ̂ʼʉ. Nu-bʉəbʉə-bə ndə ɔ tʉʼ fɔ̀ʼ nɔ dʉ̀ʼ mbɔ ɔ nɔʼ gwù fɛʼɛ.

Ndyiʼtə-kwə́ʼ-Bɔɔ-kə leʼnə nchaʼtə

12 Ndʉʉ ndə mɔ bu tə́ŋ Atema byuunɔ Taikiku tʉ a nɔ, kɔ̀ɔtə shʉ́əshʉ́ə ndə məgwè nyíɛ mɔ Nikoboli, bʉʼka mbɔ mɔ nɔʼ lìʼ mu fyii-mɔ mbɔ mɔ bu chí chɔ mu shyʉʉ-fəʼə. 13 Kɔ̀ɔtə shʉ́əshʉ́ə ndə məkwáa Sina ndə ɔ bɛ w̃o ndə ɔ kwɛ̀ chu bʉə mu njaafɛ̀ʼ leʼnə Abolo, ndə məlɔ̀ hə sê ndəŋ fia mətòʼ-yʉə bɔŋleʼ nyíɛ mbɔ bɔ̂ŋ mə byúu fɔkə fɛ. 14 B̈ʉə-bʉʼʉ yétə ndə məkɔ́ ŋwɔŋ-yʉə ndə mə-kə́-fɔ̀ʼ nu-jyujyu-bə mbɔ bɔ̂ŋ chʉʼ kə́ kwáa bʉə nəndʉʉnəndʉʉ ndə bɔ̂ŋ tʉʼ byúu fɔbə ndə məchìi nubə chɔ bʉʼka məchimbi-yʉə mə bɛ mbunə.

15 Bʉə bənchəŋ ndə baʼa bɔŋ bɛ mɔʼɔ fɛ̄ŋ nɔ tə́ŋ nchaʼtə tʉ a. Gìe tʉ bʉə ndə bɔ̂ŋ kʉ̀ʉ baʼa ndə bɔ̂ŋ mɔ̀ʼfyiihə-ʉə ndəŋ Nyii.

N̈yii dʉ̀ʼ buuŋjyu tʉ bii bənchəŋ.