1 Sak na bashɔn nate yin, in tsin ra awon ni yin tɛ ashɔn kpaf ti iyin, Imi ice hom in yet ashon ti iyin. Imi yet afi icɛɛt naton mgbang fi in di Anet-Isheshek sɔ, nɛ ayɔng fɛ́ a bi sɛ kanu kafuu ni iratek fi i bi bɛ́: 2 Sot yin bafi tot banet Adakunom fɛ ba se ni bɔk yin, tɛ bafi iyɛrɛ itsamang, da tɛ ba ki te yin mo inɛn awo. Tit nek iyet ishim yin, kyɔn tɛ Adakunom di shim ni i sot yin; da bafi nhwyɛ itsɔm awo, tit nek iyɛ ingash ira kutomong, 3 i bi tsɛt yin iratek ni itek azaton bayɔng fɛ́ ba nabak ni bɔk yin awo, tit sot yin ikyɛng imɛɛs na banet e. 4 Wat ni izen fɛ́ agbat anek e bi bɛ́s wu, i bi shan yin abong ízɔk fɛ́ da a te tɔlɔt awo.

5 Bacam, kpaf anɔng bà, nabasa yin ace yin sak na bako ni iyin. Ngma yin, te yin ace yin ni imen nhwyɛ sak na bafidang, nek,

<<Adakunom rawu

bafi ikok ice,

awɛt na nesek bafi

imen ice itek wu.>>

6 Nek anɔng, men yin ace yin, ni kukyem ibɔk Adakunom, nɔng a bi ki sok yin garang ni izen fi iwu di gyat. 7 Nabasa yin ndaam yin sak ni wu, nek iwu ki berese yin.

8 Yit yin ace yin, ni kana nye yin. Anet ifa yin aShetan tsin kat kaakɛ te akukum na tsɛsɛk anet fɛ́ a da ku ngɔɔt. 9 Ku rayin, nyeseng yin gak ni inɔɔk atsak yin, nek iyin rēn yin fok, bafidin ngma azatse se ni isɔ mgbang nzining e anɔng bà.

10 Adakunom fɛ́ a nesek kaakyi itek, fɛ́ a ki yes yin sak i sɛ iratek wu vit igang ayɛt aKristi Yeso, ama fi i mi sɔ yin mgbang nfi kizen gyet, a da tɛ a ki shining yin, na ki te yin agap, a da ki tup yin gak nɛ ki gbinding yin. 11 Agap yet afuu ayɛ na ayɛ. Anɔng.

12 Ni igbingding aSilvanus, fi in ku fa tɛ aruneng atsak, in ki jɛk yin e gyegyet, nek in ki gbinding yin, ni in ki tak yin fok, itek Adakunom fi in di nyeseng yit, iyet atsak. Nyeseng gak ni de. 13 Bayɔng fɛ́ ba se na aBabila, fɛ́ ba ka ba kasa gung ni iyin, ki te show yin nɛ arim hom aMarkus. 14 Nye show yin bafidang ni ishim ni irèn ashow bafi ikuus Anet-Isheshek. Won kusot kukyang ni kusot ni yin ngma fi i se yin na Kristi.