1 Ni gang e, ábaruneng, in tsin ki nɔɔk yin itabak irèn fi i da nye yin kusot fi ku da tɛrɛk Adakunom iyɛ, kyɔn ti kusot fi i se yin ne. Yɔkɔnɔng in fɛ̀ ni yin, in tsin ki tak yin ni yerek aTisa yit aYeso ni i ya yin kashon na anɔng. 2 Iyin rēn yin itabak fi in man ki nɔk yin ne na aTisa yit aYeso.

3 Ayet ishim Adakunom fok ni se yin cɛ́l, fok ni teng yin kujang; 4 fok kaangan yin na a tekap kurɔm wu ni irèn fi i se jɛrɛ fɛ́ Adakunom shim, 5 da i bi won yin kurɔm ki kɔk yin ti Ícɛn-iduk fɛ́ da ba rēn Adakunom awo; 6 azaton ifɛ̀ deng, won akak bi beseng kɛ na mɔɔt arunyining awo. Adakunom bi tabak ngma banet fɛ́ ba nyes kuri anɛn nang, kyɔn ti in kin di fɛ̀ yit ni yin, in ki kɔrɔk yin kuto. 7 Nek Adakunom ki yes yit ni nyes yit nggɔn nsum awo tit sak ni kusot ku jɛrɛ me. 8 Nek anɔng, ngma ayɔng fɛ́ a rawu itabak yeng, a rawu itabak anet awe awo tit ifɛ́ Adakunom, iwu fɛ́ a ki nɔk yin Kabik aJɛrɛ wu.

9 Naton ishim bafidiin, da ma in ti in jɛk yin ne awo, nek iyin ice yin mi sɛ yin itees Adakunom. 10 Atsak e yet, iyin tsin tonoso yin ishim sak na barunyining fɛ́ ba se kaakɛ na aMasedoniya. Ngma na anɔng, in tsin bang ki tak yin fok ni ya yin kashon na anɔng ábaruneng.

11 Won nggɔn yin ni in sot nfi nhwyɛ, sak nhwyɛ ni ira ikyɛng ibɔk ngɔn, ra kutomong ni mbɔk ngɔn, kyɔn ti fi in kin di fɛ̀ ni yin, 12 nɔng kusot atut na katson yin ni ku yet ikyɛng itere na ba fɛ̀ amatse, kɔn i bi sot yin kunanang na bakak awo.

13 Ábaruneng, iyit shim ni sot yin vit irēn azaton bayɔng fɛ́ ba mi men nda awo, ki ni nye yin kafa kawe ti ishɛrɛp banet fɛ́ ba se vit ite iyɛ awo. 14 Iyit nɔɔk yit atsak fok aYeso ku a tɛ dorok na anɔng in bɛ̀ yit atsak fok Adakunom bi bɛ́ na bayɔng fɛ́ ba se ni nda gung na aYeso. 15 Kpaf ti ifɛ̀ aTisa, won in ki tak yin, iyit fi in se yit ni kutset, fi in bi resek yit sak izen kubɛ́ aTisa, ko ni kuro, in bi ya yit kashon bayɔng fɛ́ ba mi men nda awo. 16 Nek aTisa ice wu, bi ne azanɛn, ni kukun ku gbɛrɛy, ni kutɔ agbat atomaza ni kugba Adakunom, bayɔng fɛ́ ba ku ayɛt Anet-Isheshek bi tin dorok. 17 Ama anɔng, iyit fi in se ni kutset, fi in resek yit, ba bi ki sok yit gung ni ba sak ayɛt anɔk ni in nyim yit na aTisa naton aza. Na anɔng, in bi sot yit gung na aTisa ayɛ na ayɛ. 18 Nek anɔng, nye gbinding yin bafidang ni ifɛ̀ deng.