1 Kufumung kang ne ni imi aBulus, atom aYeso Kristi ni kushim Adakunom. Kpaf ni kushi isɛs kutset fi ku nes na Anet-Isheshek aYeso.

2 Sak na ari min aTimoti fin shim, won itek nɛ angmishish nɛ imen iyɛ fɛ́ a nes na Ada Adakunom nɛ Kristi aYeso aTisa yit na a sot ni ngɔn.

3 In feng Adakunom fi in tsin ku ra mo kutomong ni iyɛ izining, kyɔn tɛ badakop hom kin ra. In yiring ni ngɔn kaaki izen kunom nɛ katuk ayɛt awon hom. 4 Ki in yiring na nayisi ngɔn, na di se kin in mi da di, nɔng ifeng hom da shining. 5 Ba mi di yiring na atitup inɔɔk atsak ngɔn, ayɔng fɛ́ a kin tun ne ni nggɔkɔp ngɔn aLowis, ni nggɔ ngɔn aYunis, fi in bi nɔɔk atsak fok a se ayɛt ngɔn bá. 6 Nek anɔng, in tsin da yiring e, fok ni fesem kunang fɛ́ Adakunom mi da nɔɔk, ma ku ta kurong, fi ngɔn mi se ni izen fi in di sak mbɔk hom ni ngɔn. 7 Nek Adakunom ki nɔɔk yit kabik nnyim awo, tit kabik agap, ni ishim, ni iyit ice.

8 Nek anɔng, i bi fok nsum icɛɛt naton aTisa yit awo, ke ni fok nsum icɛɛt naton hom afi inyang nek iwu awo. Tit moon ice ni imi ayɛt mgbang nek ishara ifɛ̀ itek, ayɛt agap fɛ́ a nes na Adakunom. 9 Iwu fɛ́ a ki sheshek yit, a ki yes yit sak ni kusot ajɛrɛ, da nek ikyikak itek fi in nye yit awo, tit nek inye wu, ni itek wu. Ba ki nɔk yit itek e deng na Anet-Isheshek aYeso neme ni itumung izen. 10 Awɛt yɔkɔnɔng, ba mi ki tonong yit ide ni kubɛ́ Anet-Isheshek yit aYeso Kristi, iwu fɛ́ a mi fɛlɛ iku, a mi bɛ ni kutset nɛ avit iku wɛshɛk ayɛt ifɛ̀ itek. 11 A yet nek Ifɛ̀ itek e me deng wu fɛ́ ba di kasa mo mok ni in sot anet itom nɛ atom aYeso nɛ anet itees. 12 Nek anɔng wu in tsin sɔ izot yɔkɔnɔng. Ngma na anɔng, in tsin fok nsum awo, nek imi rēn ayɔng fi in di nɔɔk atsak, in rēn ayɛt iyɛ hom fok iwu kyɛm na a tekap ikyɛng fi imi nabak ni bɔk wu sak ni kunom e yɔng.

13 Ikyɛng fi ngɔn mi fok ni mi, won ni i sot itees atsak ni ngɔn, gung na atsak ni ishim fi i se ayɛt Anet-Isheshek aYeso. 14 Bereng ikyɛng itek fɛ́ ba mi ituus ayɛt iyɛ ngɔn fɛ́ ba mi da nabak e, bereng iye ayɛt igbingding Kabik aJɛrɛ fɛ́ ka se ayɛt yit.

15 Ngɔn rēn fok, kaangan ni mben Asiya mi di wobok, ngma na ba aFayijelus, nɛ aHamojenis.

16 Won Adakunom na a tonong angmishish sak na bafɛ́ ari aOnesiforus, nek a di na di sɛs mo izen izen, a fok nsum inyang hom awo. 17 Aza anɔng, ni izen fɛ́ a bɛ na aRoma, a bɔrɔng i di tsɛt, ma a di sɛ ninyɛn. 18 Won Adakunom na a sak na a sɛ angmishish aTisa atuk e yɔng! Ngɔn rēn tsɛngtsɛng irèn dot fi in mi sɛs igbingding ni wu ni imi mo na Afisa.