1 Won ngma bayɔng fɛ́ ba se nawop isam na ba nesek batek ari bà iratek, kɔng iyerek Adakunom ni itees yit da sɛ ibeseng. 2 Bayɔng fɛ́ batek ari bá yet bafi ikuus, ba bi ka ba byɛs fok nek ba yet bafi ikuus awo. Idung se yɛɛt na ba ka nye ikyɛng itek ningya, nek bayɔng fɛ́ ba tsin ya itek kutomong bá yet bafi ikuus, baruneng bá. Nkyɔrɔk nang fi i da ka ba tees ni ka ba tabak mo.

3 Ke akak tees itees mbɔɔs na rawu dang shan itees atsak ifɛ́ aTisa yit aYeso Kristi ni itees irèn ikuus yit, 4 anet e yɔng bi ikok ice, a rēn ikikak awo. A bɛ̀ nggɔn nmaane nfi itsɛt nanan, ni ishesheng ncɛɛt. Kuri nggɔn yɔng na fi in bes ni ifup, ni ifa ni itok ni ncɛɛt nmaane, 5 iwoso kɔk nanan na bayɔng ba bɛ kuyiring abap, nek atsak mi ka ba won. Banet kuri bayɔng di tɛ ikuus Adakunom yet irèn i sɛ kurúm.

6 Awɛt ikuus Adakunom ni imen iyɛ ni ikyɛng fi i bɛ́ yet kurúm gyet awo. 7 Nek in bɛ́ yit azatse ni mbɔk nkoot, vit ikyɛng fi in da tseng yit ne. 8 Awɛt ki in bɛ̀ yit nayak nɛ ares, won ayɛ yit ni imen na anɔng. 9 Banet fɛ́ ba tsɛsɛk ite kurúm, bá kpas ayɛt imara ne ayɛt agunung, ni iras ishɔp ni ikɔk iras nkyɔrɔk fi in tes banet beseng na ba wey. 10 Nek ishim itsɔm yet itsiip akaakyɛ ikyɛng imaan e. Bakak nek ishim kurúm, ba mi won irèn atsak, ba mi kɔrɔk ace bá kafa kawe makiyi.

11 Awɛt ngɔn, anet Adakunom, teng ngɔn nkyɔrɔk yɔng ngma, di kuus kusot kutabat, ni nggɔn fɛ́ Adakunom shim, ni inɔɔk atsak, ni i shim, ni inye gbingding, ni nhwyɛ. 12 Won kuren ngɔn ni ku yet kuren kutek kufi ibereng atsak. Tekap kutset fi ku se vit igang yɔng fɛ́ ba kin da yes mo ayɛt ko ni izen fi ngɔn kin nye kucɛɛt kutek ashon banet dot. 13 In tsin cɛɛt ni ngɔn ashon Adakunom fɛ́ a nesek kaakyi ikyɛng kutset, nɛ ashon Anet-Isheshek aYeso, ayɔng fi ni izen fɛ́ a kin nɔɔk kanu icɛɛt ashon aBilatus aPontiyus, a kin nye kucɛɛt kutek. 14 Bereng ifɛ̀ deng vit karìk ki ikyɛng icɛɛt awo sak izen fɛ́ aTisa yit aYeso Kristi bi di bɛ́s wu. 15 Adakunom bi bɛ́ ni wu, na kpaf izen fi iwu mi sak, atek awɛng nɛ azizɛɛt agwɔm, agwɔm bágwɔm nɛ aTisa bátisa. 16 Iwu kyɛk fɛ́ da a ku awo, fɛ́ a se ayɛt mgbey fɛ́ vit ayɔng fɛ́ a kyɛm bɛ bakat ni ina, fɛ́ vit ayɔng fɛ́ a mang di ke a kyem a di awo. Won ba ku nesek iratek nɛ agap ayɛ na ayɛ. Anɔng.

17 Fɛ ne bayɔng fɛ́ ba bɛ kurúm azatse kang, da ba bi kok ice ba awo ke na ba te iyɛ ni kurúm fɛ́ anet kyem a di sak iyɛ awo, tit na ba te iyɛ bá na Adakunom, iwu fɛ́ a ki nesek yit shɛrɛk kaakyɛ fi in shim yit. 18 Fɛ ni iba, na ba ras itek, kurum ba ni ku yet kufi iras ntomong ntek, na ba sot ni mbɔk washak, na ba di sɛs bakak. 19 Ayɛt anɔng wu fɛ́ ba di ki tusung ace bá kurúm, ni ita itis agap ni kuzam fi ku bi bɛ́, na anɔng wu fɛ́ ba bi sɛ kutset fi ku yet atitup kutset.

20 ATimoti, bereng ikyɛng fɛ́ ba mi won ni bɔk ngɔn gyat. Fam ato ngɔn ni ifoos ncɛɛt abap, nɛ nanan abap fɛ́ ba di boroso banet fok irēn, 21 fɛ́ bakak mi shan iye, na anɔng wu inɔɔk atsak bá teng i di tirisi.

Won itek Adakunom ni i sɛ gung ni ngɔn.