1 Kabik Adakunom mi tak wɛshɛk fok ni izen igang azatse bakak bi wosong inɔɔk atsak ba nfi ikuus ne ba nɔɔk nhwyɛ ba sak na naban nabik na fi mbɔɔs ni itees mbɔɔs nfi itséng. 2 Kuri itees iyeng nes ne bafɛ́ nanu nafifa bafi itees mbɔɔs, fɛ́ ayɛ ba mi kus, tɛ ba shosh ni kutsɔm fɛ́ ba tun iko ni irong. 3 Kuri banet e ban ba ro banet ni ira kuweneng ni iya nayak nakak. Adakunom wu fɛ́ a nye ngma kuyak nek bayɔng fɛ́ ba nɔɔk atsak, ba tɛ ba irēn atsak e, ne ba shan ina ni ifeng. 4 Nek kaakyi ikyɛng fɛ́ Adakunom nye ise yɛɛt, da na ba raye ikyikak awo, ki ba mi tsang shan iye ni ifeng, 5 nek ifɛ̀ Adakunom nɛ awon mi sak ide i sot jɛrɛ.

6 Ki i itees barunyining nkyɔrɔk nang, i da sot anet itomong Anet-Isheshek aYeso atek, ayɔng fɛ́ a sɛ itees atsak ifi nɔɔk atsak, ni itees itek fi ngɔn tsin di kuus. 7 I bi won ikikak da moon ni nkyɛng-ashon ashon abap ni ncɛɛt ányáko awo, tit tees ice ngɔn kusot nggɔn Adakunom. 8 Nek itiri kurɔm bɛ itek de gyeet, awɛt kusot fɛ́ Adakunom shim bi itek ni nkyɔrɔk ngma, ku bes ni itek ni kuzam ku kang ni kuyɔng fi ku bi bɛ.

9 Ifɛ̀ de yet atsak, fi i se yɛɛt ni in shan ni iyɛ izining, 10 (nek ide fi in di ngu yit ice ni di bɔrɔng yit), nek in mi te yit iyɛ na Adakunom atset, iwu fɛ́ a yet Anet-Isheshek banet ngma, amak e bayɔng fɛ́ ba nɔɔk atsak.

11 Ka ba tas ni ka ba tees nkyɔrɔk nang. 12 I bi won akak na da byɛs nek i yet acam awo, tit sot ikyɛng fɛ́ banet ikuus da mɛɛs ayɛt icɛɛt ngɔn, ni kusot ngɔn, ayɛt ishim, ayɛt inɔɔk atsak ni kusot kucɛ́l. 13 Ni tsin di tot kubɛ́ hom, nabak ice ngɔn ni ifaa banet kufumung ajɛrɛ, ni ishara ifɛ̀ itek ni itees banet. 14 I bi rɔrɔ ni kunang ngɔn awo, fi i kin sɛ iko ni itak abes ni izen fɛ́ bashɔn bafi ikuus kin di sak mbɔk naton ngɔn.

15 Te nhwyɛ ngɔn ni nkyɔrɔk nang; nabak ice ngɔn kusum ni na, nɔng kaangan da di iya kashon ngɔn. 16 Nye yɛɛt ni ice ngɔn ni itees ngɔn. Te nyɛk ni ira na, nek ki i nye nɔng, i da sheshek ice ngɔn nɛ bafi ifoos ngɔn.