1 Nek anɔng, ba mi ki donong yin gung nɛ Anet-Isheshek, nabak yin áyɛ yin ni nkyɔrɔk fi in se azanɛn, karɔ fɛ́ Anet-Isheshek di sonong ni bɔk iyak Adakunom. 2 Te yin àyɛ yin ni nkyɔrɔk fi in se naton, da nkyɔrɔk azatse awo. 3 Nek ikus yin, kutset yin se ni inɛt ayɛt aKristi, ayɛt Adakunom. 4 Anet-Isheshek wu a yet kutset yin ku fɛ́ atsak, izen fɛ́ a bi bɛ, i bi bɛ yin gung ni wu ayɛt ízɔk wu.

5 Nek anɔng, tun yin nggɔn nzen nfɛ́ azatse ayɛt ayɛ yin, nkyɔrɔk tɛ: kutomong irɔs, nɛ iras nkyɔrɔk imaan e, ni kujang, nɛ aduk nggɔn, nɛ ishim ice, anɔng yet iya nabannom ntong. 6 Nek kuri aduk nggɔn e nang wu fɛ́ naman Adakunom bi di tik naton bayɔng fɛ́ ba raba dang fok Adakunom. 7 Iyin tsang tsees yin anɔng, ni nggɔn fi i tsang di se yin. 8 Awɛt yɔkɔnɔng, i se gbingbing ni i won yin nanan, ni iyɛ ife, ni iberese yin banet ni iyɛ, ni itok, ni ncɛɛt abap. 9 I bi ras yin bafidang mbɔɔs awo, nek imang tun yin nggɔn yɔng fi nse izen, 10 nek iyin mi sok yin nggɔn nfas.

Adakunom wu fɛ́ a nye nggɔn nfas e nang fi in se ayɛt yin, a da ya kashon ni nye anɔng, nɔng i da bin sot yin ba fas, i di sok yin nse ayɔng fɛ́ a ki nye yin. 11 Nek anɔng, i bi won yin ikyikak ni ki kam yin awo, iyin fi ibɛ yin nggɔn nfas e. Kɛ ni yet yin baYahuda kɛ ni yet yin BaGirik ayi, kɛ ba mi ki ya yin katse kɛ vit iya katse, kuzɛɛt di se na anet i bi irēn na anet ayit awo, kuzɛɛt di se na asam ke nggon ari awo, Anet-Isheshek wu a yet kaakyɛ, ayɛt akaakyi ikyɛng.

12 Nek anɔng, tɛ bayɔng fɛ́ Adakunom mi myak, fɛ́ ba se jɛrɛ, fi iwu ka ba shim makiyi, sot yin bafi nggɔn amushish, bafi itek, ni nhwyɛ, bafi imen ice, nɛ akabɔk. 13 Nye yin akabɔk na bafidang. Fuut yin bafidang anɛn fɛ́ ba ki nye yin e, kyon tɛ aTisa ki fuut yin ne, anɔng wu fi i da fuut yin bafidang anɛn ba ba. 14 Ayɛt nkyɔrɔk nang ngma, sok yin ishim aza akaakyɛ, iye fi itoos ishɛrɛp e gyat ngma.

15 Won kukyang fi ku nes ne Anet-Isheshek ni ku sot na áyɛ yin, nek ti nkap kurɔm kuzining, ba ki yes yin ni kusot kukyang. Nesek yin ifeng. 16 Won ifɛ̀ Anet-Isheshek di nak ayɛt ayɛ yin makiyi, ni tees ni itabak yin banet ayɛt kutsitsɛng Adakunom. Ras yin Adakunom abom itere, nɛ abom ice, nɛ abom fɛ́ a nes nabik Adakunom, ni itonoso yin ifeng yin na Adakunom itɛrɛk iyɛ yin. 17 Ayɛt kaakyɛ fi i da fɛ̀ yin ke i da nye yin ayi, nye yin kaakyɛ ni iyerek aTisa aYeso, nesek ifeng sak na Ada Adakunom ayit iyerek aYeso.

18 Banyining, nɔɔk yin ice yin sak na batek yin, nek anɔng e se gyat anu shon aTisa.

19 Batek, shim yin banyining yin, i bi ka ba zot yin awo.

20 Nnon, fok yin ifɛ̀ bada ni binggɔ yin na akaakyɛ, nek anɔng e tɛrɛk aTisa iyɛ.

21 Bada, i bi beseng yin nnon yin iyɛ awo. Nek ki i nye yin anɔng, i da ka ba but yin nkap.

22 Basam, fok yin ifɛ̀ bátékari yin bafɛ́ azatse kang ayɛt kaakyi ikyɛng. I bi ra yin kutomong iyere ayisi tɛ bayɔng fɛ́ ba tsin tsɛt itere banet awo. Nek anɔng, ra yin kutomong yin ni iyɛ izining ayɛt atsak, tɛ bayɔng fɛ́ ba foos nnyim Adakunom. 23 Na akaakyɛ fi i da ra yin, nye yin ide ni iyɛ izining, kyɔn ti i tsin ra yin Adakunom me, da anet awe awo. 24 Rēn yin fok, Adakunom wu a bi ki nɔɔk yin izang yin azanɛn. Nek aTisa aKristi wu i tsin ku ra yin kutomong. 25 Anet fɛ́ a ras kutomong anyas, a bi shan izang kutomong anyas wu, nek vit ishim ice.