1 I yet nek kusot awashak ko fɛ́ Anet-Isheshek ki bisik yit mo. Nek anɔng, nyeseng yin gak, i bi won yin ba tɛ ba ki rosom yin tɛ basam awo.

2 Di fok yin, imi aBulus tsin ki tak yin fok, ki i won yin ba ki ya yin katse, i sot fok Anet-Isheshek te kuhwye me yɔng. 3 In shim in bang ki tak yin fok, ngma anet fɛ́ a won ba ku ya katse, i sot gbing-gbing na a shining ntsi me ngma kusum. 4 Iyin fi itsɛt yin kusot kutabat ni irèn ikuus ntsi, i sot i mi kam yin ice yin na Anet-Isheshek yɔng, i mi buruk yin itek Adakunom. 5 Awɛt nek inɔɔk atsak e, ayɛt agap Kabik, nɔng in di sɛ yit ite iyɛ ni kusot kutabat. 6 Nek kusot ayɛt Anet-Isheshek aYeso, kɛ na ba di ya yit katse, kɛ na ba won dang da ya ayi, iyet kutomong abap. Ikyɛng izining kyɛk fɛ́ ba tsɛt yet, inɔɔk atsak fi itonong ice ye ni irèn ishim.

7 Iyin tsang tseng yin gyat ni imɛsɛng e, angan wu ki tɛnɛng yin, a ki ro yin ifoos ifɛ̀ atsak e kong ɛ? 8 Kuri ikɔk nhwyɛ in yɔng, in ne na ayɔng fɛ́ a ki yes yin awo. 9 Kɔn fɛ́ ba di cɛɛt fok: <<Kaba ayist gyegyet, ka sak nkpe alikama dot ni in mos fungam.>> 10 In bi ite iyɛ na aTisa fok, i da shan yin itabak ikak zɛɛt awo. Anet e yɔng fɛ́ a ki tes yin natse, iwu fɛ́ Adakunom da ku tabak, kɛ na a yet angan ɛ. 11 Ábaruneng, ki in fin shara ifɛ̀ naton iya katse, akyɛ sak fɛ́ ba rēn di nesek izoot ɛ? Ki ishara ifɛ̀ naton iku aYeso Kristi naton ikum sot ikyɛng ikpa na akak awo. 12 A di se ke bayɔng fɛ́ ba ki boroso yin e, ke ba wat tɛsɛng kashon bá me, ba di sot amaring.

13 Ábaruneng, iyin ba mi ki yes yin sak kusot washak, awɛt da kusot washak e sak ni inyes ikyɛng fi nggɔn inɛn shim awo, tit sak ni i di sɛs yin bafidang ayɛt ishim. 14 Ntsi ngma kusum ba kunung ina ayɛt ifɛ̀ izining de, <<Shim afidang isot ngɔn ti ice ngɔn.>> 15 Ki i ya yin kashon ni iros yin, ni sarak yin bafidang, nɔ yin nhwyɛ yin kɔn i bi man yin ace yin.

16 Nek anɔng in shim in fɛ̀ ane, nye yin kusot ayɛt abik Adakunom, na anɔng fi i di ki nɔɔk yin ishim kusot ni inɛn kawat awo. 17 Nek kusot ni ishim inɛn tsɛsɛk nkyɔrɔk fi in se kangang ni kushim abik Adakunom, nɛ Kabik tsɛsɛk nkyɔrɔk fi in se kangang ni kushim ishim kusot ni inɛn. Ba se ni ifa na bafidang, nek anɔng fi da kyem ira yin ikyɛng fi ishim yin awo. 18 Awɛt ke Kabik Adakunom ka, ka tsin da kɔk, ngɔn ti i se nawop ntsi awo.

19 Ntomong ishim kusot irɔm se ni dɛt wɛshɛk, tɛ ane: Ira kujang ni nkyɔrɔk agbɛk-gbɛk, ni kuduk isot, 20 ni iya nabannom ntong, ni ya nkut, ni iraye banet, ni kam kusot banet, ni ifup ni iyɛ ife. Ni ishim ice, ni ikam ice na bafidang, ni ikabasa ni ishim ice 21 ni iraye iya kashon bakak, ni ifeng isɔs ngbere, ni ites ares shaam, ni ishɛrɛp nkyɔrɔk kuri inang. In ki kɔrɔk yin kuto, ti fi in ma ki nye e yame, fok bayɔng fɛ́ ba nye kuri nggɔn nɔng, ba bi nɔ ni iya itekari igwɔm Adakunom awo.

22 Awɛt nggɔn fi in nes na Kabik Adakunom yet: ishim, ni iyɛ ikan, ni kukyang, akabɔk, ni nhwyɛ, ni itek, ni itonong atsak, 23 ni kusot kuhwyɛ, ni iyit nhwyɛ. Nkyɔrɔk ti nnang, vit ishɔt naton na. 24 Ngma bayɔng fɛ́ ba se ayɛt Anet-Isheshek aYeso ba mi tekak ishim kusot inɛn, ni ikɔk itsɛsɛk de. 25 Nek in se yit ayɛt abik, won ni in kuus yit ikyɛng fɛ́ Kabik e tees. 26 In bi nye yit kukaa, ni idoro nhwyɛ ni iraye iya kashon bakak awo.