1 Akyɛ fi ibes ni kuren ni ifà nate yin ɛ? Ifà me nes nek kuri nzam-nzam ikɔk nkyɔrɔk fi ise ni itsom ayɛt ayɛ yin. 2 Ites yin ayisi naton nkyɔrɔk vit isɛ me, nek anɔng, ifɛɛs yin bafidiin. Ibɛ yin kuhwye da isɛ yin awo, nek anɔng, ni kɔrɔng yin ni fɛs yin bafidiin. I ses yin awo nek i risim yin Adakunom awo. 3 I risim yin, da i ni ses yin awo, nek i risim yin ni kuyiring kumaan e. Nɔng i di ki tarang yin kudaam ice yin naton nta irɔm yin kyɛk.

4 Iyin banet ira kujang! Iyin rēn yin fok ifidang ne kazatse yet iraye Adakunom awɛ? Ngma anet fɛ́ a kasa ibɔ ifidang na kazatse, a mi sot afi ifa ne Adakunom. 5 Ke iyin di yin tɛ Afumung Adakunom dun e fɛ́ a fɛ̀, <<Adakunom bi ifup ishim makiyi naton Kabik wu fɛ́ a te ayɛt yit ɛ?>> 6 Awɛt a ki nesek yit itek dot. Nek anɔng fɛ́ afumung di cɛɛt yɛ,

<<Adakunom rawu bayɔng

fɛ́ ba kok ice ba

a nesek itek wu sak na bayɔng

fɛ́ ba bɛ̀ ice ikyang.>>

7 Nek anɔng, nabak yin ice yin sak na Adakunom. Rayin aShetan, a da teng a ki won yin. 8 Serek yin bakat na Adakunom, iwu da serek bakat ni iyin. Kusu yin mbɔk yin, iyin bafi inɛn, kusu yin ayɛ yin, iyin bafɛ́ ayɛ afifa. 9 Nye yin kusot iyɔm, ne kafa kawe, ne tos yin nek anɛn yin. Won imasang yin ni isot kanak, iyɛ ikan yin ni isot ibeseng iyɛ. 10 Men yin ice yin ashon aTisa, iwu da ki nɔɔk yin iratek.

11 Ábaruneng, i bi nye yin amaan ifɛ̀ naton ace yin awo. Kaakye anet fɛ́ a tsɛt ibeseng arunyining afi ikuus, ke a tsɛt ite akak inɛn ayi, a se ni itsɛt ibeseng ntsi Adakunom, ama anɔng, a tsɛt ntsi Adakunom ni inɛn. Ngma izen fi itsɛt a ra ntsi Adakunom ishɔt, i tonong fok ngɔn nyes ikyɛng fi ntsi me fɛ̀ awo. Ama anɔng, ngɔn mi sak ice ngɔn i sot anet ira ntsi ishɔt. 12 Anet inesek ifɛ̀ ntsi ni ishɔt, a yet Adakunom aziwu kyɛk, iwu fɛ́ a kyem na nɔk kutset na sok kutset. Awɛt ngɔn yet angan fi ira afidang isot ngɔn ishɔt ɛ?

13 Wes yin ato yin, iyin fi i nye yin ye, <<Atut ke natson ayi in bi tse yit ni wɔp ya, in da nye yit iyɛ azɔng, ni in tsin ra yit ijik, ma in tusung yit atsɔm gaan.>> 14 Awɛt vit iyin ni kurēn ke akyɛ fi i bi te natson ɛ? In fɛ̀ ane ni ngane, kutset yin yet akyɛ? Iyin fi i se yin ti aming, fi ikpa yɔkɔnɔng ni wat i kana karak. 15 I se yɛɛt ki i fɛ̀ yin ane, <<Kɛ aTisa shim, a ki won yit ayɛt bafi kutset, in bi nye yit ane ne ana.>> 16 Awɛt di yin fi ikok ice naton, ni nye yin mgbep. Kuri ikok ice naton iyɔng se yɛɛt awo. 17 Nek anɔng, ngma anet fɛ́ a rēn ikyɛng fi i se yɛɛt na a nye, awɛt a rawu dang ra ide, anɔng e sot inɛn ni wu.