1 Wes yin ato iyin barum! Tos yin ni tang yin nkun nek izot fi i bi bɛ́ naton yin. 2 Kurúm fi i bɛ̀ yin mi bush, ize mi ya ares yin. 3 Ata asɛng yin ne ata akan yin mi beseng. Ibeseng na bi nɔɔk kanu icɛɛt naton yin, ibeseng e bi ya kurɔm in ti kurong. I mi tusung yin ace yin kurúm ni nnom igang e nang. 4 Fok yin, nanak banet fɛ́ ba bɔrɔng ntomong na akɔ yin, fi i rayin dang ka ba tarang yin izang ba nek fi ka ba moot yin mo nanyas. ATisa Azɔk-Bazɔk aton aza mi fok kanak banet fɛ́ ba kiri tusung yin nayak akɔ yin. 5 I nye yin kusot iya nta azatse, i ya yin ni sɔ yin ikyɛng fi iyɛ yin shim. I se yɛɛt anɔng akabɛs, i mi nok yin nrɔm yin, i tsin tot yin kunom fɛ́ ba bi ki tsɛk yin. 6 I mi tɛmɛng yin banet fɛ́ ba ki ra yin inɛn ikak awo ishɔt, i mi ka ba fɛs yin.

7 Nek anɔng, ábaruneng, nye yin kusot akabɔk ni tsin di tot yin ku bɛ́ aTisa. Di yin kuri akabɔk fɛ́ anet ikɔ nye na tsin di tot nayak ikɔ wu na na ben. A nyes akabɔk itot iza shik ni iza ishamang. 8 Nek anɔng, i se yɛɛt iyin ni i nye yin kusot akabɔk ba. Bang yit yin ayɛ, nek ku bɛ́ aTisa yit bɛ́ bakat.

9 Ábaruneng, i bi ras yin nanan na bafidang awo, kɔn ishɔt bi ki ya yin. Di yin, Anet ishɔt bɛ́ bakat ibes wu, a se ni inyeseng atitu! 10 Ábaruneng, kuus yin nggɔn batan fɛ́ ba kin shara ifɛ̀ naton aTisa. Mɛɛs yin nggɔn akabɔk fɛ́ ba kin nye ayɛt mgbang. 11 Nek ba yes bayɔng fɛ́ ba nye akabɔk ayɛt mgbang bafɛ́ awɛng. Iyin ki mang fok yin kuri akabɔk fɛ́ aYuba kin nye, itu fok yin kuri itek fɛ́ Adakunom ku te ne. Nek aTisa yet afi ifoos angmishish banet gyet awo.

12 Ábaruneng, igbat e yet, da i bi nye yin kushi na kazanɛn ke na kazatse ke ni ikikak awo. Won <<Ey>> yin na a sot ey, nɛ <<Awey>> yin na a sot awey, ke da anɔng awo ishɔt bi ki ya yin.

13 Ke akak ayɛt yin se ayɛt mgbang ɛ? Won na a ra awon. Ke akak ayɛt yin bi iyɛ ikan ɛ? Won na a ra abom itere Adakunom. 14 Ke akak ayɛt yin se ni irɔk ɛ? Won na a yes bashɔn bafi ikuus na ba ku ra awon, na ba di korok name naton wu ni iyerek aTisa. 15 Awon fɛ́ ba ra ayɛt inɔɔk atsak da te anet irɔk kyang; aTisa da kudorok. Ke a mang ra inɛn, Adakunom da ku fuut ide.

16 Nek anɔng, taas yin bafidang inɛn yin, ni ras yin awon naton bafidang nɔng i da ses yin kukyang. Awon anet atsak bɛ̀ agap, a ya hwyɛ awo. 17 AIliya kin yet anet awe kpaf ti iyit. A kin ra awon atsak fok iza bi tik awo, ba won dang nye iza ni mben e ayɛ ataat ni ibit e. 18 A tɛ a ra awon, kazanɛn korok iza, mben se kuyak. 19 Ábaruneng, ke akak ayɛt yin kpa ni irèn atsak, akak na a tse na bun ni iwu, 20 yiring yin ni ifɛ̀ de: Ngma ayɔng fɛ́ a tirik anet inɛn ayɛt idun wu, a da ku sheshek kɔn a bi ku, anɔng e da sak Adakunom da yɛrɛ kudot anɛn wu awo.