1 I se gbing-gbing ngɔn ni tees ikyɛng fi i se yɛɛt ni itees atsak. 2 Tees batek bako imen nhwyɛ, fi i kyem na ba ka ba nesek mo iratek, ni iyit ice, ni kuyiring abik kutek, ni ishim ni igbingding.

3 Kpaf anɔng, tees banyining bako na ba nye kusot fi ku da tonong inesek Adakunom iratek, da ba bi sot bafi imok banet awo ke nggɔn isɔ kutsit awo tit na ba tees ikyɛng fi i yet itek. 4 Na anɔng wu, ba da kyem ba tees banyining bawosong na ba shim batek bà ni nnon bà, 5 na ba sot bafi iyit ice, na ba sot cɛ́l, na ba sot bafi kutomong ari, na ba sot bafi nhwyɛ, na ba sot bafi inabak ice sak na bamatek bà, kɔng akak bi beseng ifɛ̀ Adakunom.

6 Ni irèn izining e yɔng, tabak bacam na ba sot bafi iyit ice. 7 Na akaakyi irèn sot ikyɛng fɛ́ banet di ki mɛɛs, ni itees ngɔn, tonong isot katsak ni inabak ice, 8 ni kucɛɛt fi ku tseng gyat fɛ́ vit anet fɛ́ a da kyem a di sɛ inɛn ni ko, nɔng nsum da yit bayɔng fɛ́ ba da raba, nek ba da bit ikyɛng iduk e ifi icɛɛt natoon yit.

9 Tees basam inabak ice sak na batek ari bà na akaakyi ikyɛng. Na ba ka ba terek iyɛ, da ba bi ka ba bushung ni kucɛɛt awo. 10 Da ba bi ka ba ras itsang awo, na ba tonong fok ba da kyem ba di te iyɛ gyat ni ba, na akaakyi irèn. Ba da sak itees naton Adakunom Anet-Isheshek yit da kɔk banet.

11 Nek itek Adakunom fi i nesek isheshek mi bɛ sak na banet ngma. 12 Itek e, ki tees yit ni fɛ̀ yit <<Awey>> ni kusot fɛ́ da Adakunom shim awo, ni nggɔn azatse ni in nye yit kusot iyit ice, ni kusot kugyat e, ni kusot kutabat ni kuzam kang fi in di se yit. 13 Ni in tsin di tot yit ite iyɛ yit, kubɛ́ Adakunom Aratek* asɔkɔ Isheshek yit iwu aYeso Kristi, 14 iwu fɛ́ a nɔɔk ice wu mok a ki shan yit mo ayɛt ngma ntomong anyas, nɔng a da ki kanang yit mok ice wu, banet fɛ́ ba yet bafuu, fɛ́ ba foos ikɔk inye ikyɛng fi i yet itek.

15 Nkyɔrɔk nang wu in yet ikyɛng fi ngɔn da tees. Tabak, ni gyɔng ayɛt kukyem. I bi won akak da byɛs awo.