Provérbios 18

1 Yalingupala ga heye hela kangibagulaga na wayage,

kanguzudilaga wone yalonjelwe choneche chiwele na luhala.

2 Mpoka hambe yanojezwe na luhala,

kwa heye kulonga choyalingijesa ndo chinojile.

3 Vyoukuya wihe, kwanguyaga na kubeza kahi,

hamwe na soni, kwanguyaga na kudeula.

4 Ulonzi wa munhu ndo mazi menji,

ila nzasa ya luhala ndo kazanda kalinguchililika.

5 Haiwele goya kumganilila mwihe,

na kumbunza hachi yatanganiche.

6 Ulonzi wa mpoka wangigalaga kilewa,

chila choyalingulonga changwambuzaga mitowa.

7 Mlomo wa mpoka wangumdumyaga heye yuye,

mlomo wa heye ndo idiwa lya kikala kwa heye.

8 Ulonzi wa munhu yalinguheha ndo kota chilyo chinojile,

chiwele changudulikaga du mbaka mmunda.

9 Munhu mgata kuli mijito ja heye,

mng’holoze ndo yalinguwifya.

10 Mkulu Nguluwi ndo ngome iwele nzinzili,

yatanganiche kangulibilimilaga na kanguwaga hali kikala goya.

11 Lufufu lwa yawele na lufufu ndo ngome ya heye,

kangijesa kota ndo lukanzi luwele ng’wemang’wema lulingumwamila.

12 Kidaya kwa mnhumbula kwangigalaga kudumigwa,

ila kunyenyetela kwangigalaga lutogo.

13 Yalingwidichila kuno yang’hali kuhulichiza,

ndo upoka na mbuli ya soni kwa heye.

14 Nhumbula ya munhu yanguwezaga kwimilila utamwa,

ila wone itweguche, yokwimilila ndaze?