1 Mafalisayo nawahulika kota Yesu nayali yobatiza na kupata walanguswa wenji kusinda Yohani. 2 Hanga hawele Yesu yuye yawele yobatiza, ila nawali walanguswa wa heye. 3 Lelo Yesu loyahuliche mbuli azo, nakoka Yudeya nakahiluka Galilaya, 4 kuli majendo ago naimlapa yakole Samaliya.

5 Lelo nakafika Sukali, muji uwele Samaliya, habehi na mgunda uwele Yakubu nakamha Yusufu mwanage. 6 Honhu aho nahali na ideho lya Yakubu, Yesu nayali yatochile kwa majendo, nakekalisa.

7 Nakoya mdala yumwe wa Samaliya kudeha mazi. Yesu nakamlonjela, "Ndangulanda mazi nyinwe." 8 Mhela awo walanguswa wa heye nawaluta kuli muji kugula chilyo.

9 Yula mdala Msamalia nakamwidichila, "Hegwe kwa Myahudi, nani nda Msamaliya! Kwanguweza ndaze kundanda mazi ga kunwa?" Wayahudi nahawetanzaga na Wasamaliya kuli vinhu. 10 Yesu nakamwidichila, "Wone nauvizele ndolendole ya Nguluwi na whaani yalingukulonjela, ‘Umhe heni mazi nyinwe,’ wahamlandile, naye yahakupele mazi gawele na ukomu." 11 Mdala ayo nakamuuza, "Gwa! Mkulu, hegwe kwahela chinhu cha kudehela mazi na ideho ali ndo lya hasi ng'hatu, ago mazi ga ukomu kogapata kohi? 12 Ama hegwe kwa mkulu kusinda mhaza wa hetwe Yakubu yatupele ideho ali liwele heye hamwe na wana wa heye na migongolo ja heye nawalitumiya?" 13 Yesu nakamwidichila, "chila yalingunwa mazi aga kowa na ng'halu kahi. 14 Ila munhu yoneche yawele konwa mazi gawele ndomha, howa na ng'halu mazuwa gose. Mazi gondimha gowa mgati mwake na nzasa ya mazi ga ukomu na kumha heye ukomu wa mazuwa gose." 15 Ayo mdala nakamlonjela Yesu, "Mkulu, umhe heni ago mazi leka ndeche kuwa na ng'halu kahi na ndeche kuya hano kudeha mazi." 16 Yesu nakamlonjela yula mdala, "Ulute kamcheme mlume wa hegwe, uye naye hano." 17 Yula mdala nakamwidichila, "Ndahela mlume." Yesu nakamlonjela, "Nakukomya vyoulonjile kota kwahela mlume. 18 Kwa vila nawali na walume wahano, ayo youlingikala naye sambi hawele mlume wa hegwe. Aho nakulonga kwa kukomya." 19 Ayo mdala nakamlonjela, "Mkulu, ndangona kota hegwe kwa mloli. 20 Wasekulu wa hetwe nawafugama hali chidunda achi, ila hemwe mwangulonga kota honhu ha kumfugamila Nguluwi ndo kula Yelusalemu." 21 Yesu nakamlonjela yula mdala, "Mdala ung'hunde, mhela wanguya uwele hammfugamila Mhaza mchanya mwa chidunda achi ne kula Yelusalemu. 22 Hemwe Wasamaliya mwangumfugamila yohambe mumzele, ila hetwe twangumzela ayo yotulingumfugamila, kwa vila ulohozi wangulawa kwa Wayahudi. 23 Ila mhela wanguya, kahi naufika, uwele walingufugama kwa kukomya womfugamila Mhaza kuli muhe na kukomya. Kwa vila Mhaza kanguwagana wanhu walingumfugamila ahyo. 24 Nguluwi ndo Muhe, ahyo wanhu walingumfugamila wanguganigwa kumfugamila kwa Muhe na kukomya." 25 Yula mdala nakamlonjela Yesu, "Ndanguvizela kota Masiya yalinguchemigwa Kilistu, kanguya. Hoyokuya, kotuzelesa chila chinhu." 26 Yesu nakamlonjela, "Heni ndilingulonga ndo nene."

27 Mhela wuwo, walanguswa wa heye nawahiluka, nawabubuwala ng'hatu vyowamfichile Yesu yolongasa na mdala. Ila haduhu ne yumwe yamuuzile, "Kwangugana choni?" Ama "Lekachoni kwangulonga na ayu mdala?" 28 Yula mdala nakalileka ibiga lyake lya mazi, nakaluta kuli muji kuwalonjela wanhu, 29 "Muye mumlole munhu yandonjele mbuli zeng'ha zonditile! Ndaze, koweza kuwa heye ndo Kilistu?" 30 Lelo wanhu nawoka kuli muji nawaluta koyawele Yesu.

31 Mhela wuwo walanguswa wa heye nawali womdedeza Yesu, "Mlangusa, ulye chilyo." 32 Ila heye nakawedichila, "Ndina chilyo chiwele hamchizelele." 33 Walanguswa wake nawaluka kiwuza, "Ndaze, hana munhu yamigalile chilyo?" 34 Yesu nakawalonjela, "Chilyo cha heni ndo kudita choyalingugana heye yandajize na kweneza mijito jake. 35 Hemwe mwangulonga, ‘Jinghali myezi jine hela, mhela wa mbena wofika.’ Ila ndanguwalonjelani, mlole vila migunda vyojiwele goya kubetigwa. 36 Yalingubeta kangupegwa choyalinguganigwa kupegwa na yalingukungajiza mbena kwa chiwalo cha ukomu wa mazuwa gose, ahyo yalingunyala na yalingubeta wosangalala hamwe. 37 Ahyo ulonzi awu ndo wa kukomya, ‘Yumwe kangunyalaga na yunji kangubetaga.’ 38 Heni nandiwalajiza mkabete mbena ziwele hamzilavile chituguti, ila hemwe mwangupata mzidi kwa chituguti cha hewo."

39 Wasamaliya wenji kuli muji wula nawamkunda Yesu kwa chiwalo cha ulonzi woyaulonjile yula mdala loyawalonjele kota, "Nakandonjela geng'ha gonditile." 40 Wasamaliya nawaluta kwa Yesu, nawamlanda yekale nawo. Yesu nakekala ako kwa mazuwa meli. 41 Wanhu wenji nawamkunda Yesu kwa chiwalo cha usenga wake. 42 Nawamlonjela yula mdala, "Hetwe hambe tukunde kwa chiwalo ulonzi wa hegwe, ila hetwe natwe natumhulika na twanguvizela kota ayu ndo Mlohozi wa isi yeng'ha."

43 Logakwete mazuwa meli Yesu nakoka, nakaluta Galilaya. 44 Kwa vila Yesu nayali yalonjile, "Mloli hambe yahulichizwe kuli isi ya heye." 45 Lelo loyafichile Galilaya, wanhu wenji wa Galilaya nawambochela, kwa vila nawo nawali kuli mnvina ya Pasaka, nawazona mbuli zeng'ha zoyaditile ako Yelusalemu kuli mnvina ayo.

46 Yesu nakafika kahi ako kuli muji wa Kana kuli mkowa wa Galilaya, honhu hawele nakagalula mazi kuwa divai. Nakwali na chilongozi yumwe yawele na mwana yalingutamika ako Kapanaumu. 47 Lelo ayo chilongozi loyahuliche kota Yesu nayali yalawile Yudeya na kufika Galilaya, nakaluta kumlanda yalute kumlohola mwana wa heye yawele yotamika ng'hatu. 48 Yesu nakamlonjela, "Kuduhu munhu yokunda mbaka yavyone vinduzanduza na ulajilo." 49 Yula chilongozi nakamlonjela, "Mkulu, dedede, tulute himahima kung'hali mwanangu hanabagama." 50 Yesu nakamlonjela, "Ulute, mwanago kochikala." Yula munhu nakakunda ulonzi wa Yesu, nakoka. 51 Loyawele mnzila, vitumagwa wake naweting'hana naye, nawamlonjela kota mwanage ka mkomu. 52 Naye nakawauza kota nawali mhela wachi uwele mwana nakaloholigwa, nawo nawamlonjela, "Zuwa likolile saa saba nemisi utamwa naumlechela." 53 Ayo chilongozi nakakumbuchila kota nawali ndo mhela wuwula uwele Yesu nakamlonjela, "Mwanago kochikala." Baho nakakunda heye na ivyazi lyake lyeng'ha. 54 Awu nawali ulajilo wa keli woyaulajile Yesu loyawele yolawa Yudeya kuluta Galilaya.