1 Munhu yumwe yalinguchemigwa Lasalo, mwenyeng'haye wa Betaniya, nayali mtamwa. Chijiji cha Betaniya nachali honhu walingikala Maliya na Malita lumbulye. 2 Maliya ndo yula yambakalize Yesu mafuta ga kunhunyhilila na kumbagusa kwa mnvili za heye. Lelo Lasalo yawele yotamika ndo lumbulye. 3 Lelo awo wadala nawahilika usenga kwa Yesu, "Mkulu, goloko wa hegwe ka mtamwa!" 4 Yesu loyahuliche ago, nakalonga, "Utamwa awo haumkopola, ila ndo kwa chiwalo welile wa Nguluwi, nakatamika leka kwa nzila ayo Mwana wa Nguluwi yatogoligwe."

5 Yesu nakamgana Malita lumbulye Lasalo. 6 Loyahuliche kota Lasalo ka mtamwa, Yesu nakalutilila kikala honhu aho loyawele kwa mazuwa meli. 7 Hamba nakawalonjela walanguswa wa heye, "Tulute kahi Yudeya." 8 Walanguswa nawamlonjela, "Mlangusa! Mhela uchefu hela ukolile Wayahudi nawali wogana kukukopola kwa maganga, kwangugana ulute ako kahi?" 9 Yesu nakawedichila, "Ndaze, hakuwele na masaa kumi na meli kuli nemisi imwe? Lelo, munhu hoyojenda nemisi howeza kikwang'hwala kwa vila kanguwona lumuli lwa isi ayi. 10 Ila munhu hoyojenda nechilo, kochikwang'hwala kwa vila lumuli lwa haduhu mgati mwa isi." 11 Yesu loyasindile kulonga ulonzi awu nakamlonjela, "Goloko wa hetwe Lasalo nakawasa, ila heni ndoluta kumdita yalilimche." 12 Walanguswa wa heye nawamlonjela, "Mkulu, wone yawasile, kolilimka." 13 Hewo nawejesa kota nayali yalonjile kuwala usinjizi hela, hambi nayali yolonga kuwala kubagama kwa Lasalo. 14 Lelo, Yesu nakawalonjela hazelu, "Lasalo nakabagama, 15 ila ndangusangalala kwa vila siwele ako leka mkunde. Lelo tulute kwa heye." 16 Tomasi yalinguchemigwa mnyambili nakawalonjela walanguswa wayage, "Tulute, natwe tubagame hamwe na heye."

17 Yesu loyafichile ako nakamfika Lasalo yatiligwe mchilaga mazuwa gane gakolile. 18 Chijiji cha Betaniya nachali habehi na Yelusalemu, kwa utali wa kilometa zidatu. 19 Wayahudi wenji nawoya kuwahembuliza Malita na Maliya kwa kubagama kwa lumbulyawo Lasalo.

20 Malita loyahuliche kota Yesu nayali yokuya, nakaluta kumlamsa, ila Maliya nakasigala kaye. 21 Malita nakamlonjela Yesu, "Mkulu, wone nauwe hano, lumbulyangu nahali bagama! 22 Ila ndanguvizela kota choneche choumlanda Nguluwi, kokupa." 23 Yesu nakamlonjela, "Lumbulyo kozilipuka." 24 Malita nakamwidichila, "Ndanguvizela kota kozilipuka mhela wa uzilipulo, zuwa lya kuduma." 25 Yesu nakamlonjela, "Heni ndo uzilipulo na ukomu. Yalingung'hunda kowa mkomu hanga kobagama, kochikala, 26 chila yalingikala na kung'hunda, hobagama. Ndaze, kwangukunda aga?" 27 Malita nakamlonjela, "Ena Mkulu! Ndangukunda kota hegwe kwa Kilistu, Mwana wa Nguluwi, yula yalinguya kuli isi."

28 Loyalonjile ago, Malita nakaluta kumchema Maliya, mkulugwe, nakamlonjela kwa uviso, "Mlangusa ka hano, kangukuchema." 29 Naye loyahuliche, nakoka himahima nakaluta kwa Yesu. 30 Yesu nayali yang'hali kwinjila kuli chijiji, ila nayali bahala Malita hoyamlamse. 31 Lelo, Wayahudi wawele hamwe na Maliya haluga womhembuliza lowamuwene yochile himahima na kulawa mgati, nawamuwinza kuno wochijesa kota nayali yoluta kula kuli chilaga kulombocheza.

32 Lelo, Maliya loyafichile honhu hoyawele Yesu na kumona, nakafugama, nakamlonjela, "Mkulu, wone nauwe hano kalumbu nahali bagama!" 33 Yesu loyamuwene Maliya yolila na wala Wayahudi woyile hamwe na heye wangulila, nakawa na masinzo na kudeula mnhumbula. 34 Hamba nakawauza, "Nammuwika kohi?" Nawamwidichila, "Mkulu, uye uhalole." 35 Yesu nakalila. 36 Lelo, Wayahudi nawalonga, "Mlole vila vyoyamganile!" 37 Ila wamwe wa hewo nawalonga, "Ndaze, ayu yamgubule meho yula yohambe yalole, hawezile kumdita Lasalo yaleche kubagama?"

38 Lelo, Yesu loyawele masinzo mnhumbula, nakaluta kuli chilaga. Chilaga acho nachali mhalika chiwele chigubikwe na iganga. 39 Yesu nakalonga, "Muse alyo iganga!" Malita, lumbulye ayo yabagame nakamlonjela, "Mkulu, nakaluka kunhung'ha kwa vila kamchilaga kwa mazuwa gane!" 40 Yesu nakamlonjela Malita, "Sikulonjele kota wone ukunde kowona ukulu wa Nguluwi?" 41 Lelo, nawosa lila iganga, Yesu nakalola kilanga, nakalonga, "Ndangukutogola Mhaza kwa vila hegwe kwangunyhulichiza. 42 Ndanguvizela kota kwangunyhulika mazuwa gose. Ila nandonga ago kwa chiwalo cha wanhu awa leka wakunde kota hegwe ndo undajize." 43 Vyoyalonjile ago, nakachemeleza kwa lizi likulu, "Lasalo! Ulawe mgati!" 44 Ayu yawele nakabagama nakalawa mgati, kuno yawopigwe sanda kuli magulu na moko na kumeho kwa heye nakugubikwa. Yesu nakawalonjela, "Mumdohole na mumleche yalute."

45 Lelo, Wayahudi wenji wafichile kwa Maliya lowaiwene mbuli ayo loyaiditile Yesu, nawamkunda. 46 Ila wamwe wa hewo nawaluta kwa Mafalisayo nawalonga kuwala mbuli ayo yaiditile Yesu. 47 Lelo watambika wakulu na Mafalisayo nawadita nhing'hano ng'hulu, nawalonga, "Tudite ndaze? Munhu ayu kangudita ulajilo winji lukami.Mtambika wa Chiyahudi 48 Wone tumleche, wanhu weng'ha womkunda, nawo wanhu wa Loma wokuya kuiwifya ng'handa ya Nguluwi wa hetwe na isi ya hetwe!" 49 Aho yumwe wa hewo yalinguchemigwa Kayafa, yawele nayali mtambika mkulu kuli mwaka awo, nakawalonjela, "Hemwe hamvizelele chinhu! 50 Ndaze, hamvizelele kota fola munhu yumwe yabagame kwa chiwalo cha wanhu, kusinda isi yeng'ha idumigwe?" 51 Halonjile ago kwa ludali lwa heye yuye, ila kwa vila nayali mtambika mkulu kuli mwaka awo, nakalavya uloli kota Yesu kobagama kwa chiwalo cha isi ya hewo, 52 haiwele kwa chiwalo cha isi ya hewo hela ila kwa chiwalo cha wana wa Nguluwi wasambaluche.

53 Lelo, kulawila zuwa alyo vilongozi wa Wayahudi nawewika goya kumkopola Yesu. 54 Ahyo Yesu hajendile kahi hazelu hali Wayahudi, ila nakalawa aho, nakaluta honhu hawele habehi na kugunuche, kuli muji ulinguchemigwa Efulaimu. Nakekala ako hamwe na walanguswa wa heye. 55 Mnvina ya Wayahudi ya Pasaka nayali habehi, wanhu wenji nawaluta Yelusalemu leka wewelize kung'hali mnvina ayo. 56 Lelo, nawali wompala Yesu. Nawo lowekungajize kuli ng'handa ya Nguluwi naweuza, "Mwangona ndaze! Yangoneka kota hambe yoye kuli mnvina ayi?" 57 Mtambika mkulu na Mafalisayo nawali walavile mzilo kota wone munhu yavizele honhu hoyawele Yesu yawalonjele leka wamibate.