1 Logakolile ago, Yesu nakawalawila kahi walanguswa wa heye saba hafungo ha ilamba lya Tibeliya. Nakelajila kota hino, 2 Simoni Petili na Tomasi yachemigwe mnyambili na Natanaeli mwenyeng'haye wa Kana kuli mkowa wa Galilaya na wana weli wa Sebedayo na walanguswa wanji weli, nawali weng'ha hamwe. 3 Simoni Petili nakawalonjela wayage, "Ndanguluta kulowa somba." Nawo nawamlonjela, "Toluta hamwe." Ahyo nawaluta, nawakwina kuli itumbwi, ila nechilo ayo hawapatile somba. 4 Lokwaluche kubwemwenzuka, nawamona Yesu nakema hafungo ha ilamba, ila walanguswa hawavizelele kota nayali ndo heye. 5 Lelo, Yesu nakawauza, "Wasongolo, hampatile somba?" Nawo nawamwidichila, "Hatupatile." 6 Yesu nakawalonjela, "Mtoze utandawala kuli ubanzi wa kudilo mwa itumbwi namwe molowa somba." Lelo, nawatoza utandawala na kulowa somba nyinji lukami mbaka nawalemwela kukwega utandawala kwa chiwalo cha winji wa somba. 7 Aho yula mlanguswa yaganigwe na Yesu nakamlonjela Simoni Petili, "Ayu ndo Mkulu." Petili vyoyahuliche kota ndo Mkulu, nakavala ivalo lyake kwa vila nayali mwanzi na kitoza kuli mazi. 8 Ila wala walanguswa wanji nawoya mhwani kwa itumbwi kuno wokwega utandawala umemile somba, kwa vila hawawele kutali na isi ng'havu, ila nawali utali wa mita miya imwe kulawa hafungo. 9 Lowafichile hafungo nawachona chiluli cha makala na mchanya mwa chiluli acho nahawichigwa somba na mibumunda. 10 Yesu nakawalonjela, "Migale hano somba zimwe zomlowile." 11 Lelo, Simoni Petili nakakwina kuli itumbwi, nakakwega utandawala umemile somba mbaka hafungo, nakwali na somba ng'hulu zifichile miya imwe na makumi gahano na zidatu. Hanga nazali somba nyinji ahyo, utandawala haudejeche. 12 Yesu nakawalonjela, "Muye mulye." Haduhu ne yumwe wa hewo yajezile kumuuza, "Kwa whaani?" Kwa vila nawavizela kota nayali Mkulu. 13 Yesu nakoya, nakalihola ibumunda, nakawapa, nakadita hiho kwa zila somba.

14 Ayi nayali lwa kadatu Yesu kuwalawila walanguswa wa heye, kulawa loyazilipuche kulawa kwa wabagame.

15 Lowasindile kulya, Yesu nakamuuza Simoni Petili, "Simoni mwana wa Yohani, ndaze, kwangungana ng'hatu kusinda awa?" Petili nakedichila, "Ena Mkulu, hegwe kwanguvizela kota ndangukugana." Yesu nakamlonjela, "Ujilolele miyana ing'holo ja heni." 16 Hamba nakamuuza kahi, "Simoni mwana Yohani, ndaze, kwangungana?" Petili nakedichila, "Ena Mkulu, hegwe kwanguvizela kota ndangukugana." Yesu nakamlonjela, "Ulolele ming'holo ja heni." 17 Nakamuuza lwa kadatu, "Simoni mwana Yohani, ndaze kwangungana?" Aho Petili nakesinza kwa vila Yesu nayali yamuuzile lwa kadatu, "Kwangungana?" Nakamlonjela, "Mkulu, hegwe kwangugazela geng'ha, kwanguvizela kota ndangukugana." Yesu nakamlonjela, "Ujilolele ming'holo ja heni! 18 Ndikomya ndangukulonjela, louwele msongolo nakuvala vyouganile na kuluta kouganile. Ila louwa sekulu, kogolola moko gako na munhu yunji kokuvaliza na kukuhilika honhu hawele hauganile kuluta." 19 Kwa kulonga ahyo, Yesu nakalajila ndaze kubagama kwa Petili na kumtogola Nguluwi. Hamba nakamlonjela Petili, "Umbinze."

20 Petili nakagalamka, nakamona yula mlanguswa yawele Yesu nakamgana, yowawinza. Mlanguswa ayo ndo yula yawele nakekalisa habehi ng'hatu na Yesu mhela wa chilyo cha nechilo na kumuuza, "Mkulu, whaani yokuhinduka?" 21 Lelo, Petili loyamuwene ayo, nakamuuza Yesu, "Mkulu, ayu naye ndaze?" 22 Yesu nakamwidichila, "Wone ndangugana yekale mbaka hondikuya, hegwe yangukulapa choni? Hegwe umbinze!" 23 Lelo, mbuli ayo nayenela hali wala walanguswa kota mlanguswa ayo hobagama. Ila Yesu nahamlonjele kota mlanguswa ayo hobagama, ila nakalonga, "Wone ndangugana yekale mbaka hondikuya, hegwe yangukulapa choni?"

24 Ayo ndo yula mlanguswa yalonjile mbuli azi na kuzandika. Natwe twanguvizela kota goyalonjile ndo kukomya.

25 Hana mbuli zinji nyinji zoyaditile Yesu, ziwele wone nazandichigwe zeng'ha, ndangijesa kota isi yeng'ha nahayenele kuviwika vitabu viwele navyandichigwa.