1 Hamba Yesu nakaloka ilamba lya Galilaya, liwele kahi lyanguchemigwa ilamba lya Tibeliya. 2 Lung'hongola lukulu lwa wanhu nalumuwinza Yesu kwa vila wanhu awo nawali nawona ulajilo loyaditile kwa kuwosela matamwa walingutamika. 3 Yesu nakakwina kuli chidunda, nakekala hamwe na walanguswa wa heye. 4 Mnvina ya Wayahudi ilinguchemigwa Pasaka nayali habehi. 5 Lelo Yesu loyonile lung'hongola lwa wanhu lwanguya kwa heye, nakamlonjela Filipo, "Togula kohi mibumunda leka wanhu awa walye?" 6 Yesu nakalonga ahyo kwa kumjeza Filipo, kwa vila nakavizela kota choni choyodita. 7 Filipo nakamwidichila, "Hanga natuwe na sendi denali miya mbili hazitosa kugula mibumunda ja kulya wanhu awa weng'ha." 8 Yumwe wa walanguswa wa heye yalinguchemigwa Andeleya, yawele mng'holoze Simoni Petili, nakalonga, 9 "Hana msongolo yawele na mibumunda jihano ja shayili na somba mbili, ila avi vyoweza kuhega kwa wanhu wenji kota wano?" 10 Yesu nakalonga, "Muwalonjele wanhu wekalise." Nakwali na misolo minji honhu aho. Lelo, wanhu nawekalisa, weng'ha nawali wanhu walume elufu zihano. 11 Yesu nakajihola jila mibumunda, nakajitambichiza, nakawagawila wala wanhu wekalise, nakadita hihila na zila somba, chila munhu nakapata vila vyoyaganile. 12 Wanhu lowegute Yesu nakawalonjela walanguswa wa heye, "Mlokoteze vihande visigale vileche kwajilila." 13 Lelo, nawalokoteza vihande vya mibumunda ja shayili vyowavilechile wala wanhu wawele nawalya, nawavimemeza vidoto kumi na vili. 14 Wanhu lowauwene ulajilo awo loyaulajile Yesu, nawalonga. "Ndikomya, ayu ndo mloli yalinguya kuli isi." 15 Yesu nakavizela kota wanhu nawagana wamhole na kumdita yawe mndewa, nakoka kahi, nakaluta kuli chidunda yaliyeng'ha.

16 Loifichile matinazo, walanguswa wa Yesu nawadulika mbaka kuli ilamba, 17 nawakwina itumbwi leka waloche kuluta Kapanaumu. Jiza nayali yinjile, mhela awo Yesu nayali yang'hali hanafika kwa hewo. 18 Ilamba nalyaluka kutiguka kwa vila mbeho nayali iputa. 19 Walanguswa lowalutile utali wa kilometa zihano ama sita hino, nawamona Yesu yojenda mchanya mwa mazi, yolihejelela itumbwi, nawadumba ng'hatu. 20 Yesu nakawalonjela, "Ndo heni! Mleche kudumba!" 21 Lelo nawagana kumuhola Yesu kuli itumbwi, baho du itumbwi nalifika kumwambu hafungo kowawele woluta.

22 Loifichile hamitondo lung'hongola lwa wanhu wala wasigale ubanzi uyage wa ilamba nawavizela nakwali na itumbwi limwe hela hala na Yesu henjile kuli itumbwi hamwe na walanguswa wa heye, ila walanguswa awo nawali walutile waliyeng'ha. 23 Mitumbwi jinji kulawa Tibeliya najuya honhu hala wanhu howadile mibumunda, Mkulu loyasindile kumtogola Nguluwi. 24 Lelo, awo wanhu awo lowavizele kota Yesu na walanguswa wa heye nawali haduhu honhu hala, nawakwina itumbwi, nawaluta Kapanaumu kumpala Yesu.

25 Wala wanhu lowamfichile Yesu kumwambu mwa ilamba, nawamuuza, "Mlangusa, nakuya nili hano?" 26 Yesu nakawedichila, "Ndikomya ndanguwalonjela, hemwe hambe mmhale heni kwa vila namona ulajilo na vinduzanduza, ila kwa vila namulya jila mibumunda na kiguta. 27 Mleche kitunya kwa chilyo chilingola, mitunye kwa chilyo chilingikala mhela winji kwa chiwalo cha ukomu wa mazuwa gose chiwele Mwana wa munhu kowapa. Heye ndo yawele Mkulu Nguluwi nakamuwika muhuli." 28 Hewo nawamuuza Yesu, "Tudite choni leka tuweze kukola mijito ja Nguluwi?" 29 Yesu nakawedichila, "Aji ndo mijito yalingugana Nguluwi mjidite, mumkunde yula yamlajize."

30 Aho nawamlonjela, "Kolajila chinduzanduza chachi tuchone leka tukukunde? Kodita chinhu chachi? 31 Wasekulu wa hetwe nawalya mana kula kugunuche, kota Maandiko Matakatifu vyogalingulonga, ‘Nakawapa ibumunda kulawa kilanga.’ "

32 Yesu nakawalonjela, "Ndikomya ndanguwalonjela, Musa hawapele mibumunda kulawa kilanga, Mhaza wa heni ndo yalinguwapa hemwe mibumunda lya kukomya kulawa kilanga. 33 Kwa vila ibumunda lya Nguluwi ndo yula yalingudulika kulawa kilanga na yalinguipa isi ukomu." 34 Lelo, nawamlonjela, "Mkulu, kulawila sambi utupe alyo ibumunda mazuwa gose." 35 Yesu nakawalonjela, "Heni ndo ibumunda lilingigala ukomu. Yalinguya kwa heni hokona nzala, yalingung'hunda hokona ng'halu mazuwa gose. 36 Ila nandiwalonjela, nammbona ila hamlingung'hunda. 37 Weng'ha yalingumha heni Mhaza wokuya kwa heni, nani simtoza kunze munhu yoneche yolinguya kwa heni, 38 kwa vila nandulika kulawa kilanga haiwele kwa kudita kota vyondilingugana, ila kweneza kugana kwa yula yandajize. 39 Aga ndo yalingugana yula yandajize, kota, ndeche kumwajiliza ne yumwe wa wala yamhele, ila ndiwazilipule hewo kuli zuwa lya kuduma. 40 Kwa vila choyalingugana Mhaza wa heni ndo achi, chila yolingumona Mwana na kumkunda yawe na ukomu wa mazuwa gose, nani ndomzilipula kuli zuwa lya kuduma."

41 Lelo Wayahudi nawaluka kung'ung'uta kwa vila Yesu nakalonga, "Heni ndo ibumunda liduliche kulawa kilanga." 42 Nawalonga, "Ndaze, ayu hawele mwana wa Yusufu? Twangumzela mhaza wa heye na mamo wa heye! Lelo, kanguweza ndaze kulonga kota nakadulika kulawa kilanga?" 43 Yesu nakawalonjela, "Mleche kung'ung'uta kwa chiwalo cha heni. 44 Haduhu munhu yoweza kuya kwa heni, wone Mhaza yandajize hamkwejile kwa heni, nani ndomzilipula munhu ayo kuli zuwa lya kuduma. 45 Waloli nawandika, ‘Wanhu weng'ha wolanguswa na Nguluwi.’ Chila munhu yalinguhulichiza Mhaza na kilangusa kwa heye ayo kanguyaga heni. 46 Haduhu munhu yoneche yamonile Mhaza ila yula yalingulawa kwa Nguluwi, heye ndo yaliyeng'ha yamuwene Mhaza. 47 Ndikomya, ndanguwalonjela, yalingukunda kana ukomu wa mazuwa gose. 48 Heni nda ibumunda lilingigala ukomu. 49 Wasekulu wa hemwe nawalya mana kula kugunuche, ila nawabagama. 50 Ila ali ndo ibumunda lilingundulika kulawa kilanga leka yoneche yalingulya yaleche kubagama. 51 Heni nda ibumunda lya ukomu lila lilawile kilanga. Munhu yoneche hoyolya libumunda ali, kochikala mazuwa gose. Ibumunda ali ndo lukuli lwa heni, luwele ndolulavya kwa chiwalo cha ukomu wa isi yeng'ha."

52 Aho ndo Wayahudi nawaluka kitwanza wolonga, "Munhu ayu kanguweza ndaze kutupa lukuli lwake tulye?" 53 Yesu nakawalonjela, "Ndikomya ndanguwalonjela, wone hamulya lukuli lwa Mwana wa munhu na kunwa danda ya heye, hamuwa na ukomu mgati mwa hemwe. 54 Yalingulya lukuli lwa heni na kunwa danda ya heni kanawo ukomu wa mazuwa gose, nani ndomzilipula kuli zuwa lya kuduma. 55 Kwa vila lukuli lwa heni ndo chilyo cha kukomya na danda ya heni ndo chakunwa cha kukomya. 56 Yoneche yolya lukuli lwa heni na kunwa danda ya heni, kochikala mgati mwa heni, nani ndochikala mgati mwa heye. 57 Mhaza yawele mkomu nakandajiza, nani ndangikala kwa chiwalo cha heye, ahyo yula yawele yolya lukuli lwa heni, kochikala kwa chiwalo cha heni. 58 Lelo, ali ndo ibumunda liduliche kulawa kilanga, haliwele kota mana wawele nawalya wasekulu wa hemwe, nawabagama. Ila yawele yolya ibumunda ali kowa mkomu mazuwa gose." 59 Yesu nakalonga ago loyawele yolangusa kuli sunagogi ako Kapanaumu.

60 Lelo, walanguswa wenji lowahuliche ago, nawalonga, "Azi ndo mbuli ng'hulu! Whaani yalinguweza kuzihulichiza?" 61 Yesu nakavizela ne kulonjelwa na munhu kota walanguswa wa heye nawali wong'ung'uta kwa chiwalo cha mbuli ayo, nakawauza, "Ndaze, mbuli ayi naiwazudiza? 62 Yowa ndaze, hommona Mwana wa munhu yokwina kuluta kuchanya koyalawile? 63 Muhe ndo ulingigala ukomu, lukuli hambe lutanze chinhu. Ulonzi wondiwalonjele ndo muhe na ukomu. 64 Ila wamwe wa hemwe hambe wakunde." Yesu nakalonga ahyo kwa vila kulawa mwaluko nakawazela wawele hambe wakunde na whaani yawele yomhinduka. 65 Hamba nakalonga, "Achi ndo chiwalo chiwele nandiwalonjela kota haduhu munhu yoweza kuya kwa heni mbaka yawe nakatambichizwa na Mhaza wa heni."

66 Kulawa mhela awo walanguswa wa heye wenji nawahiluka kumbele, nawaleka kumuwinza. 67 Lelo Yesu nakawauza wala walanguswa kumi na weli, "Ndaze, namwe mwangugana kuka?" 68 Simoni Petili nakamwidichila, "Mkulu, toluta kwa whaani? Hegwe kwanawo ulonzi wa ukomu wa mazuwa gose. 69 Hetwe twangukunda na kuvizela kota hegwe ndo yula Yelile wa Nguluwi." 70 Yesu nakawalonjela, "Ndaze, siwahagule hemwe kumi na weli? Ila yumwe wa hemwe ndo Limazoga!" 71 Yesu nakalonga ago kwa chiwalo cha Yudasi, mwana wa Simoni Isikalioti, kwa vila ayo nayali ndo yomhinduka, hanga nayali yumwe wa wala kumi na weli.