1 Mazuwa sita kung'hali mnvina ya Pasaka hainafika, Yesu nakafika Betaniya koyekale Lasalo yawele Yesu nakamzilipula kulawa kuli wabagame. 2 Ako nawamwichila goya Yesu chilyo cha nechilo, naye Malita nayali yowakolela mijito. Lasalo nayali yumwe wa wala wawele kuli chisaga hamwe na Yesu. 3 Lelo, Maliya nakahola nusu lita ya mafuta galingununyhilila ga sendi nyinji ga nado, nakambakaliza Yesu kuli magulu na kumbagusa kwa mnvili za heye. Ng'handa yeng'ha naimema ununyhililo wa mafuta ago. 4 Lelo, Yudasi Isikalioti, yumwe wa wala kumi na weli yawele ndo yombelenhuka Yesu, nakalonga, 5 "Lekachoni mafuta aga hagaguzigwe kwa sendi denali miya zidatu na sendi azo wapegwe wazunwa?" 6 Yudasi nakalonga ahyo haiwele kwa vila nakawonela isungu wazunwa, ila kwa vila nayali yowika sendi na kwa vila nayali mhizi, chila mhela nayali yohiza koyawichile zila sendi. 7 Ila Yesu nakalonga, "Mleche kumtunya ayu mdala! Mumleche yagawiche ago mafuta kwa chiwalo cha zuwa lya kutiligwa kwa heni. 8 Wazunwa mowa nawo mazuwa gose, ila hamuwa na heni mazuwa gose."

9 Wayahudi wenji nawahulika kota Yesu nayali Betaniya. Lelo, nawafika ako haiwele kwa kumona Yesu, ila kumona Lasalo yawele Yesu nakamzilipula kulawa kwa wabagame. 10 Vilongozi wa watambika nawagana wamkopole Lasalo, 11 kwa vila kwa chiwalo cha Lasalo Wayahudi wenji nawawabelenhuka vilongozi wa hewo na kumkunda Yesu.

12 Zuwa liwinzile, lung'hongola lwa wanhu luyile kuli mnvina naluhulika kota Yesu nayali mzila kuya Yelusalemu. 13 Lelo, nawahola nhagala za mitende, nawaluta kumlamsa, nawakwiniza lizi wolonga,

"Lutogo! Yatambichizwe ayo yalinguya kwa itagwa lya Mkulu Nguluwi.

Yatogoligwe mndewa wa Isilaeli."

14 Yesu nakalipata lyana idogowi, nakakwina mchanya mwa alyo kota Maandiko Matakatifu vyogalingulonga.

15 "Uleche kudumba, gwa mhinza Siyoni!

Ulole, Mndewa wa hegwe kanguya,

lyana lya idogowi!"

16 Mhela awo walanguswa wa heye nahawavizelele mbuli azo, ila Yesu vyoyatogoligwe, aho nawakumbuchila kota ago nagali gandichigwe kuwala heye na wanhu nawali wamditile ahyo.

17 Lung'hongola lwa wanhu wala wawele hamwe na Yesu mhela loyamchemile Lasalo kulawa kuli chilaga, nakamzilipula kulawa kwa wabagame, nawalutilila kulonga kuwala heye. 18 Ahyo lung'hongola alo naluluta kumlamsa, kwa vila weng'ha nawahulika kota Yesu nayali yaditile ulajilo awo. 19 Lelo, Mafalisayo nawelonjela, "Mwangulola? Hotuweza kudita choneche! Mlole, isi yeng'ha yangumuwinza."

20 Nakwali na Wagilichi wamwe hali wanhu wawele nawafika Yelusalemu kufugama mhela wa mnvina ayo. 21 Awo nawamlutila Filipo, mwenyeng'haye wa Betisaida kuli muji wa Galilaya, nawalonga, "Mkulu, twangugana kumona Yesu." 22 Filipo nakaluta kumlonjela Andeleya, nawo weli nawaluta kumlonjela Yesu. 23 Yesu nakawalonjela, "Mhela wa kutogoligwa kwa Mwana wa munhu naufika! 24 Ndikomya ndanguwalonjela, wone nyhule ya ngano haigwile hali misanga na kola yanguponaga nyhule hihila. Ila wone yole, yangulelaga nyhule nyinji. 25 Yalinguugana ukomu wa heye, kouwajiliza, naye yalinguuzudila ukomu wa heye kuli isi ayi, kouwika kwa chiwalo cha ukomu wa mazuwa gose. 26 Yalingugana kung'holela mijito yangumgana yambinze, ahyo honeche hondili aho ndo chitumagwa wa heni hoyowa. Munhu yoneche yalingung'holela mijito, Mhaza wa heni komhulichiza."

27 "Lelo, nhumbula ya heni yangugazika, ndonje choni? Ndaze, ndonje, ‘Mhaza, uleche kukundiza mhela awu ufiche kwa heni?’ Hebu, nambuya kuli isi leka ng'hole kuli mhela uno. 28 Mhaza, litogole itagwa lya hegwe." Aho lizi nalilonga kulawa kilanga, "Nandilitogola na ndolitogola kahi."

29 Lung'hongola lwa wanhu wawele nawema aho nawahulika lizi alyo, wamwe wa hewo nawalonga, "Alyo ndo lizi lya lumwemwesa." Ila wanji nawalonga, "Mhilisi nakalonga na heye!" 30 Ila Yesu nakawalonjela, "Lizi alo halulawile kwa chiwalo cha heni, ila kwa chiwalo cha hemwe. 31 Sambi ndo mhela wa isi ayi kutaguswa, lelo chilongozi wa isi ayi kobelenhukwa. 32 Nani hondikwinuligwa mchanya mwa isi ndomkwega chila yumwe kwa heni." 33 Kwa kulonga ahyo nakalajila ndaze vyoyobagama.

34 Lelo, lung'hongola lwa wanhu nalwidichila, "Twangulonjeligwa na malajizo ga hetwe kota Kilistu kochikala mazuwa gose. Kwanguweza ndaze kulonga kota Mwana wa munhu kanguganigwa yenuligwe? Ayo Mwana wa munhu ndo whaani?" 35 Yesu nakawalonjela, "Lumuli lung'hali kwa hemwe kwa mhela uchefu. Mjende mng'hali na lumuli alo leka jiza ileche kuwapata, kwa vila yalingujenda kuli jiza hambe yavizele koyalinguluta. 36 Lelo, kwa vila mwanalo lumuli muukunde leka muwe wanhu wa lumuli." Loyasindile kulonga ulonzi awo, Yesu nakaluta na kivisa kutali na hewo.

37 Hanga Yesu nakalajila vinduzanduza avyo vyeng'ha hali hewo, hewo nahawamkundile. 38 Ahyo ulonzi woyalonjile Mloli Isaya nawenela,

"Mkulu, whaani yaukundile usenga wa hetwe?

Na ludali lwa Mkulu Nguluwi nalulajilwa kwa whaani?"

39 Ahyo hawawezile kukunda, kwa vila Isaya kangulonga honhu hanji,

40 "Nguluwi nakagadinya meho ga hewo,

na kuzidita nhumbula za hewo zigagadale,

leka waleche kulola kwa meho gawo,

ne kuvizela kwa nyhala za hewo,

leka waleche kuhinduka kwa heni,

leka ndiwalohole, yolonga Mkulu Nguluwi."

41 Isaya nakalonga ulonzi awu kwa vila nakawona ukulu wa Yesu, nakalonga mbuli za heye.

42 Ahyo, vilongozi wenji wa Wayahudi nawamkunda Yesu. Ila kwa chiwalo cha Mafalisayo, nahawalonjile hazelu kwa kudumba kota wowinjigwa kuli sunagogi. 43 Nawagana kutogoligwa na wanhu kusinda kutoligwa na Nguluwi.

44 Hamba Yesu nakalonga kwa lizi likulu, "Munhu yalingung'hunda, halingung'hunda heni yeka, ila kangumkunda kahi yandajize. 45 Yalingumbona heni kangumona kahi yandajize. 46 Heni ndo lumuli, nambuya kuli isi leka wanhu weng'ha walingung'hunda waleche kuwa kuli jiza. 47 Yalinguuhulika ulonzi wa heni ila hambe yaubate, heni hambe ndimtaguse, kwa vila suyile kuitagusa isi ila kuilohola. 48 Yohambe yaubate ulonzi wa heni kanaye wa kumtagusa, ulonzi wula wondonjile ndo mtagusa wa heye kuli zuwa lya kuduma. 49 Silonjile kwa ludali lwa heni yeka, ila Mhaza yandajize nakandonjela choni cha kulonga na ndonje ndaze. 50 Nani ndanguvizela kota ilajizo lya heye lyangigala ukomu wa mazuwa gose. Lelo, ndangulonga gala Mhaza goyandajize ndigalonje."