1 Logamalile ago, Yesu nayali yojenda ako Galilaya. Nahaganile kujenda kuli mkowa wa Yudeya kwa vila wandewa wa Wayahudi nawali wogana kumkopola. 2 Mnvina ya Wayahudi ya vibumuli nayali habehi. 3 Lelo, wang'holoze Yesu nawamlonjela, "Wuche hano, ulute Yudeya leka walanguswa wa hegwe wajone mijito ja hegwe joulingukola. 4 Munhu hambe yadite mbuli kwa uviso wone kangugana kuzeleka kwa wanhu. Kwa vila kwangudita mbuli azi, lelo wizelese kuli isi." 5 Mbaka wang'holoze Yesu nahawamkundile. 6 Lelo, Yesu nakawalojela, "Mhela wa heni haunafika, ila kwa hemwe chila mhela wa goya. 7 Isi haiweza kuwazudila hemwe, ila heni yanguzudila kwa vila ndangulavya ulolezi kwa chiwalo cha heye kota madito gake ndo geha. 8 Hemwe mlute kuli mnvina ayo. Heni siluta kuli mnvina ayo, kwa vila mhela wa heni haunafika." 9 Nakalonga ago, nakapona Galilaya.

10 Wang'holoze lowalutile kuli mnvina, Yesu naye nakaluta ila kwa uviso. 11 Vilongozi wa Wayahudi nawali wompala Yesu kuli mnvina ayo, nawauza, "Kakohi?"

12 Nakwali na kupwepwa kwinji hali lung'hongola. Wamwe wa hewo nawalonga, "Ndo munhu yanojile." Wanji nawalonga, "Hebu! Kanguwajiliza wanhu." 13 Haduhu munhu ne yumwe yajezile kulonga mbuli za heye hazelu kwa kuwadumba vilongozi wa Wayahudi.

14 Mnvina ayo loifichile hagati, Yesu naye nakaluta kuli ng'handa ya Nguluwi, nakaluka kulangusa. 15 Lelo, Wayahudi nawabubuwala na kulonga, "Munhu ayu nakapata kohi uwanzi na hasomile?" 16 Aho Yesu nakawedichila, "Malanguso gondilingulangusa hagawele ga heni, ila ndo ga heye yandajize. 17 Munhu yalingugana kudita gala goyalingugana Nguluwi, kovizela kota malanguso ga heni nagalawa kwa Nguluwi, ama ndangilonjela hela. 18 Heye yalingilonjela hela kangupala lutogo lwa heye yuye, ila yalingupala kumtogola yula yamlajize, ayo ndo wa kitumbila na mgati mwake mwahela wihe woneche. 19 Ndaze, Musa hawapele malajizo? Ila haduhu ne yumwe wa hemwe yalinguwinza ago malajizo. Lekachoni mwangugana kung'hopola?" 20 Aho wanhu nawamwidichila, "Kuna chijeni hegwe! Whaani yalingugana kukukopola?"

21 Yesu nakawedichila, "Hana mbuli imwe yonditile, namwe mwangububuwala kwa mbuli ayo. 22 Musa nakawapa chila chihendo cha kwinjiza ikumbi. Chihendo acho hachiwele nachilawa kwa Musa, ila nachilawa kwa wasekulu. Lelo hemwe hamlingumwinjiza munhu ikumbi kuli Zuwa lya Kwesela. 23 Wone munhu kangwinjizwa ikumbi kuli Zuwa lya Kwesela leka ilajizo lileche kubenigwa, lekachoni mwangunzudila kwa vila nandimdita munhu yawe mkomu kuli Zuwa lya Kwesela? 24 Mleche kutagusa mbuli yoneche kwa kulola hela, mlavye utaguso kwa hachi."

25 Wanhu wamwe wa Yelusalemu nawalonga, "Ndaze, yula munhu walingumpala wamkopole hawele ayu? 26 Mlole! Kanguwakanya hazelu ne haduhu munhu yalingumlonjela chinhu. Ama vilongozi nawavizela kota ayu ndo Kilistu? 27 Kilistu hoyokuya haduhu munhu yovizela honhu hoyalawile, ila hetwe twanguvizela koyalawile munhu ayu!"

28 Lelo, Yesu loyawele yolangusa kuli ng'handa ya Nguluwi nakakwiniza lizi na kulonga, "Hemwe mwangunzela na kuhazela kondawile. Suyile kwa chiwalo cha heni, ila heye yandajize ndo wa kukomya namwe hamzelele. 29 Ila heni ndangumzela kwa vila nandawa kwa heye, naye ndo yandajize."

30 Lelo, wanhu nawagana kumibata, ila haduhu munhu yawezile kumibata kwa vila mhela wa heye nawali haunafika. 31 Nawo wanhu wenji nawamkunda, nawalonga, "Ndaze, Kilistu hoyokuya kodita ulajilo ukulu ng'hatu kusinda munhu ayu?"

32 Mafalisayo nawawahulika wanhu wopwepwa ulonzi awo kuwala Yesu. Lelo, hewo hamwe na watambika wakulu nawawalajiza wamizi wamibate. 33 Yesu nakalonga, "Heni nda hamwe na hemwe kwa mhela uchefu, hamba ndoluta kwa heye yandajize. 34 Momhala ila hammbona na honhu hondiwa hemwe hamuweza kufika."

35 Vilongozi wa Wayahudi nawalongasa, "Munhu ayu koluta kohi kuwele hetwe hatuweza kumfika? Koluta kwa Wayahudi wasambaluche hali Wagilichi na kuwalangusa Wagilichi? 36 Kana mana yachi hoyolonga, ‘Momhala ila hambona na hala hondiwa hemwe hamuweza kufika?’ "

37 Zuwa lya kuduma lya mnvina, zuwa lila likulu. Yesu nakema, nakalonga kwa lizi likulu, "Munhu yoneche yawele na ng'halu, yoye kwa heni yanwe. 38 Kota Maandiko Matakatifu vyogalingulonga, ‘Yalingung'hunda, nzanda za mazi ga ukomu zochililika kulawa kuli nhumbula ya heye.’ " 39 Nakalonga ago kuwala Muhe yawele wala wamkundile wombochela. Mhela awo Muhe Yelile nayali hanafika kwa vila Yesu nayali hanapegwa ukulu na Nguluwi.

40 Wanhu wamwe kuli lula lung'hongola nawahulika ulonzi awo, nawalonga, "Ndikomya, munhu ayu ndo yula mloli!" 41 Wanji nawalonga, "Ayu ndo Kilistu!" Ila wanji nawalonga, "Ndaze, Kilistu koweza kulawa Galilaya? 42 Ndaze, Maandiko Matakatifu hambe galonje kota Kilistu kokuya kulawa kuli lukolo lwa Daudi na kulawa Betelehemu kuli muji woyekale Daudi?" 43 Ayo wanhu nawebagula kwa chiwalo cha Yesu. 44 Wanhu wamwe nawagana kumibata ila kuduhu yawezile kumdoliza.

45 Hamba wala wamizi nawahiluka kwa watambika wakulu na Mafalisayo, nawo nawawauza, "Lekachoni hammigale?" 46 Wamizi nawedichila, "Haduhu munhu yawezile kulonga kota heye!" 47 Mafalisayo nawawauza, "Ndaze, namwe namuhadigwa? 48 Ndaze, hana chilongozi yoneche ama yumwe wa Mafalisayo yamkundile? 49 Ila lung'hongola alu halugazelele malajizo ga Musa, nalupanjilwa." 50 Aho Nikodemo, yula yawele nakaluta kwa Yesu zuwa limwe nechilo, yawele nayali yumwe wa hewo nakauza, 51 "Ndaze, malajizo ga hetwe gangukundiza kumtagusa munhu ne kumhulichiza na kuvizela goyaditile?" 52 Nawo nawamwidichila, "Ndaze, nagwe nakulawa Galilaya? Lelo, kagalole goya Maandiko Matakatifu nagwe kogona kota Galilaya hakulawaga Mloli." 53 Hamba weng'ha nawoka, chila munhu nakaluta haluga hake.