1 Yesu loyasindile kulonga ago, nakaluta hamwe na walanguswa wa heye kumwambu mwa kazanda ka Kediloni. Honhu aho nahali na kagunda, naye Yesu nakenjila amo hamwe na walanguswa wa heye. 2 Yudasi, yambelenhuche Yesu, nakahazela honhu aho kwa vila mala nyinji Yesu nayali yochiting'hana na walanguswa wa heye aho. 3 Lelo, Yudasi nakachilongoza chilundo cha wamizi kulawa kwa watambika wakulu na Mafalisayo, nawoya kuli kagunda kuno wawele na vyenje na vinhu vya kitowela ngondo. 4 Yesu nakagazela geng'ha gawele gomlawila, nakaluta kwa hewo, nakawauza, "Mwangumpala whaani?" 5 Nawo nawamwidichila, "Yesu wa Nasaleti!" Yesu nakawalonjela, "Heni ndo nene." Yudasi, yawele nakamhinduka Yesu nayali yemile hamwe na hewo.

6 Lelo, Yesu loyawalonjele, "Heni ndo nene," nawahiluka kumbele na kugwa. 7 Yesu nakawauza kahi, "Mwangumpala whaani?" Nawamwidichila, "Yesu wa Nasaleti!" 8 Yesu nakawalonjela, "Nandiwalonjela kota heni ndo nene. Lelo, wone mwangumhala heni, muwaleche awa walute." 9 Nakalonga ago leka wenele wula ulonzi woyalonjile, "Simwajilize ne yumwe hali wala umhele." 10 Simoni Petili nayali na ipanga, lelo, nakalisomola, nakamdumula ikutu lya kudilo lya chitumagwa wa mtambika mkulu. Chitumagwa ayo nakachemigwa Malichi. 11 Lelo, Yesu nakamlonjela Petili, "Uhiluse ipanga lyako kuli yala. Ndaze, ndeche kunwa chizombe cha magazo choyamhele Mhaza?"

12 Chila chilundo cha wamizi chiwele hamwe na vilongozi na wamizi wa Wayahudi nawamibata Yesu na kumuwoha 13 na kuhilika kwa Anasi, mkweye Kayafa yawele nayali mtambika mkulu kuli mwaka awo. 14 Ayo Kayafa nayali yawalonjele Wayahudi kota naimgana munhu yumwe yabagame kwa chiwalo cha wanhu.

15 Simoni Petili hamwe na mlanguswa yunji nawamuwinza Yesu. Ayo mlanguswa yunji nayali yozeleka na mtambika mkulu, ahyo nakenjila hamwe na Yesu kuli lugagala lwa mtambika mkulu. 16 Ila Petili nayali yemile hanze, habehi na lwizi. Lelo, ayo mlanguswa yunji yawele yozeleka na mtambika mkulu nakalawa hanze nakalonga na yalingwamila lwizi, nakamkundiza Petili yenjile mgati. 17 Yalingwamila lwizi nakamuuza Petili, "Ndaze, nagwe kwa yumwe wa mlanguswa wa munhu ayu?" Petili nakamwidichila, "Siwele heni!"

18 Vitumagwa na wamizi nawali wabwinhile chiluli kwa vila nakwali na chipute, nawali wokota chiluli. Naye Petili nayali yemile hamwe na hewo yokota chiluli.

19 Lelo, mtambika mkulu nakamuuza Yesu kuwala walanguswa wa heye na malanguso ga heye. 20 Yesu nakamwidichila, "Nandonga hazelu na chila munhu. Chila mhela nandangusa kuli masunagogi na kuli ng'handa ya Nguluwi, honhu howalingiting'hana Wayahudi weng'ha na silonjile chinhu choneche kwa uviso. 21 Lekachoni kwangumbuza? Uwauze wala wawele nawahulika choni chondiwalonjele. Hewo wanguvizela gondiwalonjele." 22 Loyalonjile ago mwamizi yumwe yawele nakema aho nakamsubula kuno yolonga, "Ndaze, ahi ndo vyoumwidichila mtambika mkulu?" 23 Yesu nakamwidichila, "Wone nandonga vibi, ulajile awo wihe, ila wone nandonga goya, lekachoni kwangugubula?" 24 Lelo, Anasi nakamhilika Yesu yawele yawohigwe, kwa mtambika mkulu yalinguchemigwa Kayafa.

25 Simoni Petili nayali aho yokota chiluli. Lelo, nawamuuza, "Ndaze, nagwe hauwele yumwe wa walanguswa wa heye?" Heye nakabela na kulonga, "Siwele heni!" 26 Yumwe wa vitumagwa wa mtambika mkulu, mng'holoze yula yatemigwe ikutu na Petili, nakamuuza, "Ndaze, sikuwene kula kuli kagunda hamwe na heye?" 27 Petili nakabela kahi, baho du izogolo nalika.

28 Lelo, nawamhola Yesu kulawa kwa Kayafa, nawamigala kuli ng'handa ya mndewa. Nayali lufuku, leka waleche kukokomoka kwa kiwhana na chihendo cha kulanda, Wayahudi nahawenjile mgati kwa chiwalo cha malajizo gawo. Wahoneche kota nawakokomoka wone nawenjile kuli ng'handa ya munhu hawele Myahudi na hawali kundizwa kihanza kuli mnvina ya Pasaka. 29 Ahyo, Pilato nakalawa mgati, nakawauza, "Namigala ulonjelezi wachi kuwala munhu ayu?" 30 Nawamwidichila, "Wone munhu ayu nahawele mwihe hatwali kumigala kwa hegwe." 31 Pilato nakawalonjela, "Mumhole hemwe, mkamtaguse kwa kiwhana na malajizo ga hemwe." Wayahudi nawamwidichila, "Hetwe twahela ludali lwa kumtagusa munhu yoneche." 32 Nawalonga ahyo leka wula ulonzi woyalonjile Yesu kuwala ndaze vyoyobagama wenele. 33 Pilato nakenjila kahi mgati mwa ng'handa ya chiundewa, nakamchema Yesu na kumuuza, "Hegwe ndo mndewa wa Wayahudi?" 34 Yesu nakamwidichila, "Ndaze, awo ndo ulonzi wa hegwe ama wanji nawakulonjela mbuli za heni?" 35 Pilato nakamwidichila, "Ndaze, heni nda Myahudi? Wanhu wa isi ya hegwe na wakulu wa watambika nawakigala kwa heni. Nakudita wihe wachi?" 36 Yesu nakamwidichila, "Undewa wa heni hauwele wa isi ino. Wone undewa wa heni wahawele wa isi ino, vitumagwa wa heni wahandewele leka ndeche kibatigwa na Wayahudi. Ila undewa wa heni hauwele wa kuli isi." 37 Pilato nakamuuza, "Lelo, hegwe kwa mndewa?" Yesu nakamwidichila, "Hegwe kwangulonga kota heni nda mndewa. Heni namhondigwa kwa chiwalo acho na kwa chiwalo acho nambuya kuli isi kuwalonjela wanhu kuwala kukomya. Chila munhu wa kukomya kangunyhulichizaga." 38 Pilato nakamuuza, "Kukomya ndo chinhu chachi?"

Pilato loyalonjile ago, nakaluta kunze kwa Wayahudi, nakawalonjela, "Hambe mbone nongwa yoneche kwa heye. 39 Ila, mwanacho chihendo kota ndimdohole mnweng'wa yumwe kuli mhela wa Pasaka. Lelo, mwangugana ndimchumulile Mndewa wa Wayahudi?" 40 Aho nawatowa iyowe, "Hebu! Hawele ayu ila Balaba!" Naye Balaba nayali yalinguboka.