1 Vyogapulute ago, nakwali na mnvina ya Wayahudi, naye Yesu nakaluta Yelusalemu. 2 Ako Yelusalemu, habehi na lwizi lulinguchemigwa Lwizi lwa Ing'holo, nakwali na izimbo limwe lichemigwe kwa Chiebulaniya Betisata, liwele nalizungulutwa na lugagala banzi zihano. 3 Amo kuli lugagala namwali na watamwa wenji, wohambe walole na vyete na waziliche lukuli. Nawali wobeteza mazi gatiguligwe, 4 Kwa vila chila mhela mhilisi nayali yodulika kuli mazi na kugatigula. Munhu yoneche yawele kowa wa mwaluko kwinjila kuli mazi ago, nakaloholigwa utamwa woyawele nawo. 5 Lelo aho nakwali na munhu yawele na utamwa kwa mhela wa miyaka makumi gadatu na jine. 6 Yesu loyamuwene ayo munhu yawasile nakuvizela kota nayali yekale aho kwa mhela winji, nakamuuza, "Ndaze, kwangugana uwe mkomu?" 7 Yula mtamwa nakedichila, "Mkulu, heni ndahela munhu wa kunyhilika kuli mazi mhela hogotiguligwa. Chila hondijeza kwinjila munhu yunji kangulongola kwinjila." 8 Yesu nakamlonjela, "Winuche, uhole mcheka wako, ulute." 9 Baho du, ayo munhu nakawa mkomu, nakahola mcheka wake nakaluka kujenda. Mbuli ayi naikoleka kuli Zuwa lya Kwesela. 10 Ahyo wamwe wa Wayahudi nawamlonjela ayo munhu yaloholigwe, "Lehano ndo Zuwa lya Kwesela hailinguganigwa kupika mcheka wako."

11 Ila heye nakawalonjela, "Yula munhu yawele nakandohola ndo yandonjele, ‘Uhole mcheka wako, ulute.’ " 12 Nawo nawamuuza, "Ayo munhu yawele nakakulonjela, ‘Uhole mcheka wako, ulute,’ ndo whaani?" 13 Ila heye nahamzelele munhu yamlohole, kwa vila Yesu nayali yochile honhu hala kuli lung'hongola lwa wanhu. 14 Hamba Yesu nakamfika yula munhu yaloholigwe kuli Ng'handa ya Nguluwi, nakamlonjela, "Lelo nakuloholigwa, uleche kudita gehile kahi leka uleche kufichigwa na mbuli yihile." 15 Yula munhu nakaluta kuwalonjela wala Wayahudi kota Yesu ndo yamlohole heye. 16 Ahyo Wayahudi nawaluka kumtunya Yesu, kwa vila nayali yodita mbuli azo kuli Zuwa lya Kwesela. 17 Lelo, Yesu nakawalonjela, "Mhaza wa heni kangukola mijito mazuwa gose, nani ndangudita hiho."

18 Kwa chiwalo cha ulonzi awu, vilongozi wa Wayahudi nawalutilila kupala nzila ya kumkopola Yesu, haiwele kota nakabena mzilo wa Zuwa lya Kwesela hela ila kwa vila nakalonga kota Nguluwi ndo Mhaza wa heye, ahyo nakewhaniza na Nguluwi.

19 Yesu nakawalonjela, "Ndikomya ndanguwalonjela, Mwana howeza kudita chinhu yaliyeka, kanguweza kudita chila choyodita Mhaza, kwa vila choyodita Mhaza, Mwana kodita hihila. 20 Mhaza kangumganaga Mwana na kumlajila chila chinhu choyodita heye, kahi komlajila mbuli ng'hulu kusinda azi, namwe mobubuwala. 21 Kota vila Mhaza vyoyowazilipulaga wabagame na kuwapa ukomu, hihyo du naye Mwana kawapaga ukomu wala yalinguwagana. 22 Mhaza hambe yamtaguse munhu yoneche, mbuli yeng'ha ya utaguso nakamlechela Mwana, 23 leka wanhu weng'ha wamhulichize Mwana kota vila vyowalingumhulichiza Mhaza. Yohambe yamhulichize Mwana halingumhulichiza Mhaza yawele yamlajize.

24 "Ndikomya ndanguwalonjela, yalinguhulichiza ulonzi wa heni na kumkunda yula yandajize, kana ukomu wa mazuwa gose. Hotagusigwa, ila kowa yalochile kulawa kuli kubagama na kwinjila kuli ukomu. 25 Ndikomya ndanguwalonjela, mhela wanguya, naufika, uwele wabagame wolihulika lizi lya Mwana wa Nguluwi, nawo wawele woihulika wowa na ukomu. 26 Kota vila Mhaza vyoyawele mwaluko wa ukomu, hihyo du ndo nakamha Mwanage yawe mwaluko wa ukomu. 27 Kahi nakamha ludali lwa kutagusa kwa chiwalo heye ndo Mwana wa munhu. 28 Mleche kububuwala kwa mbuli ayi mwa vila mhela wanguya uwele weng'ha kuli vilaga wohulika lizi alyo, 29 nawo wozilipuka, wala waditile ganojile, wozilipuka na kikala na wala waditile gehile wozilipuka na kutagusigwa.

30 "Heni siweza kudita kwa ludali lwa heni yeka. Ndangutagusa kota vyondilinguhulika kulawa kwa Mhaza, nawo utaguso wa heni ndo wa hachi. Kunuwila kwa heni hakuwele kwa kugana heni, ila vyoyogana heye yandajize. 31 Wone nandonje kuwala heni, ulolezi wa heni haukundigwa kota wa kukomya. 32 Ila kabaho yunji yawele kolavya ulolezi kuwala heni, nani ndanguvizela kota geng'ha goyalingulonga kuwala heni ndo kakomya. 33 Hemwe namlajiza usenga kwa Yohani naye nakalonga kwa kukomya. 34 Haiwele heni ndangitumbila ulolezi wa wanhu, ila ndangulonga mbuli azi leka mloholigwe. 35 Yohani nayali kota chenje chilingwaka na kulangaza, namwe namwali goya kusangalala kwa chiwalo cha lumuli alo kwa mhela uchefu.

36 "Ila ndina ulolezi kuwala heni uwele ndo ukulu ng'hatu kusinda ula wa Yohani. Kwa vila mijito jondilingukola, mijito joyamhele Mhaza ndijikole, ndo jilingulonga kota Mhaza ndo yandajize. 37 Naye Mhaza yandajize nakalonga kuwala heni. Hemwe hamnawahika kuhulika lizi lya heye, ne kukona kumeho kwa heye 38 na usenga wa heye hambe ukale mgati mwa hemwe kwa vila hammkundile yula yamlajize. 39 Hemwe mwangugalolaga goya Maandiko Matakatifu kuno mchijesa kota mgati mwake mopata ukomu wa mazuwa gose, maandiko gago gangulonga kuwala heni. 40 Ila hemwe mwangulema kuya kwa heni leka muwe na ukomu.

41 "Silingupala kutogoligwa na wanhu. 42 Ila ndanguwazela hemwe, ndanguvizela kota mwahela igano lya Nguluwi kuli nhumbula za hemwe. 43 Nambuya kwa ludali lwa Mhaza wa heni, ila hambe mmbochele heni, ila munhu yunji hoyokuya kwa ludali lwake yuye mombochela. 44 Mwanguweza ndaze kukunda hanga hemwe mwangugana kubochela lutogo kulawa kwa hemwe, ne hambe mpale lutogo kulawa kwa heye yuye yawele yaliyeka kwa Nguluwi? 45 Mleche kijesa kota heni ndoyowalonjeleza kwa Mhaza. Musa yawele hemwe namumtumbila ndo yowalonjeleza. 46 Wone nahamkundile Musa, mwahang'hundile heni kahi, kwa vila Musa nakandika kuwala heni. 47 Ila hambe mgakunde gala goyandiche, lelo moweza ndaze kukunda ulonzi wa heni?"