1 Aho mwaluko nakwali na ulonzi na awo ulonzi nawali hamwe na Nguluwi, nawo ulonzi nawali Nguluwi. 2 Kulawa mwaluko awo ulonzi nawali hamwe na Nguluwi. 3 Kwa kukolela heye, vinhu vyeng'ha navilumbigwa, haduhu choneche chilumbigwe ne heye. 4 Heye nayali mwaluko wa ukomu na awo ukomu nawali lumuli lwa wanhu. 5 Lumuli alo lwangulangazaga kuli jiza, nalo jiza haluwezile kuusumya.

6 Nguluwi nakamlajiza munhu yumwe itagwa lyake Yohani, 7 Yawele nakoya kuwalonjela wanhu kuwala mbuli za alo lumuli. Nakoya leka kwa usenga wa heye wanhu weng'ha wakunde. 8 Heye hawele alo lumuli, ila nakoya hela kuwalonjela wanhu kuwala alo lumuli. 9 Alu ndo lumuli lwa kukomya ng'hatu, lumuli lulinguya kuli isi na kuwalangazila wanhu weng'ha.

10 Lelo, Ulonzi nawali kuli isi, kwa kukolela alo lumuli isi nailumbigwa, ila isi nahaluuzelele ulonzi. 11 Nawuya kuli isi ya heye, ila hewo wanhu hawaubochele ulonzi awo. 12 Ila wala wanhu waubochele na waukundile, nauwapa ludali lwa kuwa wana wa Nguluwi, 13 wawele hawapondigwe kwa danda ne kwa igano lya lukuli ama kwa igano lya munhu, ila kwa igano lya Nguluwi.

14 Nawo ulonzi nauwa munhu, naukala kwa hetwe. Natwe natuwona welile wake, welile wake uwele ndo Mwana wa udewele wa Mhaza, naumema uganililo na kukomya.

15 Yohani nakawalonjela wanhu mbuli zake, nakalonga kwa lizi, "Ayu ndo yula ndiwalonjele kota, ‘Kanguya munhu yumwe honhu ha heni yawele ndo mkulu kusinda heni, kwa vila heye nayali kung'hali heni kupondigwa.’ "

16 Kwa kiwhana kwa kugoloka kwa heye, hetwe tweng'ha natubochela uganililo winji. 17 Kwa vila Nguluwi nakalavya malajizo kwa kukolela Musa, nawo uganililo wa kukomya nawutuyila kwa kukolela Yesu Kilistu. 18 Haduhu munhu yamuwene Nguluwi ne hado. Ila mwana wa udewele yewhanile na Nguluwi yawele yelumbile na Mhaza, ayo ndo yatuzelese mbuli za Nguluwi.

19 Awu ndo ulolezi uwele Yohani nakaulavya mhela vilongozi wa Wayahudi lowawalajize watambika na Walawi kulawa Yelusalemu leka wamuuze, "Hegwe kwa whaani?" 20 Yohani halemile kwidichila choyauzigwe, ila nakalonga ne kuvisa, "Heni siwele Kilistu." 21 Aho nawamuuza, "Lelo hegwe kwa whaani? Hegwe kwa Eliya?" Yohani nakedichila, "Hebu. Heni siwele Eliya." Nawamuuza, "Hegwe ndo yula Mloli?" Yohani nakedichila, "Hebu!" 22 Ahyo nawamuuza, "Lelo hegwe kwa whaani? Kwangulonga choni kuwala hegwe? Tulonjele leka tuwahilusile kwidichila kwa hegwe wala watulajize." 23 Yohani nakawedichila, "Heni ndo yula yawele mloli Isaya nakalonga mbuli zake kota,

" ‘Lizi lya munhu lyanguchema kugunuche,

mgolose nzila ya Mkulu.’ "

24 Awo wanhu nawali walajizwe na Mafalisayo. 25 Lelo nawamuuza Yohani, "Wone hegwe hauwele Kilistu ne Eliya ne yula mloli, Iekachoni kwangubatiza?"

26 Yohani nakedichila, "Heni ndangubatiza kwa mazi, ila kabaho yumwe hali hemwe yohamzelele. 27 Ayo kanguya honhu ha heni, ila heni hambe nganigwe ne kudohola ng'weso za makwamba ga heye." Munhu yalinguvala makwamba

28 Mbuli azi nazikoleka ako Betaniya, kumwambu mwa lwanda lwa Yolodani kuwele Yohani nayali yowabatiza wanhu.

29 Zuwa liwinzile, Yohani nakamona Yesu yokuya kwa heye, nakalonga, "Ayu ndo lyana ing'holo lya Nguluwi, lilingusa gehile ga isi yeng'ha! 30 Ayu ndo yula munhu yondiwalonjele kota, ‘Munhu kanguya honhu ha heni yawele ndo mkulu kusinda heni, kwa vila nayali kung'hali heni sinapondigwa!’ 31 Nani nasimzelele, ila nambuya kubatiza kwa mazi leka wanhu wa Isilaeli wamzele."

32 Yohani kalavya ulolezi awu, "Nandimona Muhe Yelile yodulika kota ng'hunda kulawa kilanga na kugwa mchanya mwa heye. 33 Heni nasimzelele, ila yula yandajize kubatiza wanhu kwa mazi nayali yandonjele, ‘Wone komona munhu yawele Muhe Yelile yodulika kwa heye kulawa kilanga na kugwa mchanya mwa heye, ayo ndo yalingubatiza kwa Muhe Yelile.’ 34 Heni nambona mbuli ayi kota ayu ndo Mwana wa Nguluwi."

35 Hamitondo, Yohani nayali ako kahi na walanguswa wa heye weli. 36 Loyamuwene Yesu yokola, nakalonga, "Mlole! Ayu ndo lyana ing'holo lya Nguluwi!" 37 Wala walanguswa weli lowamhuliche Yohani, wamuwinza Yesu. 38 Lelo Yesu nakahinduka, nakawona awo walanguswa womuwinza heye, nakawauza, "Mwangupala choni?" Nawo nawedichila, "Labi, kwangikala kohi?" Labi mana yake mlangusa. 39 Yesu nakawalonjela, "Muye, namwe mohona." Awo walanguswa nawamuwinza, nawahona honhu hoyawele ngikala, nawekala naye zuwa alyo. Nayali kota saa kumi matinazo.

40 Andeleya, mng'holoze Simoni Petili, nayali yumwe wa awo weli wamhuliche Yohani yolonga ago, naye ndo yamuwinzile Yesu. 41 Andeleya nakampala Simoni mng'holoze, nakamlonjela, "Natumona Masihi." Mina ndo Kilistu. 42 Hamba nakamigala Simoni kwa Yesu. Naye Yesu nakamlola Simoni nakalonga, "Hegwe ndo Simoni mwana Yohani. Ila kulawila sambi kochemigwa Kefa." Chigilichi ndo Petili lilinguzeleka kota italawe.

43 Zuwa liyage Yesu nakamula yalute Galilaya. Nakamfika Filipo nakamlonjela, "Umbinze." 44 Filipo nayali mwenyeng'haye wa Betisaida, muji mowalawile Andeleya na Petili. 45 Naye Filipo nakamfika Natanaeli, nakamlonjela, "Natumona munhu yawele Musa nakandika kuwala heye kuli chitabu cha Malajizo na waloli nawandika mbuli za heye, mina ndo Yesu mwana wa Yusufu, kulawa Nasaleti." 46 Natanaeli nakamuuza Filipo, "Ndaze, chinhu chinojile choweza kulawa Nasaleti?" Filipo kamwidichila, "Uye ulole." 47 Yesu lowamuwene Natanaeli yokuya kwa heye, nakalonga, "Mlole! Ayu ndo Muisilaeli wa kukomya, kahela uhadi mgati mwake." 48 Natanaeli nakamuuza Yesu, "Nakunzela ndaze?" Yesu nakamlonjela, "Nandikona hala houwele hasi ha igodi lya mtini, kung'hali Filipo hanakuchema, nandikona." 49 Aho Natanaeli nakalonga, "Mlangusa, hegwe ndo Mwana wa Nguluwi. Hegwe ndo Mndewa wa Isilaeli!" 50 Yesu nakamlonjela Natanaeli, "Ndaze, nakukunda kwa vila nandikulonjela kota nandikona hasi hali igodi lya mtini? Kogona makulu ng'hatu kusinda aga." 51 Yesu nakalutilila kuwalonjela, "Ndikomya ndanguwalonjela, mokona ulanga wangugubuka na wahilisi wa Nguluwi wokwina na kudulika mchanya mwa Mwana wa munhu."