1 Kuli zuwa lya mwaluko lufuku ng'hatu, wala wadala nawahola wula unhunyililo wowauwichile goya, nawaluta kuli chilaga. 2 Nawalifika lila iganga lidinyile chilaga, liwichigwe kutali na chilaga.Iganga lihejezwe hafungo mwa chilaga 3 Lowenjile mgati, hawaluwene lukuli lwa Mkulu Yesu. 4 Lowawele wabubuwale kuwala mbuli ayo, baho du wanhu weli wavalile mivalo jilingupulika lukami kota lumwemwesa, nawema habehi na hewo. 5 Awo wadala nawawa na lunhwinhwi, nawenamiza hasi. Aho wala wanhu nawawalonjela, "Lekachoni mwangumpala yawele mkomu kuli wabagame? 6 Kahaduhu hano, nakazilipuka. Mkumbuchile choyawalonjele loyawele kula Galilaya, 7 ‘Yanguganigwa Mwana wa munhu yalavigwe kwa wanhu wehile, nawo womuwamba na zuwa lya kadatu kozilipuka.’ "

8 Aho wala wadala nawaukumbuchila ulonzi wa Yesu. 9 Lowahiluche kulawa kuli chilaga, nawawalonjela wala walanguswa kumi na yumwe na wanhu weng'ha kuwala mbuli azo zeng'ha. 10 Awo walonjile mbuli azo kwa watumigwa ndo, Maliya Madelena na Yohana na Maliya mayake Yakubu na wadala wanji walutile hamwe kuli chilaga. 11 Ila watumigwa hawakundile ulonzi awo wa awo wadala, kwa vila ulonzi awo nawoneka kota upoka. 12 Ila Petili nakalawa, nakaluta yobilima mbaka kuli chilaga. Loyafichile, nakenamiza na kusunjilila mgati, nakayona sanda hela. Nakahiluka haluga kuno yabubuwale kwa gala galawile.

13 Kuli zuwa lilila, walanguswa weli wa Yesu nawali mzila woluta kuli chijiji chilinguchemigwa Emau chiwele utali wa kilomita kumi na imwe kulawa Yelusalemu. 14 Nawali wolongasa kuwala gala geng'ha galawile. 15 Lowawele wolongasa Yesu nakalawila, nakajenda hamwe na hewo. 16 Nawamona ila meho gawo nagalemezwa leka waleche kumzela. 17 Nakawauza, "Mwangulongasa choni kuno mjenda?" Nawo nawema ne kulonga chinhu kuno kumeho kwa hewo nakwali na masinzo. 18 Yumwe wa hewo yalinguchemigwa Kiliopasi, nakamuuza, "Ndaze, hegwe ndo mjenzi hano Yelusalemu uwele hulinguvizela galawile kuli mazuwa gano?"

19 Naye nakawauza, "Mbuli zachi?" Nawo nawamwidichila, "Mbuli zimfichile Yesu wa Nasaleti. Heye nayali mloli yawele na ludali lukulu kuli ulonzi wa heye na madito gake, hali Nguluwi na hali wanhu weng'ha. 20 Watambika wakulu na vilongozi wa hetwe nawamlavya yatagusigwe kubagama, nawamuwamba. 21 Ila hetwe natwali tuchitumbila kota heye ndo koigombola Isilaeli. Mzidi wa ago, lehano ndo zuwa lya kadatu kulawila mbuli azo vyozikoleche. 22 Hihyo du wamwe wa wadala kulawa kuli chilundo cha hetwe nawatukabusa. Nawaluta kuli chilaga lehano mitondo, 23 ila hawalufichile lukuli lwake. Nawahiluka nawalonga kota nawalawilwa na wahilisi wa kilanga, nawawalonjela kota Yesu kamkomu. 24 Hamba wamwe wa wayetu nawaluta kuli chilaga, nawafika kota hila wadala vyowalonjile, ila nawo hawamuwene."

25 Yesu nakawalonjela, "Lekachoni mwawapoka ahi na nhumbula za hemwe hambe zikunde geng'ha galonjigwe na waloli? 26 Ndaze, haimganile Kilistu kugazigwa kwa nzila ayo hamba yenjile kuli welile wa heye?" 27 Nakawatang'hulila mbuli zeng'ha zilingumuwala heye kuli Maandiko Matakatifu, kwaluchila chitabu cha Musa mbaka waloli weng'ha.

28 Lowawele habehi na chila chijiji chowawele woluta, Yesu nakawa kota yalingulutilila kumwando, 29 ila hewo nawamdedeza wolonga, "Wikale hamwe na hetwe kwa vila sambi ndo matinazo na nechilo yahabehi." Lelo, nakenjila mgati, nakekala hamwe na hewo. 30 Loyekalise kulya hamwe na hewo, nakalihola ibumunda, nakalitambichiza, nakalimogola, nakawapa. 31 Baho du meho ga hewo nagagubuligwa, nawamzela, ila heye nakajilila, hawamuwene kahi. 32 Lelo nawalongasa, "Ndaze, nhumbula za hetwe haziwele zikwaka mgati mwa hetwe mhela loyawele yotutang'hulila Maandiko Matakatifu kula mzila?"

33 Nawoka mhela wuwula, nawahiluka Yelusalemu, nawawafika wala watumigwa kumi na yumwe na wala wanji wawele hamwe na hewo, wekungajize 34 wolonga, "Ndikomya Mkulu nakazilipuka, nakamlawila Simoni." 35 Hamba wala walanguswa weli nawawalonjela gala galawile mnzila na ndaze vyowamzelele Yesu kwa kumogola ibumunda.

36 Vyowawele wowalonjela ago, Yesu nakema hali hewo, nakawalonjela, "Mikale goya." 37 Nawatinhuka na kudumba wochiijesa kota nawalyona ihoka. 38 Ila Yesu nakawauza, "Lekachoni mwangudumba? Lekachoni namuwa na lunhwinhwi mnhumbula za hemwe? 39 Mlole moko na magulu ga heni, ndo nene baha. Mndolize leka mtawize, kwa vila ihoka lyahela lukuli na mizeje kota vyomlingumbona."

40 Loyasindile kulonga ago nakawalajila moko na magulu gake. 41 Lowawele kuli kulemwela kukunda kwa chiwalo cha kusangalala na kububuwala kwa hewo, nakawauza, "Mwanacho chilyo choneche hano?" 42 Nawamha chihande cha somba ibanichigwe. 43 Naye nakachihola na kulya hali hewo. 44 Hamba nakawalonjela, "Aga ndo gala gondiwalonjele londiwele hamwe na hemwe, kota geng'ha gandichigwe kuwala heni kuli malajizo ga Musa na kuli vitabu vya waloli na kuli chitabu cha Zabuli."

45 Aho nakagubula nyhala za hewo leka wavizele Maandiko Matakatifu. 46 Nakawalonjela, "Ndo vyoyandichigwe kota Kilistu kogazigwa na kuli zuwa lya kadatu kozilipuka kulawa kuli isi ya wabagame, 47 kulonga gehile na kulechelwa gehile vyowikuligwa kuli wanhu wa isi zeng'ha kwa kukolela itagwa lya heye kwaluchila Yelusalemu. 48 Hemwe ndo mwawalolezi wa mbuli azi. 49 Nene baha ndowagalila yula yawele Mhaza nakalagana na heni kota komlajiza, ila mbeteze aku mjini mbaka hompegwa wula mong'ho ulingulawa kilanga."

50 Hamba nakawalongoza mbaka Betaniya, nakenula moko gake kuchanya, nakawatambichiza. 51 Loyawele yowatambichiza, nakawaleka, nakaholigwa kilanga. 52 Hamba nawamfugamila na kuhiluka Yelusalemu wawele na usangalalo ukulu. 53 Nawo nawekala mhela weng'ha kuli ng'handa ya Nguluwi kuno womtogola Nguluwi.