1 Zuwa limwe, Yesu loyawele yowalangusa wanhu kuli ng'handa ya Nguluwi na kuwikula Mbuli Inojile, watambika wakulu na walangusa wa malajizo ga Musa hamwe na wasekulu nawafika, 2 nawalonga, "Tulonjele! Kwangudita mbuli azi kwa ludali lwachi? Whaani yakupele ludali alu?" 3 Yesu nakawedichila. "Nani ndowauza, 4 ludali lwa Yohani lwa kubatiza nalulawa kilanga kwa Nguluwi ama kwa wanhu?" 5 Ila hewo nawalongasa hewo kwa hewo wolonga, "Wone tulonje nalulawa kwa Nguluwi, kotuuza, ‘Lekachoni hamumkundile?’ 6 Wone tulonje nalulawa kwa wanhu, wanhu weng'ha wa hano wotutowa na maganga, kwa vila weng'ha nawakunda kota Yohani nayali mloli wa Nguluwi." 7 Lelo nawamlonjela, "Hatuvizelele ludali alo nalulawa kohi." 8 Yesu nakawalonjela, "Nani siwalonjela ndangudita mbuli azi kwa ludali lwachi."

9 Yesu nakalutilila kuwalonjela wanhu nhelo ayi, "Munhu yumwe nakalima mgunda wa zabibu, nakawabasila walimi, hamba nakaluta kuli isi ya kutali, nakekala ako kwa mihela minji. 10 Mhela wa kubeta, munhu ayo nakamlajiza chitumagwa wa heye kwa wala yawabasile mgunda leka wamhe honhu ha mafuza ga mgunda wa zabibu. Ila wala walimi nawamsubula ayo chitumagwa na kumhilusa ne chinhu. 11 Yula munhu nakamlajiza chitumagwa yunji, ila hewo nawamtowa ayo chitumagwa na kumbasa soni na kumhilusa ne chinhu. 12 Nakamlajiza chitumagwa wa kadatu, ayo kahi nawamlumiza na kumtaga hanze ha mgunda. 13 Yula yawele na mgunda nakejesa, ‘Ndodita choni? Ndomlajiza mwana wa heni yondimganile, hanji womhulichiza.’ 14 Wala walimi lowamuwene, nawelonjela, ‘Ayu ndo mhalizi. Lelo tumkopole leka uhalizi wa heye uwe wa hetwe.’ 15 Lelo nawamlavya hanze ha mgunda wa mizabibu, nawamkopola." Yesu nakauza, "Yula yawele na mgunda kowadita choni wala walimi? 16 Kokuya kuwadumya wala walimi na kowabasila walimi wanji awo mgunda wa zabibu." Wanhu lowahuliche ulonzi awo nawalonga, "Hebu! Galeche kulawila ne hado!"

17 Ila Yesu nakawalola, nakawalonjela, "Maandiko Matakatifu gana mana yachi?

" ‘Iganga lyowalilemile walinguzenga,

naliwa iganga likulu lya msisi!’

18 Wone munhu yoneche yogwa mchanya mwa iganga alyo, kobeneka vihande vihande na wone iganga alyo lyomgwila munhu yoneche, lyomhondanga."

19 Walangusa wa malajizo ga Musa na watambika wakulu nawavizela kuwala nhelo ayo ilinguwawala hewo, ahyo nawagana kumibata bahala, ila nawawadumba wanhu. 20 Lelo, nawali wopala mhela unojile. Nawawapala wanhu wedite kota wanoga, nawawalajiza leka wamgwilize Yesu kwa kumuuza, ahyo nawali wogana wamibate na kumhilika kwa wakulu wa isi. 21 Wala wapugajizi nawamlonjela, "Mlangusa, tuvizela hegwe kwangulangusa ga kukomya ne hambe umbagule munhu, ila kwangulangusa nzila za Nguluwi. 22 Lelo tulonjele iwa goya kumha mndewa wa Loma kodi?"

23 Yesu nakavizela chowalingugana, ahyo nakawalonjela, 24 "Mndajile sendi ayo. Ndaze, mutwi na itagwa ali ndo lya whaani?"

25 Nawedichila, "Ndo vya Kaisali." Yesu nakawalonjela, "Goya, mmigalile Kaisali gawele ga Kaisali na mmigalile Nguluwi gawele ga Nguluwi."

26 Aho hali wanhu walemwela kumgwiliza, wekala tulu wochijesa vyoyawalonjele.

27 Wala Masadukayo, wawele wangulongaga kota wabagame hambe wazilipuche, nawoya kwa Yesu, nawalonga, 28 "Mlangusa, Musa nakatwandichila kuwa one mng'holozo yumwe yabagame na kumleka mche wa heye ne mwana, leka ayo munhu yumwe wa lukolo lwenu yamhalile ayo mdala, yamlelele wana mng'holoze. 29 Lelo mhela umwe kwali na wanhu saba wa lukolo lumwe. Yula wamwaluko kamhola, hamba nakabagama ne kulela mwana. 30 Mng'holoze wa keli nakamhola yula mdala mlekwa, naye kahi nakabagama ne mwana 31 na wakadatu naye nakamhesa, naye hiho nakabagama. Nayali hihyo kwa weng'ha saba nawabagama ne kuleka mwana kwa yula mdala. 32 Hamba yula mdala naye nakabagama. 33 Lelo zuwa lya wabagame kuzilipuka mdala ayo kowa mche wa whaani? Mina weng'ha saba nawali wamhesile."

34 Yesu nakawalonjela, "Walume na wadala wa mihela aji wanguhesa na kuhesigwa, 35 Ila wala wawele Nguluwi yowawika mbaka mhela wa kuzilipuka, howohesa ne kuhesigwa. 36 Awo howobagama kahi, kwa vila, wowa kota wahilisi. Hewo ndo wana wa Nguluwi, kwa vila ndo wana wa wanhu wazilipuligwe. 37 Ila kuzilipuka kwa wabagame, Musa kahi nakakunda mbuli azo kuli gandichigwe gelile. Yolajila hala honhu hali chisosolo lochali chikwaka chiluli ne kulakala, loyali yomchema Mkulu Nguluwi, Nguluwi wa Abulahamu na Nguluwi wa Isaka na Nguluwi wa Yakubu. 38 Heye hawele Nguluwi wa wanhu wabagame, ila Nguluwi wa wanhu wakomu, mina kwa heye weng'ha wakomu."

39 Walangusa wa malajizo ga Musa nawalonga, "Mlangusa kwidichila goya ng'hatu." 40 Nawalonga ahyo kwa vila nakwali haduhu munhu yoneche wa kumuuza kahi.

41 Yesu nakawauza, "Naiwa ndaze wanhu wangulonga Kilistu ndo mwana wa Daudi? 42 Kwa vila Daudi yuye kangulonga kuli chitabu cha Zabuli,

" ‘Mkulu, nakamlonjela Mkulu wa heni,

wikalise ubanzi heni wa kudilo,

43 mbaka ndiwawiche wang'honyo wa hegwe, wawe

chigoda cha kuwichila magulu ga hegwe.’

44 Wone Daudi kangumchema heye, ‘Mkulu,’ Lelo yowa ndaze, Kilistu yawe mwana wa Daudi?"

45 Yesu nakawalonjela walanguswa wa heye hali wanhu weng'ha, 46 "Milolele na walangusa wa malajizo ga Musa wawele wanguganaga kulamswa na wanhu kwa kuhulichiza kuli honhu ha kugula na kuguza vinhu na kikalisa honhu ha lutogo kuli masunagogi na kuhola honhu ha lutogo kuli mnvina. 47 Wanguwabunzaga wafililwe na walume wa hewo, wangiditaga kota wanoga kwa kulanda kwa sala zihejile. Wanhu kota wano wotaguswa kwa kung'hang'hala ng'hatu!"