1 Hamba Yesu nakawalonjela walanguswa wa heye, "Mbuli zilinguwambuza wanhu kudita gehile zolawila, ila kochona munhu yula yalinguzambuza. 2 Fola yawohigwe iganga likulu lya kubalasila kuli singo ya heye na kutozigwa kuli bahali kusinda kumwambuza yumwe wa wadodo wano kudita gehile. 3 Milolele! Wone mng'holozo yakuditile gehile, umkanye na hoyokunda kukanyigwa, mihanyise. 4 Wone yakuditile gehile mala saba kuli zuwa limwe na hoyohiluka kwa hegwe chila mhela kuli zuwa lilyo yolonga, ‘Ndangulanda tihanyise,’ yangukugana ukunde, mihanyise."

5 Walanguswa wa heye nawamlonjela, "Mkulu tonjezele makundo." 6 Naye mkulu nakawedichila, "Wone makundo ga hemwe nagawe mado kota nyhule ndodo ya haladali, mwahawezile kulilonjela ali igodi lya ikuyu, ‘Ung'humbuche ukote kuli bahali,’ nalyo naliwahulichize.

7 "Wone yumwe wa hemwe kana chitumagwa yalingukola mijto kulima ama kudima ming'holo, ndaze hoyohiluka kulawa kumgunda, komlonjela ayo chitumagwa himahima uye ulye chilyo? 8 Ndaze! Hambe umlonjele, ‘Mbichile goya chilyo, wiwiche goya kung'holela mijito mbaka londisinda kulya na kunwa, ndo nagwe ulye kunwa’? 9 Ndaze, ayo munhu kolonga malumbo kwa chitumagwa ayo kwa kweneza gala goyalonjelwe? 10 Hihyo du namwe homsinda kudita geng'ha gomlonjelwe, mlonje, ‘Hetwe ndo vitumagwa wa hihi hela, natudita gala gotulinguganigwa kudita.’ "

11 Yesu loyawele kuli majendo kuluta Yelusalemu nakakola kuli mbaka ja Samaliya na Galilaya. 12 Loyawele yokwinjila kuli chijiji chimwe, naketing'hana na wanhu kumi wawele na uswema, wemile kutali. 13 Nawachemeleza kwa lizi likulu wolonga, "Yesu mlangusa tonele isungu!"

14 Loyawawene nakawalonjela, "Mlute mkelajile kwa watambika." Nawo lowawele mzila woluta, nawelizwa. 15 Yumwe wa hewo loyonile nakoselwa utamwa, nakahiluka kuno yomtogola Nguluwi kwa lizi likulu. 16 Naketoza hasi hali magulu ga Yesu kuno yolonga malumbo. Ayo nayali Msamalia. 17 Aho Yesu nakalonga, "Ndaze, hawawele wanhu kumi welizwe? Wala tisa wakohi? 18 Haduhuli yunji yahiluche kumtogola Nguluwi ila ayu mjenzi?" 19 Hamba nakamlonjela yula munhu, "Winuche, ulute, makundo gako nagakulohola."

20 Mhela umwe Mafalisayo nawamuuza Yesu, "Undewa wa Nguluwi wokuya nili?" Naye nakawedichila, "Undewa wa Nguluwi haukuya ukoneka. 21 Ne haduhu munhu yolonga, ‘Wahano,’ ama ‘Wahala.’ Ahyo Undewa wa Nguluwi wa mgati mwenu."

22 Hamba kawalonjela walanguswa wa heye, "Mazuwa ganguya gawele mogana kulyona zuwa limwe lya Mwana wa munhu, ila hamlyona. 23 Wanhu wowalonjelani, ‘Mlole ka hala!’ Ama ‘Mlole ka hano!’ Ila hemwe mleche kulawa ne kuwawinza. 24 Kwa vila, kota lumwemwesa lwa limlungu vyolulingumwemwesa kuli ulanga kwaluchila ubanzi umwe mbaka uyage, ndo vyoiwa kwa Mwana wa munhu kuli zuwa lya heye. 25 Ila kung'hali kukoleka ago, koganigwa kugazika ng'hatu na kulemigwa na lulelo alu. 26 Kota vyoiwele kuli mhela wa Nuhu, ndo vyoiwa kuli mazuwa ga Mwana wa munhu. 27 Wanhu nawalutilila kulya na kunwa, kuhesa na kuhesigwa mbaka mhela wula Nuhu loyenjile kuli itumbwi. Mazi tendema nagalawila na kuwadumya weng'ha. 28 Yowa kota vyoilawile kuli mhela wa Lutu. Wanhu nawalutilila kulya na kunwa, kugula na kuguza, kunyala nyhadikwa na kuzenga. 29 Ila zuwa lila Lutu loyochile Sodoma, maganga ga chiluli nagalagala kota nhonya kulawa kilanga na kuwadumya weng'ha. 30 Ndo vyoiwa kuli zuwa alyo lya Mwana wa munhu hoyolawila.

31 "Zuwa alyo, munhu yoneche yawele mchanya mwa chinduwiko cha ng'handa ya heye, yaleche kudulika kuhola vinhu vya heye viwele mng'handa. Hihyo du, yawele kumgunda yaleche kuhiluka kaye kuhola choneche. 32 Mkumbuchile gala gamlawile mche wa Lutu. 33 Yoneche yalingugana kuilohola nhumbula ya heye koyajiliza na yoneche yalinguyajiliza koilohola. 34 Ndangukulonjelani, zuwa alyo wanhu weli wowa wawasile hamwe kuli chinhanda chimwe, yumwe hali hewo koholigwa na yunji kolechigwa. 35 Wadala weli wowa wobalasa nhyule hamwe, yumwe koholigwa na yunji kolechigwa." 36 Wanhu weli wowa kumgunda, yumwe koholigwa na yunji kolechigwa.

37 Hamba nawamuuza, "Aga golawila kohi Mkulu?" Naye nakawalonjela, "Hawele na mtufi, ndo hojimema mikungule."