1 Zuwa limwe wakongoza kodi na wanhu wenji walingudita gehile nawaluta kumuhulichiza Yesu. 2 Mafalisayo na walangusa wa malajizo ga Musa nawang'ung'uta wolonga, "Mumlole munhu ayu! Kanguwabochela wawele ngudita gehile kahi kangulya nawo!" 3 Yesu nakawedichila kwa nhelo ayi. 4 "Wone yumwe wa hemwe kana ming'holo miya imwe, hoyovizela kota limwe hali ajo ming'holo nalyajilila, kodita choni? Kojileka jila makumi tisa na tisa kuli chiwala na kuluta kulipala lila lyajilile mbaka yalyone. 5 Hoyolipata kosangalala na kolipika mmayega ga heye. 6 Hoyofika kaye kowachema goloko wa heye na walingikalasa habehi na kuwalonjela, ‘Msangalale hamwe na heni kwa vila nandilyona ling'holo lya heni nalyajilile.’ 7 Ndangukulonjelani, kowa na kusangalala ng'hatu kilanga kwa chwalo cha yalingudita gehile yumwe kumgalamchila Nguluwi kusinda wanhu watanganiche makumi tisa na tisa wohambe waganigwe kusilwa gehile.

8 "Ama ndo mdala whachi yawele na migwala kumi, wone yajilize limwe hambe yabwine chenje ne kufajila ng'handa na kupala ng'hatu mbaka yayone? 9 Hoyolipata, kanguwachemaga goloko wa heye na walingikalasa habehi na heye na kuwalonjela, ‘Msangalale hamwe na heni kwa vila ndilyona igwala lya heni lyajilile.’ 10 Hihyo du ndangukulonjela, hana usangalalo hali wahilisi wa Nguluwi kwa chiwalo cha yawele na gehile yumwe yalingulonga gehile ga heye kwa Nguluwi."

11 Yesu nakalutilila kulonga, "Nakwali na munhu yumwe yawele na wana weli wasongolo. 12 Yula mdodo nakamlonjela mhaza wa heye, ‘Mhaza, umhe heni uhalizi wa heni.’ Ahyo mhaza nakawagawila lufufu lwa heye. 13 Logakolile mazuwa mado, yula mdodo nakaguza uhalizi wa heye, hamba nakoka na kuluta isi ya kutali, ako nakatumiya vibi sendi za heye. 14 Loyasindile kutumiya chila chinhu choyawelenacho, nalulawila lufemba kuli isi yila, naye nakaluka kugaya. 15 Ahyo nakaluta kukola mijito kwa munhu yumwe nayali mwenyeng'haye wa isi yila, naye nakamhilika kuli mgunda wa heye yawe yohombela migubi. 16 Nakawa na maya ga kulya mibanzi jojidile migubi, nakwali haduhu munhu yampele chilyo. 17 Nyhala lozaluche kuhiluka, nakelonjela, ‘Kula kuluga kwa mhaza wa heni kuna wakola mijito wenji wawele ngulya na kulechelela, iwa ndaze heni hano ndagubagama kwa nzala? 18 Ndokuka na kuluta kwa mhaza wa heni na kumlonjela kota, mhaza, nandita gehile hali Nguluwi na hali hegwe. 19 Hambe nganigwe kuchemigwa mwana wa hegwe, undite kota yumwe wa vitumagwa wa hegwe.’ 20 Ahyo nakoka, nakaluta kwa mhaza wa heye.

"Ila loyawele yang'hali kutali, mhaza wa heye nakamona, nhumbula ya heye naimema isungu. Nakambilimila mwanage, nakamkumbatila na kumnonela. 21 Yula mwana nakamlonjela, ‘Mhaza, nambifya kwa Mkulu Nguluwi na kwa hegwe. Hambe nganigwe kuchemigwa mwana wa hegwe.’ 22 Ila mhaza wa heye nakawalonjela vitumagwa, ‘Himahima! Migale nguwo inojile mumvalize. Mvicheni pete kuli chidole cha heye na makwamba kuli magulu ga heye! 23 Hamba mlidumule singo ilogota lihatile, tulye na tudite mnvina! 24 Kwa vila ayu mwana wa heni nayali yabagame ila lelo nakazilipuka, nakajilila ila lelo nakoneka’ Ahyo nawaluka kudita mnvina.

25 "Mhela awo yula mwana mkulu nayali kumgunda. Loyawele yohiluka, habehi na kaye nakahulika lizi lya zimbo na wanhu wovina. 26 Nakamchema chitumagwa yumwe na kumuuza, ‘Hana choni?’ 27 Yula chitumagwa nakamlonjela, ‘Mng'holozo nakahiluka haluga na mhaza wa hegwe nakalidumula singo ilogota lihatile kwa vila mwana wa heye nakahiluka yawele mkomu.’

28 "Ayo mwana mkulu nakazudila ng'hatu, nakalema kwinjila mng'handa. Mhaza wa heye nakalawa kunze na kumdedeza yenjile mng'handa. 29 Ila heye nakamwidichila mhaza wa heye, ‘Wijese, miyaka jeng'ha nandikukolela mijito, ne zuwa limwe silechile kuhulichiza mzilo wa hegwe ne umwe. Nakumha choni? Humhele ne mhene ndodo leka sangalale na goloko wa heni! 30 Ila ayu mwanago yawifile lufufu lwa hegwe na wang'hondwa loyahiluche kaye nakulidumula singo ilogota lihatile kwa chiwalo cha heye!’ 31 Mhaza wa heye nakamwidichila, ‘Mwana wa heni, nakuwa na heni kwa mazuwa gose, chila chinhu chombele nacho ndo cha hegwe. 32 Ila naitugana tudite mnvina kwa vila ayu mng'holozo nayali yabagame, lelo kamkomu, nayali yajilile lelo nakoneka.’ "