1 Yesu nakalola, nakawona wawele na lufufu wowika ndolendole za hewo kuli ng'hano ya ng'handa ya Nguluwi, 2 kahi nakamona yafililwe na mlume wa heye yolavya migwala mili midodo kuli ng'hano ayo. 3 Nakalonga, "Ndikomya ndangukulonjelani, mamo ayu yafililwe na mlume wa heye nakalavya chasi chikulu kusinda wanhu weng'ha. 4 Kwa vila wanhu weng'ha nawalavya kwa kiwhana na mzidi wa lufufu lwawo, ila ayu mamo nakalavya kwa kiwhana na uzunwa wa heye, vyeng'ha vyoyawele navyo mbaka chila choyalinguchigana leka yekale."

5 Walanguswa wamwe nawali wolonga kuwala Ng'handa ya Nguluwi, ndaze vyoinoligwe kwa maganga ga sendi nyinji hamwe na ndolendole zilingulavigwa kwa Nguluwi. Yesu nakalonga, 6 "Aga geng'ha gomlingugona aha, mazuwa ganguya gawele haduhu ne iganga limwe lyosigala mchanya mwa iganga liyage, chila chinhu chowifigwa."

7 Lelo, nawamuuza Yesu, "Mlangusa, mbuli azo zolawila nili? Ulajilo wachi wolajila kota mbuli azo zahabehi kulawila?"

8 Yesu nakawedichila, "Milolele, mleche kuhadigwa. Kwa vila wenji wokuya kwa itagwa lya heni, wolonga, ‘Heni ndo Kilistu,’ mhela awo wa habehi. Ila hemwe mleche kuwawinza! 9 Lelo lomhulika mbuli za ngondo na ivuche, mleche kudumba, kwa vila ago golongola kulawila, ila kuduma kwa geng'ha kung'hali."

10 Hamba nakalutilila kulonga, "Isi imwe yochitowa na isi iyage na undewa umwe wochitowa na undewa uyage. 11 Chila honhu howa na jimachinyina mikulu, lufemba na matamwa. Kowa na mbuli za kukabusa na ulajilo ukulu kilanga. 12 Ila kung'hali kulawila ago, wowabata na kuwagaza na kuwahilika kuli masunagogi na kuwawika mchinweng'ho, mohilikwa kuli wandewa na walingulongoza kwa chiwalo cha itagwa lya heni, 13 leka mlavye ulolezi hali hewo. 14 Muwe na kunuwila kuno kuli nhumbula za hemwe. Mleche kijesa kung'hali mhela kuwala ndaze vyomlonga kuli kulonjelezwa, 15 kwa vila heni ndowapa ulonzi na luhala luwele haduhu ne mng'honyo wa hemwe yoweza kitwanza ne kulema. 16 Mobelenhukwa mbaka na wahaza na mamo wa hemwe na wang'holozenu na wagoloko wa hemwe na wamwe wa hemwe wokopoligwa. 17 Wanhu weng'ha wowazudila hemwe kwa chiwalo cha itagwa lya heni. 18 Ila haikwajilila ne mnvili imwe kuli vitwi vya hemwe. 19 Kwa kwimilila kwa hemwe, moulohola ukomu wa hemwe.

20 "Homkona muji wa Yelusalemu nauzungulutwa na wamizi, mvizele kota mhela wa kuwifigwa kwa muji awo naufika. 21 Aho wawele Yudeya wabilime kuluta kuli vidunda na wawele kuli muji walawe na wawele kuli migunda waleche kuhiluka kuli muji. 22 Kwa vila mazuwa ago ndo mazuwa ga kugazika, leka geng'ha gandichigwe genele. 23 Wochona wawele na himila na walingonyeza kuli mazuwa ago! Kwavila kowa na kugazika kukulu kuli isi na ng'halazi ya Nguluwi yokuya kwa wanhu awa. 24 Wanji wakopoligwa kwa ipanga na wanji woholigwa upogozi kuli isi zeng'ha na muji wa Yelusalemu wobigangwa na wanhu isi zinji, mbaka mhela wa hewo houkwenela.

25 "Kowa na ulajilo kuli isanya na nyelezi na nhondwe. Hano muisi, wanhu wa isi wowa kuli kugazika kwa chiwalo cha lunhwinhwi lwa kutigasika kwa nhigu za bahali. 26 Wanhu wowa habehi kubagama kwa lunhwinhwi na kuzona zila mbuli zilingulawila muisi, kwa vila mong'ho wa kilanga wotigaswa. 27 Hamba womona Mwana wa munhu yokuya kuli ng'hungugu, yawele na ludali na welile winji. 28 Mhela mbuli ayo hoikwaluka kulawila, mwime na kwinula mitwi vya hemwe mchanya, kwa vila ugombozi wa hemwe wa habehi."

29 Hamba nakawalonjela nhelo, "Mlole igodi lya mtini na migodi jinji jeng'ha. 30 Hojizuka, mwanguvizela kota mhela wa kubeta wa habehi. 31 Hihyo du, homkona mbuli azo zangulawila, movizela kota Undewa wa Nguluwi wa habehi. 32 Ndikomya ndanguwalonjela, lulelo alu lwa sambi halukola kung'hali mbuli azi zeng'ha kulawila. 33 Ulanga na isi zopuluta, ila ulonzi wa heni haupuluta.

34 "Muwe meho leka nhumbula za hemwe zileche kutunyigwa na mbuli nyinji za kuli ukomu awu, one haiwele ahyo zuwa alyo lyokuya kwa hemwe baho du. 35 Kwa vila lyokuya kota idiwa kwa weng'ha walingikala muisi yeng'ha. 36 Muwe meho mazuwa gose na mlande leka muweze kuloholigwa na gala geng'ha hogolawila na kwima hali Mwana wa munhu."

37 Mhela wa nemisi, Yesu nayali yowalangusa wanhu kuli Ng'handa ya Nguluwi, ila nechilo nayali yoluta kuli chidunda cha Mizeituni na kikala ako. 38 Wanhu weng'ha nawali woluta kuli Ng'handa ya Nguluwi kung'hali lufuku, leka wamhulichize.