1 Yesu nakalawa mlwanda lwa Yolodani yamemile Muhe Yelile, Muhe ayo nakamlongoza mbaka kugunuche. 2 Ako nakajezigwa na Limazoga kwa mazuwa makumi gane. Mazuwa ago geng'ha hadile chinhu choneche chila, logamalile mazuwa ago, nakehulika nzala 3 Limazoga nalimlonjela, "Wone uwele Mwanage Nguluwi, lilonjele iganga lino ligaluke kuwa ibumunda." 4 Yesu nakamwidichila, "nayandichigwa, ‘Munhu howa mkomu kwa ibumunda hela.’ "

5 Hamba Limazoga nalimhola mbaka kuchanya ng'hatu na kamlajila undewa weng'ha uwele kuli isi. 6 Limazoga limlonjela Yesu, "Ndokupa undewa na ludali lwa vinhu vyeng'ha vino, kwa vila vinhu vyeng'ha namhegwa heni, ndoweza kumha yoneche yula yondimgana. 7 Avi vyeng'ha vyowa vya hegwe, wone ufugamile heni."

8 Yesu nakamwidichila, "Nayandichigwa, ‘Umfugamile Mkulu Nguluwi, Nguluwi wa hegwe na umditile heye yaliyeka.’ "

9 Hamba Limazoga nalimhola Yesu mbaka Yelusalemu nalimkwiniza kuli ilingo lya Ng'handa ya Nguluwi, nalimlonjela, "Wone hegwe uwele ndo Mwana wa Nguluwi wilagaze kulawa hano mbaka hasi. 10 Kwa vila nayandichigwa, ‘Nguluwi kowalajiza wahilisi wa heye kwa chiwalo cha hegwe, leka wakwamile.’ 11 Na, ‘Wokuhola mmoko mwawo leka magulu ga hegwe galeche kikwang'hwala kuli iganga.’ " 12 Hamba Yesu nakamwidichila, "Nayandichigwa, ‘Uleche kumjeza Mkulu Nguluwi wa hegwe.’ "

13 Limazoga vyolisindile kumjeza kwa chila nzila, hamba nalimleka mbaka mhela ukundigwe.

14 Hamba Yesu nakahiluka Galilaya yawele yamemile mong'ho wa Muhe Yelile, mbuli za heye nazenela Galilaya na kuli isi zeng'ha ziwele habehi. 15 Nakaluka kuwalangusa wanhu kuli masunagogi nakatogoligwa na weng'ha.

16 Yesu nakaluta Nasaleti, honhu hoyakulile, kuli Zuwa lya Kwesela nakenjila kuli sunagogi kota vyochiwele chihendo cha heye. Nakema leka yasome Maandiko Matakatifu kwa lizi. 17 Nakabochela chitabu cha mloli wa Nguluwi, Isaya. Nakagubula na kusoma honhu handichigwe hino!

18 "Muhe wa Mkulu, kahachanya ha heni,

kwa vila nakanyhagula heni

ndiwegalile wazunwa Mbuli Inojile,

nakandajiza ndiwadamlile wawele mchinweng'ho wodoholigwa,

wala wohambe walole, wolola,

na kuwalohola walingubunzwa,

19 na kudamla kota mhela naufika wa Mkulu kuwalohola wanhu wa heye."

20 Hamba nakachigubika chila chitabu, nakamha chitumagwa, nakekalisa hasi. Wanhu weng'ha wawele kuli sunagogi nawamnogolela meho. 21 Aho nakaluka kuwalonjela, "Maandiko Matakatifu, lehano nagenela kuli makutu ga hemwe." 22 Weng'ha nawanojezwa ng'hatu na heye, nawabubuwala kwa ulonzi unojile woyalonjile, naweuza "Ndaze! Ayu hawele mwana wa Yusufu?"

23 Naye nakawalonjela, "Ne majesa mondonjela ulonzi awu, ‘Mganga, wilohole gwegwe.’ Mbuli zeng'ha zotuhuliche nakudita Kapanaumu, uzidite hano haluga hako." 24 Nakalutilila ngulonga, "Ndangulonga ndikomya, Mloli hotogoligwa hakaye hake. 25 Ila mhulichize, ndangukomya nakwali na wadala wenji walekwa kuli isi ya Isilaeli mhela wa Eliya. Mhela awo nhonya nahaitowile mhela wa miyaka jidatu na nusu, ahyo nakwali na lufemba kuli isi yeng'ha. 26 Ahyo, Eliya hatumigwe kwa yoneche kuli Isilaeli ila kwa yafililwe na mlume wa heye wa Salefati kuli isi ya Sidoni. 27 Kahi mhela wa Mloli Elisha nakwali na wanhu wenji wawele na uswema kuli isi ya Isilaeli, haduhu munhu yoneche yaloholigwe, ila Naamani mwenyenghaye wa isi ya Siliya."

28 Wanhu weng'ha wawele kuli sunagogi lowahuliche ago nawazudila ng'hatu. 29 Nawema, nawamlavya Yesu hanze ya haluga hawo, na kumigala hachanya mchidunda wogana wamtoze hasi. 30 Ila Yesu nakakola hagati howawele, nakaluta kaye.

31 Hamba Yesu nakadulika mbaka Kapanaumu, wilaya ya Galilaya, Zuwa lya Kwesela nakekala yowalangusa wanhu. 32 Nawabubuwala kwa ulanguso wa heye, kwa vila nayali yolangusa kota nayali na ludali. 33 Mgati mwa sunagogi nakwali na munhu yawele na chijeni chihile, nakatowa iyowe kwa mong'ho yolonga. 34 "Kuna choni na hetwe, hegwe Yesu wa Nasaleti? Nakuya kutudumya? Natuvizela hegwe kwa whaani, hegwe kwa msenga Yelile yatumigwe na Nguluwi!" 35 Yesu nakachideuza acho chijeni yolonga, "Nyamalile! Ulawe kuli munhu ayu! Chila chijeni lochimgwisile hanyi yula munhu nachilawa ne kumdita chinhu." 36 Wanhu weng'ha nawekala wabubuwale, nawelonjela "Aku kulangusa kwachi? Munhu ayu kana mong'ho na ludali lwa kuving'hanuchila vijeni vihile, navyo vyangumhulika." 37 Ahyo mbuli za Yesu nazenela chila honhu kuli isi yila.

38 Yesu nakalawa kuli sunagogi, nakaluta kaye kwa Simoni, mamo yumwe, mkweye Simoni nayali yotamika lukami, nawamlanda Yesu yamusile utamwa. 39 Yesu nakoya na kema habehi na mdala yula nakaudeuza ula utamwa, utamwa naumleka, baho mdala yula nakenuka na kwaluka kuwawichila chilyo.

40 Isanya lolyali lizinga, weng'ha wawele na watamwa wawo nawawegala kwa heye, naye nakawawichila moko gake mchanya chila yumwe na kawosela matamwa weng'ha. 41 Vijeni naviwalawa wanhu wenji, navyaluka kulonga, "Hegwe ndo Mwana wa Nguluwi!" Ila Yesu nakavideuza, nakavilemeza kulonga, navivizela kota heye nayali Kilistu Mlohozi.

42 Mitondo kung'hali lufuku, Yesu nakoka nakaluta honhu kulihela wanhu. Wanhu nawali wompala chila honhu, lowamuwene nawajeza kumlemeza yaleche kuka. 43 Ila heye nakawalonjela, "Nganigwa kudamla Mbuli Inojile ya Undewa wa Nguluwi kuli miji jiyage kahi, kwa vila achi ndo Nguluwi choyandajize." 44 Ahyo nakalutilila kudamla kwa wanhu kuli masunagogi ga isi ya Yudeya.