1 Kuli mwaka wa kumi na jihano ja undewa wa Kaizali Tibeliyo na Pontio Pilato nayali yolongoza honhu ha Yudeya na Helodi nayali yolongoza honhu ha Galilaya na mng'holoze Filipo nayali yolongoza honhu ha Itulea hamwe na honhu ha Tlakoniti, hamba Lusania nayali yolongoza honhu ha Abilene 2 nawo Anasi na Kayafa nawali watambika wakulu. Mhela awo lizi lya Nguluwi nalimuyila Yohani mwana wa Sekaliya kuli honhu hagunuche. 3 Yohani nakaluta mweng'ha kuli mbaka ja lwanda lwa Yolodani. Nakazakuwalangusa wanhu, waleche gehile ga hewo na kubatizigwa leka Nguluwi yawosele gehile.

4 Kota vyoyandichigwe kuli chitabu cha mloli Isaya,

"Lizi lya munhu lyanguchema hagunuche,

‘Mumgongomanyile Mkulu nzila ya heye,

mgolole nzila za heye za kukola.

5 Hagwile howa hatiligwe,

mula mwinuche mowa muselegwe,

habinuche howa hagoloswe,

nzila zihile zogoloswa.

6 Na weng'ha womona Nguluwi yowalohola wanhu!’ "

7 Lelo Yohani nayali yowalonjela wanhu wenji woyile kubatizigwa na heye, "Hemwe lulelo lwa izoka! Ndo whaani yawalonjele muibilimile ng'halazi ilinguya? 8 Mlajile kwa madito kota namumgalamchila Nguluwi. Mleche kwaluka sambi kota moibilima ng'halazi ya Nguluwi kwa kulonga, mhaza wa hetwe Abulahamu. Ndanguwalonjelani kota, Nguluwi kana ludali lwa kugagalula aga maganga gawe wana wa Abulahamu. 9 Iwago liwichigwa goya kuli mizabi ja igodi. Chila igodi lyohambe lilele mafuza ganojile, lyotemigwa na kutajigwa kuli chiluli."

10 Wala wanhu wamemile nawamuuza, lelo tudite choni? 11 Nakawedichila, "Yawele na migwanda mili yamhe yalihela, hihyo yawele na chilyo yadite hiho." 12 Wakongoza sendi nawo nawoya kubatizigwa, nawamuuza, "Mlangusa tudite ndaze?" 13 Heye nakawalonjela, "Mleche kukokongoza mzidi." 14 Wamizi nawo nawamuuza, "Hetwe natwe tudite choni? Nakawedichila, mleche kuhola chinhu cha munhu kwa lupichi kahi mleche kumtagusa munhu kwa udesi, migute na chomlingupegwa."

15 Weng'ha nawali wobeteza chinhu chimwenga, nawaluka kiuza mnhumbula za hewo kuwala Yohani hanji heye ndo Kilistu Mlohozi yahaguligwe na Nguluwi. 16 Baho Yohani nakawalonjela weng'ha, "Heni ndanguwabatiza kwa mazi ila kanguya nayali na ludali kusinda heni. Sijeza kudohola ng'weso za makwamba ga heye. Heye kowa yobatiza kwa Muhe Yelile na kwa chiluli. 17 Heye kana luhelo lwa kuyugulila nyhadikwa, yalunde uhemba kuli ng'hano na mhumba kozisoma kwa chiluli chohambe chizime."

18 Hamwe na makanyo menji, Yohani nakawahimiliza wanhu yowadamlila Mbuli Inojile. 19 Ila Yohani nakamdeuza mndewa Helodi kwa vila nakamhola Helodiya mche wa mng'holoze na kumdita mche wake, kahi nakadita gehile ganji. 20 Kahi Helodi nakadita chinhu chinji chihile kwa kumuwika Yohani mchinweng'ho.

21 Wanhu weng'ha lowabatizigwe, Yesu naye nakabatizigwa. Loyawele yomlanda Nguluwi, ulanga naugubuka, 22 Muhe Yelile nakadulika yawele na lukuli lulingiwhana kota ng'hunda. Lizi naluhulikwa kulawa kilanga, "Hegwe ndo mwanangu ndikuganile, nojezwa na hegwe."

23 Yesu loyaluche kukola mijito, nayali na miyaka makumi gadatu, wanhu nawali wochijesa kota heye mwana wa Yusufu yawele mwana wa Heli. 24 Heli nayali mwana wa Matati na Matati nayali mwana wa Lawi na Lawi nayali mwana wa Meleki na Meleki nayali mwana wa Yanai na Yanai nayali mwana wa Yusufu, 25 Yusufu nayali mwana wa Matasia na Matasia nayali mwana wa Amosi na Amosi nayali mwana wa Nahumu na Nahumu nayali mwana wa Hesili na Hesili nayali mwana wa Nagai, 26 Nagai nayali mwana wa Maati na Maati nayali mwana wa Matasia na Matasia nayali mwana wa Shemeni na Shemeni nayali mwana wa Yoseki na Yoseki nayali mwana wa Yuda, 27 Yuda nayali mwana wa Yoanani na Yohanini nayali mwana wa Lisa na Lisa nayali mwana wa Selubabeli nayali mwana wa Shatieli na Sheatieli nayali mwana wa Neli, 28 Neli nayali mwanage Meliki na Meliki nayali mwana wa Adi na Adi nayali mwana wa Kosamu na Kosamu nayali mwana wa Elimadamu na Elimadamu nayali mwana wa Eli, 29 Eli yula nayali mwana wa Yoshuwa na Yoshuwa nayali mwana wa Elieseli na Elieseli nayali mwana wa Yolimu na Yolimu nayali mwana wa Matati na Matati nayali mwana wa Lawi, 30 Lawi nayali mwana wa Simeoni na Simeoni nayali mwana wa Yudasi na Yudasi nayali mwana wa Yusufu na Yusufu nayali mwana wa Yonamu na Yonamu nayali mwana wa Eliyakimu, 31 Eliyakimu nayali mwana wa Melea na Melea nayali mwana wa Mena na Mena nayali mwana wa matata na Matata nayali mwana wa Natani na Natani nayali mwana wa Daudi, 32 Daudi nayali mwana wa Yese na Yese nayali mwana wa Obedi na Obedi nayali mwana wa Boasi na Boasi nayali mwana wa Salimoni na Salimoni nayali mwana wa Nashoni, 33 Nashoni nayali mwana wa Aminadabu na Aminadabu nayali mwana wa Alini na Alini nayali mwana wa Hesiloni na Hesiloni nayali mwana wa Pelesi na Pelesi nayali mwana wa Yudasi, 34 Yudasi nayali mwana wa Yakubu na Yakubu nayali mwana wa Isaka na Isaka nayali mwana wa Abulahamu na Abulahamu nayali mwana wa Tela na Tela nayali mwana wa Naholi, 35 Naholi nayali mwana wa Selugi, na Selugi nayali mwana wa Leu na Leu nayali mwana wa Pelagi na Pelegi nayali mwana wa Ebeli na Ebeli nayali mwana wa Sala, 36 Sala nayali mwana wa Kainamu na Kainamu nayali mwana wa Afakisadi na Afakisadi nayali mwana wa Shemu na Shemu nayali mwana wa Nuhu na Nuhu nayali mwana wa Lameki, 37 Lameki nayali mwana wa Metusela na Metusela nayali mwana wa Henoki na Henoki nayali mwana wa Yaledi na Yaledi nayali mwana wa Mahalaleli na Mahalaleli nayali mwana wa Kainamu. 38 Kainamu nayali mwana wa Enoshi na Enoshi nayali mwana wa Seti na Seti nayali mwana wa Adamu na Adamu nayali mwana wa Nguluwi.