1 Hamba, Mkulu nakawahagula wanhu wanji makumi saba na weli, nakawalajiza weliweli, wamlongole kuli chila muji na chila honhu hoyaganile kuluta. 2 Nakawalonjela, "Mbena nyinji, ila wakola mijito ndo wachefu. Ahyo mumlande Mkulu wa mena yalajize wakola mijito kuli mgunda wa heye mbena. 3 Lelo mluteni, ndanguwalajiza hemwe kota miyana ming'holo kuli mibwa ja kisolo. 4 Mleche kuhola sendi ne mhako ne makwamba na mleche kumlamsa munhu yoneche mnzila. 5 Kuli ng'handa yoneche yila yomkwinjila, mlongole na kuwalamsa ahi, ‘Mikale goya mng'handa yino.’ 6 Wone kuwe na munhu yawele na kikala goya, kikala goya kowa hamwe na heye, wone hebu kikala goya kokuhiluchilani. 7 Mikale kuli ng'handa yiyo, mulye na kunwa vyowalinguwapa, kwa vila chila mkola mijito kanguganigwa kupegwa chasi kwa kiwhana na mijito joyakolile. Mleche kulabajila kulawa ng'handa imwe mbaka iyage. 8 Wone mfiche kuli muji na wanhu wa muji awo wawabochele, mulye choneche chomlingupegwa. 9 Muwosele matamwa wali kuli muji awo na muwalonjele, ‘Undewa wa Nguluwi wa habehi.’ 10 Ila wone mwinjile kuli muji na wanhu waleme kuwabochela, mlawe mlute kuli nzila zake mlonje, 11 ‘Mbaka nhimbwisi za muji wa hemwe inhanhahile kuli magulu ga hetwe twanguikung'huna hali hemwe. Ila mvizele kota Undewa wa Nguluwi wa habehi!’ 12 Ndikomya ndanguwalonjelani, zuwa lila muji awo wogazika ng'hatu kusinda kugazika kula kwa wanhu wa Sodoma.

13 "Kochona Kolasini! Kochona Betisaida! Kwa vila wone vinduzanduza vikoleche kwa hemwe navikoleche Tilo na Sidoni, wanhu wa hala wahavalile mivalo ja migunila na kikala kuli mivu na kulonga gehile ga hewo kwa Mkulu Nguluwi. 14 Ne ahyo kuli zuwa lya utaguso hemwe mopata magazo makulu kusinda Tilo na Sidoni. 15 Nagwe Kapanaumu, ndaze kokwinuligwa mbaka kilanga? Hebu, koduliswa mbaka kuli isi ya wabagame!"

16 Hamba Yesu nakawalojela, "Munhu yoneche yalinguwahulichiza hemwe, kangunyhulichiza heni na yalingulema kuwabochela hemwe, kangundema heni. Na yalingulema kumbochela heni, kangulema kumbochela yula yandajize."

17 Hamba wala makumi saba na weli nawahiluka wasangalale, nawalonga, "Mkulu mbaka vijeni navituhulika kwa itagwa lya hegwe." 18 Yesu nakawalonjela, "Nandilyona limazoga lyangulagala kulawa kilanga kota lumwemwesa lya limlungu. 19 Lole nandiwapa ludali lwa kubiga mizoka na nyinje na ludali hali mong'ho weng'ha lwa yula mng'honyo, kuduhuli choneche chiwalumiza. 20 Lelo mleche kusangalala kwa vila vijeni naviwahulichiza, ila msangalale kwa vila matagwa genu nagandichigwa kilanga."

21 Mhela wuwula, Yesu nakatowa luchenze kwa Muhe Yelile yolonga, "Ndangumtogola, Mhaza, Mkulu wa kilanga na kuli isi, kwa vila nakuwavisa mbuli azi wawele na luhala na wasomile, nakuwagubulila wana wadodo. Ena, Mhaza, kwa vila ahyo ndo vyounojezwe."

22 Hamba nakalonga, "Mhaza wa heni nakunipa vinhu vyeng'ha. Haduhuli yalingumzela Mwana ila Mhaza, ne yalingumzela Mhaza ila Mwana na yoneche yula yawele Mwana kogana kumgubulila."

23 Hamba Yesu nakawahinduchila walanguswa wa heye na kulonga nawo chinyele, "Fola wanhu wala walinguvyona vinhu vyomlinguvyona hemwe! 24 Kwa vila ndangukulonjelani, waloli wenji na wandewa nawagana kugona aga gomlingugona hemwe ila hawagawene, nawagana kuhulika gala gomlinguhulika hemwe ila hawagahuliche."

25 Mhela awo munhu yumwe yalingugazela ng'hatu malajizo ga Musa nakoya kwa Yesu leka yamjeze, nakamuuza, "Mlangusa, ndite choni leka ndiuhalile ukomu wa mazuwa gose?" 26 Yesu nakamwidichila, "Nakwandichigwa choni kuli chitabu cha malajizo ga Musa? Hegwe nakilangusa ndaze?" 27 Nakamwidichila, "Mgane Mkulu Nguluwi kwa nhumbula ya hegwe yeng'ha na kwa muhe wa hegwe weng'ha na kwa mong'ho wa hegwe weng'ha na kwa luhala lwako lweng'ha, na umgane yomlingikala habehi kota vyoulingigana gwegwe baho." 28 Yesu nakamwidichila, "Nakwidichila goya, udite ahyo nagwe kochikala."

29 Ila munhu yula nakagana kilajila kota nakanoga, aho nakamuuza Yesu, "Yawele habehi na heni ndo whaani?" 30 Yesu nakamwidichila, "Munhu yumwe nayali yaduliche kulawa Yelusalemu kuluta Yeliko. Loyawele mnzila, nakavabigwa na wabokaji, nawamsukula vyeng'ha vyoyawele navyo na kumtowa, nawamleka yawasile bahala yawele behi kubagama. 31 Mtambika yumwe nakakola kuli nzila yila loyamuwene munhu yula yatowigwe, nakakola hafungo. 32 Hihyo Mlawi yumwe loyafichile hala nakamona munhu yatowigwe, naye nakakola hafungo. 33 Ila Msamalia yumwe yawele mmajendo nakafika hala hoyawele yula munhu yatowigwe, loyamuwene, kamonela isungu. 34 Nakamhejelela habehi, nakavibakaliza mafuta na Divai vilonda na kuviwopa. Hamba nakamkwiniza mchanya mwa idogowi lyake, nakamigala mbaka kuli ng'handa ya wajenzi na kumlolela. 35 Mitondo Msamaliya yula nakalavya sendi denali mbili nakamha yawele na ng'handa ya wajenzi na kumlonjela, ‘Mlolele ayu munhu, choneche choyotumiya mzidi ndokupa hondihiluka.’ " 36 Hamba Yesu nakamuuza munhu yula, "Hali awo wanhu wadatu, yalikohi yalajile kota kangikalasa habehi na yula munhu yatowigwe na wabokaji?" 37 Yula munhu yalingugazela ng'hatu Malajizo ga Musa nakedichila, "Yula yamonele isungu." Yesu nakamlonjela, "Ulute nagwe ukadite hiho."

38 Lowawele mmajendo Yesu na walanguswa wa heye nawenjila kuli chijiji chimwe na mdala yumwe yalinguchemigwa Malita nakambochela hakaye hake. 39 Malita nayali na mdodowe yalinguchemigwa Maliya, ayu nakekalisa habehi na Yesu yohulichiza malanguso gake. 40 Ila Malita nayali yodita mbuli ziyage nyinji, lelo nakamlutila Yesu na kumlonjela, "Mkulu, hauligijesa kota lumbulyangu vyoyandechele mijito jeng'ha ndiliyeng'ha? Lelo mlonjele yoye yanhanze!"

41 Ila Mkulu nakamwidichila, "Malita, Malita! Lekachoni kwangusumajila na kugaya na vinhu vinji? 42 Ila changuganigwa chinhu chimwe hano. Maliya nakahagula chinhu chinojile ne haduhu munhu yomsukula."