1 Zuwa limwe, Yesu nayali yemile hafungo mwa ilamba lya Genesaleti, wanhu wenji nawali wamzungulute leka wahulichize ulonzi wa Nguluwi. 2 Nakajona mitumbwi mili jiwele hafungo ha ilamba, ila walowa somba nawali wochile, nawali wohovuga utandawala wa hewo. 3 Yesu nakenjila kuli itumbwi limwe lya Simoni, nakamlonjela yalihejeze kulawa hafungo mwa ilamba mbaka mmazi. Hamba nakekala mli itumbwi na kulangusa lung'hongola lwa wanhu.

4 Loyasindile kulangusa, nakamlonjela Simoni, "Ligale itumbwi mbaka hagati kuli mazi menji hamba mtoze utandawala wa hemwe mlowe somba." 5 Simoni nakamwidichila, "Mkulu natujeza kulowa somba nechilo yeng'ha hatupatile ne chinhu ila kwa vila hegwe nakulonga, ndotoza utandawala." 6 Lowaditile ahyo nawalowa somba nyiji mbaka utandawala wa hewo nawaluka kudejeka. 7 Nawawachema wayao wawele kuli itumbwi liyage leka woye wawatanze. Nawoya nawamemeza somba kuli mitumbwi jeng'ha mili mbaka najiwa behi kuzibila.

8 Simoni Petili loyagawene aga, nakafugama hoyali Yesu kalonga, "Mkulu uche hali heni! Kwa vila ndina gehile!" 9 Simoni na wayage weng'ha nawabubuwala kwa vila nawapata somba nyinji. 10 Hihyo du Yakubu na Yohani, wana wa Sebedayo, wawele walowa hamwe na Simoni. Yesu nakamlonjela Simoni, "Uleche kudumba, kulawa sambi kowa mlowa wanhu." 11 Ahyo, lowajigale jila mitumbwi hafungo mwa ilamba nawaleka geng'ha, nawamuwinza Yesu.

12 Nayali, Yesu loyawele kuli muji umwenga wa ako, munhu yumwe yawele na uswema kuli lukuli lweng'ha nakamona. Lelo, munhu ayo nakagwa chifunama nakamlanda Yesu, "Mkulu, wone ulingugana, koweza kunyheliza!"*

13 Yesu nakagolola moko, kamdoliza na kulonga, "Ndangugana welizwe!" Baho du ula uswema naumlawa. 14 Yesu nakamlonjela, "Uleche kumlonjela ne munhu. Ila ulute kelajile kwa mtambika mkulu, ulavye nhambiko kwa chiwalo cha kwelizigwa kwa hegwe kota vyoyalajize Musa, leka wanhu weng'ha walavye ulolezi kota hegwe nakuloholigwa."

15 Ila Mbuli za Yesu nazenela chila honhu, wanhu wenji nawoya kumhulichiza na kusilwa matamwa gawo. 16 Ila heye nakaluta honhu hawele haduhu wanhu na kulanda ako.

17 Zuwa limwe Yesu loyawele yolangusa. Mafalisayo na walangusa wa Malajizo ga Musa, kulawa chila chijiji cha Galilaya na Yudeya na Yelusalemu, nawali wekalise baho. Ludali lwa Mkulu nalwali hamwe na heye kwa kuwalohola watamwa. 18 Nawoya wanhu, wampapile munhu yaziliche kumwe, nawajeza kumwinjiza mng'handa wamuwiche kumwando kwa Yesu. 19 Ila nawalemwela kwinjila mng'handa kwa vila wanhu wenji nawali wekale. Ahyo nawamkwinhiza ayo yaziliche kuli chinduwiko, nawatubula chinduwiko, nawamdulisa ayo yaziliche hamwe na chinhanda cha heye, nawamuwika hagati hali lung'hongola lwa wanhu hali Yesu.Wanhu wane walingumdulisa munhu kukolela chinduwiko 20 Yesu loyawene makundo ga hewo, nakamlonjela ayo munhu yaziliche, "Goloko kusilwa gehile ga hegwe."

21 Walangusa wa malajizo ga Musa na Mafalisayo nawaluka kiuza, "Ndo whaani muhu ayu yaligukovula? Haduhuli munhu yalinguweza kusa gehile ila Nguluwi yeka!" 22 Yesu nakavizela majesa ga hewo, nakawauza, "Lekachoni mwangijesa mnhumbula za hemwe? 23 Lyakohi liwele lya ubewe ng'hatu, Kulonga, ‘Kusilwa gehile ga hegwe,’ Ama kulonga, ‘Wime ujende?’ 24 Ila ndangugana mvizele kota, Mwana wa munhu kana ludali lwa kuwosela wanhu gehile ga hewo kuli muisi." Baho nakamlonjela yula yaziliche, "Winuche uhole chinhanda cha hegwe, ulute kaye!" 25 Lelo yula munhu yaziliche nakenuka hali hewo, nakedwika chinhanda cha heye na kaluta kaye, kuno yomtogola Nguluwi. 26 Wanhu weng'ha nawabubuwala ng'hatu na kudumba na kumtogola Nguluwi kuno wolonga, "Tuvyona vinduzanduza lehano."

27 Hamba, Yesu nakalawa kunze, nakamona mkongoza kodi yumwe yalinguchemigwa Lawi, yekalise mchituka cha kodi. Yesu nakamlonjela, "Umbinze!" 28 Naye Lawi nakaleka chila chinhu, nakamuwinza. 29 Hamba Lawi nakamditila Yesu mnvina ng'hulu hakaye hake na chilundo cha wakongoza kodi na wanhu wanji nawekala hamwe na hewo. 30 Ila Mafalisayo na walangusa wa malajizo ga Musa nawawang'ung'utila walanguswa wa Yesu, wolonga, "Lekachoni mwangulya na kunwa na wakongoza kodi na wadita gehile?" 31 Yesu nakawedichila, "Wanhu wawele wakomu hawalingumlapa mteleka mikwandi, ila wawele watamwa. 32 Suyile kuwachema wanhu wala wanojile, ila wala wawele na gehile leka wamgalamchile Nguluwi."

33 Wanhu wanji nawamlonjela Yesu, "Walanguswa wa Yohani Mbatiza nawali wokwesela kulya na kulanda na vitumagwa wa Mafalisayo wanguditaga hiho, ila walanguswa wa hegwe wangulya na kunwa." 34 Yesu nakawedichila, "Lelo wala walalikwe kuli mnvina ya kuhesa nawaganigwa kwesela kulya hanga mkasano yawele hamwe na hewo? Hebu! 35 Ila mhela wokuya uwele mkasano kokusigwa kwa hewo. Aho ndo wokwesela kulya."

36 Yesu nakawalonjela nhelo ayi, "Haduhu munhu yalingudega chibende chinyale na kuhoneleza kuli nguwo ilalile. Wone yadite ahyo, koiwifya ila nguwo inyale, chila chilingulawa kuli nguwo inyale hachichiwhana na nguwo ilalile. 37 Haduhu munhu yowika divai ya lehano kuli vihako vya igozi vilalile. Kwa vila wone yadite ahyo, divai ya lehano yozatula vila vihako, divai yobohoka na vihako vyotulika. 38 Divai ya lehano yowichigwa kuli vihako vya igozi vinyale. 39 Kuduhu munhu yalingugana kunwa divai inyale hala hoyosinda kunwa divai ya katali, ila kangulongaga, ‘Yila ya katali ndo inona lukami.’ "