1 Hamba, wanhu weng'ha nawenuka, nawamigala Yesu kwa Pilato. 2 Nawaluka kumlonjeleza wolonga, "Natumfika munhu ayu yowahada wanhu wa hetwe, yowalemeza kulavya kodi kwa mndewa wa Loma na kichema heye ndo Kilistu, mndewa." 3 Pilato nakamuuza Yesu, "Hegwe kwa mndewa wa Wayahudi?" Yesu nakedichila, "Hegwe kulonga." 4 Pilato nakawalonjela watambika wakulu na lung'hongola lwa wanhu, "Hambe mbone nongwa yoneche ya kumtagusa munhu ayu." 5 Ila hewo nawakangaza kwa kulonga, "Kangwambuza ivuche kwa malanguso ga heye kuli isi yeng'ha ya Yuda, nakaluchila Galilaya na sambi ka hano."

6 Pilato loyahuliche ago, nakauza, "Munhu ayu ka Mgalilaya?" 7 Loyavizelele kota Yesu nayali hali ulongozi wa Helodi, nakamigala kwa Helodi, yawele mhela awo nayali Yelusalemu. 8 Helodi loyamuwene Yesu nakasangalala ng'hatu, kwa vila kwa mhela winji nayali yahuliche mbuli nyinji zilingumuwala heye. Mzidi wa ago nayali yogana kumona yodita vinduzanduza. 9 Lelo nakamuuza mbuli nyinji kwa mhela winji, ila Yesu hedichile ne chinhu. 10 Watambika wakulu na walangusa wa malajizo ga Musa, nawoya kumlonjeleza Yesu kwa lupichi ng'hatu. 11 Helodi hamwe na wamizi wa heye nawambasa soni Yesu na kumditila idaba, hamba nawamvaliza ivalo lya chiundewa, nawamhilusa kwa Pilato. 12 Kuli zuwa alyo Helodi na Pilato nawawa goloko, kung'hali kwa mbuli ayi nawali wang'honyo.

13 Pilato nakawachema watambika wakulu na vilongozi na wanhu, 14 nakawalonjela, "Nammigala munhu ayu kwa heni, namlonga kota nayali yowahada wanhu. Lelo mhulichize! Lomhugajize hali hemwe, siiwene nongwa yoneche kuwala ulonjelezi wa hemwe kwa heye. 15 Ne Helode hamuwene na nongwa yoneche, ndo chiwalo cha kumhilusa kwa hetwe. Kota vyomlingona, munhu ayu haditile mbuli yoneche ilingumlapa kubagama. 16 Ahyo ndokundiza yazapigwe ng'hobwa hamba ndomlechela." 17 Kwa vila nayali kanguganigwa kumlechela munhu yumwe kwa wala wawele mchinweng'ho kuli Mnvina ya Pasaka. 18 Ila weng'ha nawatowa iyowe, "Umuse munhu ayo na mchumulile Balaba kwa hetwe!" 19 Balaba nayali yawichigwe mchinweng'ho kwa chiwalo cha kwambuza kubelenhuka kuli muji kahi kwa chiwalo cha kukopola.

20 Pilato nakagana kumlechela Yesu, ahyo nakalonga na hewo kahi, 21 ila hewo nawalutilila kutowa iyowe, "Mumuwambe, mumuwambe!" 22 Pilato nakawauza lwa kadatu, "Nakadita wihe wachi? Hambembone nongwa yoneche kwa heye ilingumuwala kubagama, ahyo ndowakundiza yazapigwe ng'hobwa, hamba ndomlechela."

23 Ila hewo nawalutilila kutowa iyowe kwa mong'ho ng'hatu, wolonga kota Yesu yawambigwe, ahyo iyowe lya hewo nalisumya. 24 Ahyo Pilato nakalavya utaguso kota wadite vyowalingugana. 25 Nakamchumulila kulawa mchinweng'ho yula wamganile, yawele nakawichigwa mchinweng'ho kwa kwambuza kubelenhuka na kukopola, nakamlavya Yesu kwa hewo wamditile kota vyowalingugana.

26 Lowawele womuhilika, naweting'hana na munhu yumwe yalinguchemigwa Simoni mwenyeng'haye wa Kulene, yawele nayali yolawa kumgunda. Lelo nawamibata, nawamdwika ula msalaba yauhole kumwando kwa Yesu. 27 Lung'hongola lwa wanhu nalumuwiza Yesu, hali olo lung'hongola nawali wadala wawele womlilila na kumlombochezela. 28 Yesu nakawagalamchila, nakalonga, "Hemwe wadala wa Yelusalemu! Mleche kundilila heni, ila mililile mwemwe na kwa chiwalo cha wana wa hemwe. 29 Kwa vila ndikomya, kwa vila mazuwa ganguya molonga, ‘Fola wala wawele mhende, wawele hawanawahika kuponda ne konhyeza wana!’ 30 Mhela awo wanhu wokwaluka kuvilonjela vidunda vikulu, ‘Tugwile!’ Na vidunda vidodo, ‘Tugubiche!’ 31 Kwa vila wone nawadita ahi kuli igodi idodi, yowa ndaze kuli igodi likalile?"

32 Nawawahola kahi wanhu wanji weli wawele na nongwa, wabagame hamwe na heye. 33 Lowafichile honhu halinguchemigwa Izeje lya Mutwi, aho ndo nawamuwamba Yesu hamwe na wala wawele na nongwa, yumwe kuli ubanzi wa kudilo na yumwe kuli ubanzi wa kumoso. 34 Yesu nakalonga, "Mhaza uwalechele kwa vila hawavizelele chowalingudita." Hamba nawegawila mivalo ja heye kwa kujitowela simbi. 35 Wanhu nawali wemile aho womlola. Nawo vilongozi nawambeza wolonga, "Nakawalohola wanhu wanji, lelo yelohole yuye, kota heye ndo Kilistu yahaguligwe na Nguluwi!" 36 Nawo wamizi nawambeza, nawamlutila na kumbaka sichi, 37 wolonga, "Wilohole gwegwe wone hegwe ndo uli Mndewa wa Wayahudi."

38 Kuli msalaba mchanya mwa mutwi wa heye, nakwandichigwa, "Ayu ndo Mndewa wa Wayahudi."

39 Yumwe wa wala wawele na nongwa wawambigwe hamwe na Yesu nakamliga, yolonga, "Hambi hegwe hauwele Kilistu? Lelo wilohole gwegwe na hetwe." 40 Ila yula yawele na nongwa yunji, nakamng'hanuchila myage, yolonga, "Hegwe hambe umdumbe Nguluwi? Hegwe nagwe kwa mumo kuli kutagusigwa kota heye. 41 Hetwe, twangutagusigwa hano kwa mbuli zihile zotuditile. Ila ayu munhu haditile ne nongwa yoneche." 42 Hamba nakamlonjela Yesu, "Gwa Yesu! Ung'humbuche loukwinjila kuli Undewa wa hegwe." 43 Yesu nakamwidichila, "Ndikomya ndangukulonjela lehano kowa hamwe na heni kuli lubehelo kwa Nguluwi."

44 Nayali kota saa sita nemisi, isanya nalileka kulangaza, jiza naligubika isi yeng'ha mbaka saa tisa, 45 ipaziya lya Ng'handa ya Nguluwi nalidejeka kuli vihande vili. 46 Yesu nakalila kwa lizi likulu, yolonga, "Mhaza, kuli moko ga hegwe ndanguwika muhe wa heni." Loyalonjile ago, nakabagama.

47 Aho yula chilongozi wa wamizi, loyagawene galawile, nakamtogola Nguluwi yolonga, "Ndikomya ayu nayali munhu yatanganiche." 48 Wanhu weng'ha wawele nawekungajiza aho kwa chiwalo cha mbuli ayo, lowagawene ago galawile nawahiluka haluga kwa hewo kuno chila yumwe yotowa mhambaga wa heye kwa masinzo. 49 Wala weng'ha wamzelele hamwe na wala wadala wamuwinzile kulawa Galilaya, nawema kutali wolola mbuli ayo.

50 Nakwali na munhu yumwe itagwa lyake Yusufu, mwenyeng'haye wa chijiji chimwe cha Wayahudi chilinguchemigwa Alimataya. Nayali yumwe wa wasekulu wa chitala, nayali munhu wa hachi. 51 Nayali yobeteza kuya kwa Undewa wa Nguluwi. Hanga nayali yumwe wa watagusa kuli chitala chikulu, nahakundile chila chowadile wayage. 52 Ila heye nakaluta kwa Pilato, nakalanda yapegwe lukuli lwa Yesu. 53 Nakaludulisa lukuli alo kulawa kuli msalaba, nakaluwoha kwa sanda ya kitani inojile na kuluwika kuli chilaga chihongoligwe kuli italawe chiwele ching'hali kutiligwa munhu. 54 Zuwa alyo nalyali Ijumaa na kiwika goya kwa Zuwa lya Kwesela nakwali habehi kwaluka.

55 Wala wadala welongoze na Yesu kulawa Galilaya nawamuwinza Yusufu, nawachona chila chilaga na ndaze lukuli lwa Yesu vyoluwichigwe. 56 Hamba nawahiluka haluga, nawahola unhunyhililo na malihamu, nawalubakaliza lukuli lwa Yesu. Zuwa lya Kwesela, nawesela kota vyoiwichigwe.