1 Yesu nakawalonjela walanguswa wa heye, "Nakwali na munhu yumwe yawele na lufufu na yalingulolela lufufu lwa heye. Wanhu nawamlonjela kota ayo yalingulolela mijito ja hegwe kanguwifya lufufu. 2 Yula yawele na lufufu nakamchema, nakamlonjela, ‘Ndo mbuli zachi zondili nguhilika kuwala hegwe? Undajile hisabu ya chomhatile na chonhumiye kuli lufufu lwa heni, kwa vila hambe ulutilile kuwa mlolezi.’ 3 Yula mlolezi nakejesa mnhumbula ya heye, Mkulu wa heni nakambusa kuli mijito ja heni, ndodita ndaze? Ndahela mong'ho wa kulima, ndangona soni kulanda kota wazunwa. 4 Ena, ndanguvizela ndite choni, leka hala hondiwinjingwa kuli mijito ja heni, wanhu wanyheme haluga ha hewo. 5 Hamba nakawachema weng'ha walingudayigwa na mkulu wa heye, nakamuuza wa mwaluko, ‘Kwangudayigwa chasi chachi na mkulu wa heni?’ 6 Heye nakedichila, ‘Madalamu miya nane ga mafuta ga mzeituni.’ Yula mlolezi nakamlonjela, ‘Uhole ayi kalatasi ilingulajila ndaze vyoulingudayigwa na wandiche miya zine.’ 7 Kahi nakamuuza munhu wa keli, ‘Hegwe kwangudayigwa chasi chachi?’ Heye nakedichila, ‘Ngano vipimilo elufu imwe.’ Yalingulolela nakedichila, ‘Uhole kalatasi ya hegwe ya ulajilo na wandiche miya nane.’ 8 Lelo yula mkulu nkamtogola ayo yalingulolela kwa vila vyoyaditile kwa luhala. Kwa vila wahu wa isi ayi ndo wajuvi ng'hatu howopala vinhu vya isi kusinda wanhu wa kuli lumuli."

9 Yesu nakalutilila kulonga, "Mtumiye lufufu lwa kuli isi ayi kwa kipalila goloko leka holumala muchumulilwe kuli kikala kwa mazuwa gose. 10 Yoneche yalinguganigwa kuli mbuli ndodo, kahi ndo wa wakukundigwa kuli mbuli ng'hulu. Ila munhu halingukundigwa kuli mbuli ndodo, howeza kukundigwa kuli mbuli ng'hulu. 11 Wone hamuwele wa kukundigwa kuli lufufu lwa isi, ndo whaani kowapa lufufu lwa kukomya? 12 Wone hamuwele wa kukundigwa kuli lufufu lwa yunji, ndo whaani kowapa lufufu lwa hemwe?

13 "Haduhu chitumagwa yalinguweza kuwakolela mijito wakulu weli, kwa vila komzudila yumwe na kumgana yunji, ama kochilumba na yumwe na kumbeza yunji. Hambe muweze kumfugamila Nguluwi na lufufu kwa mhela umwe."

14 Mafalisayo lowahuliche ago nawambeza Yesu kwa vila nawali wogana sendi lukami. 15 Aho nakawalojela, "Hemwe mwangilajila kota mna hachi hali wanhu, ila Nguluwi kanguzizela nhumbula za hemwe. Kwa vila vinhu viwele wanhu wanguvigana ng'hatu kwa Nguluwi ndo uzudizo.

16 "Malajizo na gala gandichigwe na waloli navyali mbaka kuli mhela wa Yohani Mbatiza. Kulawila aho Mbuli Inojile ya Undewa wa Nguluwi yangudamligwa na chila munhu kangwinjila kwa mong'ho. 17 Ndo ubewe ng'hatu kwa ulanga na isi kukola kusinda helufi imwe ya malajizo kusigwa.

18 "Munhu yoneche yalingumleka mchewake na kumhesa yunji kangudita ung'hondwa na yoneche yalingumhesa mdala yalechigwe na mlume wa heye kangudita ung'hondwa.

19 "Nakwali na munhu yumwe yawele na lufufu, yawele yovala mivalo ja sendi nyinji ng'hatu ja kitani inojile na kudita mnvina chila zuwa. 20 Kuli lwizi lwa ng'handa ya heye nakwali na munhu yumwe yalinguchemigwa Lasalo, yawele nayali yamemile vilonda mlukuli. 21 Lasalo nakagana yalye usanyangwa ulagale kulawa kuli chisaga cha yula yawele na lufufu, mzidi wa ago mibwa najali jikuya na kumyanga vilonda vya heye!

22 "Lelo yula mzunwa nakabagama, nawo mwahilisi nawahola, nawamuwika habehi na Abulahamu na yula yawele na lufufu naye nakabagama, nakatiligwa. 23 Yula yawele na lufufu loyawele yogazigwa kula kuli isi ya wabagame, nakenula meho ga heye, nakamona Abulahamu kwa kutali na Lasalo yekale hafungo hake. 24 Lelo nakachema kwa lizi likulu, ‘Mhaza Abulahamu, mbonele isungu, mlonjele Lasalo yadolize chidole cha heye kuli mazi leka yahoze umyango wa heni kwa vila ndangugazika ng'hatu kuno kuli chiluli.’

25 "Abulahamu nakedichila, ‘Ukumbuchile kota kuli kikala kwa hegwe nakubochela, naye Lasalo nakabochela gehile. Lelo heye kanguhozwa nagwe kwangugazigwa. 26 Mzidi wa ago, hana ikulubila ikulu hali hetwe na hemwe, leka wala walingugana kuya kwa hemwe kulawa kwa hetwe walemwele na walingugana kuya kwa hetwe kulawa kwa hemwe walemwele.’ 27 Yawele na lufufu nakalonga, ‘Mhaza Abulahamu ndangukulanda umlajize Lasalo yalute kaye kwa mhaza wa heni. 28 Kwa vila ndina wang'holozangu wahano, yalute yawakanye leka waleche kuya kuno kuli magazo.’ 29 Ila Abulahamu nakamlonjela, ‘Wang'holozo wanago Maandiko ga Musa na waloli, wawahulichize awo.’ 30 Ila heye nakalonga, ‘Hebu mhaza Abulahamu! Wone munhu kozilipuka kulawa kwa wabagame na kuwalutila, womgalamchila Nguluwi.’ 31 Abulahamu nakalonga, ‘Wone hambe wawahulichize Musa na waloli, hawojesa ne munhu hoyozilipuka kulawa kwa wabagame.’ "