1 Hamba Yesu nakawasimila walanguswa wa heye nhelo leka kuwalajila kota yanguwagana kulanda ne kugozola. 2 Nakalonga, "Kuli muji umwenga nakwali na mtagusa yumwe yawele hamdumbile Nguluwi ne kumlajila munhu igano. 3 Kuli muji wuwo nakwali na mdala yafililwe na mlume yawele nayali yoluta kwa heye chila mhela yomlanda yamhe hachi ya heye kulawa kwa mng'honyo wa heye. 4 Kwa mhela winji ayo mtagusa nahaganile kumlewela ayo yafililwe na mlume, ila kuli kuduma nakelonjela, ‘Hanga hambe ndimdumbe Nguluwi ne kuwalajila wanhu igano, 5 ila kwa vila ayu yafililwe na mlume kangunhunya, ndoilewela hachi ya heye leka yaleche kunhosa kwa kuya chila mhela!’ "

6 Lelo Mkulu nakalutilila kulonga, "Mhulichize ndaze vyoyalonjile ayo mtagusa yehile. 7 Ndaze, Nguluwi howalewela wala yawahagule, wala walingumlanda nemisi na nechilo? Kokawila kuwahulichiza? 8 Ndangukulonjela kowalewela himahima. Ila ndaze, Mwana wa munhu hoyokuya kogafika makundo kuli isi?"

9 Hamba Yesu nakalonga nhelo ayi kwa wala wanhu walingiwona kota watanganika na kuwabeza wanji. 10 Nakalonga, "Wanhu weli nawaluta kuli ng'handa ya Nguluwi kulanda, yumwe nayali Mfalisayo na yunji nayali mkongoza kodi.

11 "Ayo Mfalisayo nakema, nakalanda mnhumbula, ‘Gwa Nguluwi, ndangulonga malumbo kwa vila heni siwele kota wanhu wanji walinguboka na walingubunza na wang'hondwa ne kota ayu mkongoza kodi. 12 Ndangwesela kulya mazuwa meli kwa juma, ndangulavya zaka honhu hamwe ha kumi ha lufufu lwangu.’

13 "Ila yula mkongoza kodi nakema kutali ne henule meho gake kilanga, ila naketowa mhambaga kwa masinzo yolonga, ‘Gwa Nguluwi mbonele isungu heni ndiwele na gehile!’ 14 Ndangukulonjelani, ayo mkongoza kodi nakahiluka kaye yawele yalechelwe gehile ga heye kusinda yula Mfalisayo. Kwa vila chila yalingikwiniza koduliswa na yoneche yochidulisa, kokwinizwa."

15 Wanhu nawamigalila Yesu wana wadodo yawawichile moko. Walanguswa wawawene nawawang'hanuchila. 16 Ila Yesu nakawachema wala wana walute kwa heye, yolonga, "Muwaleche wana wadodo woye kwa heni, mleche kuwalemeza, kwa vila Undewa wa Nguluwi ndo wa wala wawele kota awa. 17 Ndikomya ndanguwalonjela, munhu yoneche yohambe yaubochele Undewa wa Nguluwi kota mwana mdodo, hokwinjila kuli undewa awo."

18 Chilongozi yumwe wa Wayahudi nakamuuza Yesu, "Mlangusa yanojile, ndite ndaze leka nyhalile ukomu wa mazuwa gose?" 19 Yesu nakamwidichila, "Lekachoni kwangunyhema nojile? Haduhu yawele yanojile ila Nguluwi yaliyeng'ha. 20 Kwangujizela mizilo, ‘Uleche kudita ung'hondwa, uleche kukopola, uleche kuhiza, uleche kulavya ulolezi wa udesi, uwahulichize mhaza na mayako.’ " 21 Heye nakedichila, "Ago geng'ha nandigabata kulawila londiwele msongolo." 22 Yesu loyahuche ago nakamlonjela, "Kwanguganigwa kudita mbuli imwe, uguze chila chinhu, uwagawile wanzunwa, nagwe kowa na ng'hano kilanga, hamba uye umbinze." 23 Ila ayo munhu loyahuliche ago nakawa na masinzo ng'hatu kwa vila nayali na lufufu lwinji.

24 Yesu nakamlola, nakalonga, "Ulole vyoiwele ngondo kwa yawele na lufufu kwinjila kuli Undewa wa Nguluwi! 25 Ena, ndo ubewe ng'hatu kwa Ngamiya kukola kuli itubuli lya chihomo kusinda yawele na lufufu kwinjila kuli Undewa wa Nguluwi." 26 Wala wanhu lowahuliche ago, nawalonga, "Whaani yoloholigwa?"

27 Yesu nakedichila, "Gowalingulemwela wanhu, kwa Nguluwi ganguditigwa." 28 Aho Petili nakamwidichila, "Natwe ndaze? Natuleka vinhu vyeng'ha vyotuwelenavyo natukuwinza!"

29 Yesu nakawalonjela, ndikomya ndanguwalonjela, "Munhu yoneche yalechile ng'handa ama mche ama mng'holoze ama mhaza na mamo wa heye na wana kwa chiwalo cha Undewa wa Nguluwi, 30 kobochela menji ng'hatu kuli mhela awu na ukomu wa mazuwa gose kuli mhela ulinguya."

31 Yesu nakawahola wala walanguswa wa heye kumi na weli, nakawalonjela, "Mhulichize! Twanguluta Yelusalemu na chila chinhu chandichigwe na waloli kuwala Mwana wa munhu, gokoligwa. 32 Kwa vila kowichigwa kuli moko ga wanhu wohawamzelele Nguluwi, nawo wombeza na kumliga na kumtemela mite, womzapa ng'hobwa na kumkopola. 33 Naye kuli zuwa lya kadatu kozilipuka."

34 Ila hewo nahawavizelele mbuli ayo ne hado, nawali wavisigwe mana ya ulonzi awo, nahawavizelele choni chilingulonjigwa.

35 Mhela Yesu loyawele habehi kufika Yeliko, nakwali na munhu yumwe yohambe yalole yawele yekalise mnzila yolanda utanzi. 36 Loyahuliche lung'hongola lwa wanhu lwangukola nakauza, "Hana choni?" 37 Nawamlonjela, "Yesu wa Nasaleti kangukola." 38 Naye nakakwiniza lizi yolonga, "Yesu Mwana wa Daudi, umbonele isungu!"

39 Wala wanhu wamlongole nawamng'hanuchila, nawamlonjela yanyamalile, ila heye nakakwiniza lizi ng'hatu, "Mwana wa Daudi umbonele isungu."

40 Yesu nakema, nakawalonjela wamigale yula munhu kwa heye. Loyafichile habehi, Yesu nakamuuza, 41 "Kwangugana ndikuditile choni?" Naye nakedichila, "Mkulu ndangulanda ndole kahi."

42 Yesu nakamlonjela, "Ulole! Makundo ga hegwe nagakulohola."

43 Baho du yula yohambe yalole nakaluka kulola, nakamuwinza Yesu kuno yomtogola Nguluwi. Wanhu weng'ha lowaziwene mbuli azo nawamtogola Nguluwi.