1 Yesu nakawachema wala walanguswa wa heye kumi na weli na kawapa mong'ho na ludali lwa kulavya vijeni na kuwosela wanhu matamwa. 2 Hamba nakawalajiza walute kudamla mbuli ya Undewa wa Nguluwi na kuwosela wanhu matamwa. 3 Nakawalonjela, "Lomkuka mleche kuhola chinhu choneche chila, mleche kuhola ng'hweku ne mhako ne chilyo ne sendi ne igwanda lya keli. 4 Kuli ng'handa yoneche yomkwinjila na kubocheligwa, mikale mumo mbaka lomkuka kuli muji awo. 5 Wone waleche kuwabochela mlawe kuli muji awo, lomkuka mkung'hune nhimbwisi iwele mmagulu genu leka uwe ulolezi wa kuwapanjila hewo." 6 Lelo walanguswa nawaluka majendo, nawakola kuli vijiji wodamla Mbuli Inojile na kuwosela wanhu matamwa chila honhu.

7 Lelo Helodi mndewa wa Galilaya nakahulika mbuli zeng'ha lozilawile, nayali na lunhwinhwi kwa vila wanhu nawali wolonga kota Yohani Mbatiza nakazilipuka kulawa kwa wabagame. 8 Wanji nawalonga Eliya nakalawila na wanji nawalonga yumwe wa waloli wa katali nakazilipuka. 9 Ila mndewa Helodi nakalonga, "Ayo Yohani nandimdumula mutwi. Lelo ndo whaani ayo yondilinguhulika mbuli za heye?" Nakawa na maya ya kumona.

10 Wala watumigwa lowahiluche, nawamlonjela Yesu chila chinhu chowaditile. Yesu kawahola, nakaluta nawo chinyele mbaka kuli muji ulinguchemigwa Betisaida. 11 Ila wanhu lowavizelele koyalutile, nawamuwinza. Yesu nakawabochela, nakalonga nawo kuwala mbuli za Undewa wa Nguluwi, kawalohola wala waganile kuloholigwa.

12 Isanya lolyaluche kuzinga, wala walanguswa kumi na weli nawaluta na kumlonjela, "Walonjele wanhu walute kuli vijiji na migunda ja habehi, leka wapale chilyo na honhu ha kuwasa kwa vila aha hotuli twa kuchiwala." 13 Ila Yesu nakawedichila, "Muwape chilyo walye." Hewo nawamwidichila, "Twahela mzidi wa mibumunda jihano na somba mbili. Hanji tulute tukagule chilyo cha kwenela wanhu weng'ha!" 14 Wawele aho ndo walume elufu zihano. Yesu kawalonjela walanguswa wa heye, "Muwalonjele wanhu wekalise kuli vilundo vya wanhu makumi gahano chila chilundo." 15 Wala walanguswa wadita ahyo, nawawadita wanhu weng'ha nawekala. 16 Hamba Yesu nakajihola jila mibumunda jihano na zila somba mbili, nakalola kilanga, nakavitambichiza na kuvimogola. Hamba nakawapa walanguswa wa heye leka wawagawile wanhu. 17 Wanhu weng'ha nawalya, naweguta. Nawakungajiza chilyo chisigale, vimema vikowe kumi na vili.

18 Zuwa limwenga Yesu loyawele yomlanda Nguluwi yaliyeka, walanguswa wa heye nawali habehi na heye. Lelo nakawauza, "Wanhu wangulonga kota heni nda whaani?" 19 Nawo nawamwidichila, "Wanji wangulonga kota hegwe ndo Yohani Mbatiza, wanji wangulonga kota hegwe ndo Eliya na wanji wangulonga kota kwa yumwe wa waloli wa katali yazilipuche." 20 Hamba nakawauza, "Namwe mwangulonga heni nda whaani?" Petili nakedichila, "Hegwe ndo Kilistu Mlohozi yahaguligwe na Nguluwi."

21 Hamba Yesu nakawalonjela waleche kumlonjela munhu yoneche mbuli ayo. 22 Yesu nakalonga, "Naimgana Mwana wa munhu kugazigwa ng'hatu na kulemigwa na wasekulu na vilongozi wa watambika na walangusa wa malajizo ga Musa. Koganigwa yakopoligwe, ila zuwa lya kadatu kozilipuka." 23 Hamba nakawalonjela weng'ha, "Munhu yoneche yogana kumbinza heni yangumgana yeleme yuye, yahole chiwambilo cha heye chila zuwa, yambinze. 24 Kwa vila munhu yoneche yogana kuulohola ukomu wa heye kowajiliza, ila yoneche yowajiliza ukomu wa heye kwa chiwalo cha heni koulohola. 25 Ndaze, hana mzidi wachi kwa munhu kupata lufufu lweng'ha lwa isi kwa kiyajiliza ama kidumya yuye? 26 Wone munhu kombonela soni na malanguso ga heni, naye Mwana wa munhu komonela soni mhela hoyokuya kuli welile wa heye na wa mhaza na wa wahilisi welile wa kilanga. 27 Ndikomya ndangukulonjelani, hana wanhu wanji hano hawobagama kung'hali kuwona Undewa wa Nguluwi."

28 Mazuwa nane hamba, Yesu loyasindile kulonga mbuli azo, Yesu nakawahola Petili na Yohani na Yakubu, nakaluta nawo kuli chidunda kulanda. 29 Loyawele yolanda, kumeho kwa heye nakugaluka na mivalo ja heye najiwa mizelu ng'hatu! 30 Baho nawoneka wanhu weli wolongasa naye. Wanhu awo ndo Musa na Eliya, 31 wawele na welile, nawalonga naye kuwala kubagama kwa heye kuwele kolawila ako Yelusalemu. 32 Petili na wayage nawali wawasile ng'hatu, lowalilimche nawona welile wa Yesu na wala wanhu weli wawele wemile hamwe na heye. 33 Lelo wanhu awo weli lowawele wokuka, Petili nakamlonjela Yesu, "Mkulu, ya goya hetwe kikala hano! Lelo tuzenje vibumuli vidatu, chimwe cha hegwe na chimwe cha Musa na chimwe cha Eliya." Ila Petili nahavizelele choyalingulonga.

34 Petili loyalutilile kulonga ago, ng'hungugu nailawila na kuwagubika, nawo nawadumba ng'hatu lowagubikwe na ng'hungugu ayo. 35 Lizi nalilawa kuli yila ng'hungugu, nalilonga, "Ayu ndo mwana wa heni yondimhagule, mumhulichize." 36 Vyowahuliche lizi alo, Yesu nakoneka yawele yaliyeka. Walanguswa nawanyamalila kuwala mbuli ayo ne kumlonjela munhu yoneche gala galawile.

37 Mitondo lowaduliche kulawa kuli chidunda, naweting'hana na lung'hongola lwa wanhu. 38 Munhu yumwe kuli lula lung'hongola lwa wanhu nakakwiniza lizi, nakalonga, "Mlangusa, ndangukulanda umlole mwana wa heni, kwa vila ndo mwana wa heni wa udewele. 39 Mala nyinji chijeni changumtunya na kumdita yatowe iyowe, hamba changumgwisaga na kumdita yalavye ifulo kumlomo. Acho chijeni changumgaza ng'hatu ne kumleka. 40 Nandiwalanda walanguswa wa hegwe wachilavye chijeni acho, ila nawalemwela." 41 Yesu nakawedichila, "Hemwe ulelo lulihela makundo na lwajilile! Ndochikala na hemwe na kuwemilila mbaka nili? Migale mwanago hano." 42 Mhela msongolo ayo loyawele yokuya kwa Yesu, chila chijeni nachimgwisa na kumlavya ifulo kumlomo. Ila Yesu nakaching'hanuchila chila chijeni nakamlohola yula msongolo na kumhilula kwa mhaza wa heye. 43 Wanhu weng'ha nawabubuwala kwa kona ukulu wa Nguluwi.

Wala wanhu lowawele wang'hali wabubuwale kwa chiwalo cha mbuli zeng'ha zoyaditile, Yesu nakawalonjela walanguswa wa heye, 44 "Mhulichize goya gano gondiwalonjela sambi. Mwana wa munhu kobelenhukwa na kowichigwa kuli moko ga wanhu." 45 Ila hewo hawavizelele mana ya uviso wa ulonzi awo. Kwa vila ulonzi awo nauvisigwa kwa hewo leka waleche kuvizela, nawo nawadumba kumuuza Yesu kuwala ulonzi awo.

46 Nakwali na kitwanza hali walanguswa kuwala ndo whaani hali hewo kowa mkulu kusinda weng'ha. 47 Ila Yesu nakagazela majesa ga hewo, naye nakamhola mwana, nakamuwika habehi na heye. 48 Hamba nakawalonjela, "Munhu yoneche yalingumbochela mwana ayu mdodo kwa itagwa lya heni, kangumbochela heni na munhu yoneche yalingumbochela heni, kangumbochela yula yandajize. Kwa vila yula yawele mdodo kusinda weng'ha hali hemwe ndo yawele mkulu kusinda weng'ha."

49 Yohana nakamlonjela Yesu, "Mkulu natumona munhu yolavya chijeni kwa itagwa lya hegwe, natwe natumlemeza kwa vila heye hawele yumwe wa hetwe." 50 Ila Yesu nakalonga, "Mleche kumlemeza! Kwa vila yohambe yetwanze na hemwe ka ubanzi wa hemwe."

51 Mhela louwele habehi wa Yesu kuholigwa kilanga, nakamula kuluta Yelusalemu. 52 Lelo nakawalajiza wasenga wamlongole, nawo nawaluta kuli chijiji cha Samaliya leka wamuwichile goya chila chinhu. 53 Ila wenyeng'haye hawambochele kwa vila nayali yoluta Yelusalemu. 54 Walanguswa wa heye, wawele ndo Yohana na Yakubu lowagawene ago nawamuuza Yesu, "Mkulu, kwangugana tuchilonjele chiluli kulawa kilanga chiwadulichile na kuwalakaza?" 55 Ila heye nakawagalamchila, nakawadeuza. 56 Nawalawa, nawaluta kuli chijiji chiyage.

57 Lowawele mmajendo munhu yumwe nakamlonjela Yesu, "Ndokuwinza koneche kouluta." 58 Yesu nakamwidichila, "Mikanhu jina mhalika na videje vya kilanga vina vimvulila ila Mwana wa munhu kahela honhu ha kwesela."

59 Hamba Yesu nakamlonjela munhu yunji, "Umbinze." Ila munhu ayo nakalonga, "Mkulu ng'hundize tandi ndute ndikamtile mhaza wa heni." 60 Yesu nakamwidichila, "Waleche wabagame wawatile wabagame wa hewo, ila hegwe ulute kadamle Undewa wa Nguluwi."

61 Munhu yunji nakamlonjela, "Ndokuwinza, ila ng'hundize ndikawalaje wang'holozangu kaye." 62 Yesu nakamlonjela, "Munhu yoneche yalingibata ihuka yawele goya kulima kuno yolola kumbele, hambe yaganigwe kuli Undewa wa Nguluwi."