1 Zuwa limwe lya kwesela, Yesu nakaluta kulya chilyo kaye kwa mkulu yumwe wa Mafalisayo. Wanhu wawele aho nawali womlolela ng'hatu. 2 Kumwando kwa Yesu nakwali na munhu yumwe yawele na safula nakamlutila. 3 Yesu nakawauza walangusa wa Malajizo na Mafalisayo, "Ndaze, yagoya kulohola kuli zuwa lya kwesela ama hebu?"

4 Ila hewo nawenyamalila. Yesu nakamibata ayo mtamwa, nakamusila utamwa, nakamlonjela yalute. 5 Hamba kawalonjela, "Whaani hali hemwe mwanage ama isenga lya heye wone linjile kuli izimbo kuli Zuwa lya Kwesela holikwega kulilavya?" 6 Nawo nawalemwela kwidichila.

7 Yesu loyawawene wala walalikwe vyowali wohagula honhu ha lutogo ha kikala, nakawalonjela weng'ha nhelo ayi, 8 "Wone munhu yakulaliche kuli mnvina ya kuhesa, uleche kikalisa honhu ha lutogo, yoweza kuwa hana munhu yunji yalalikwe yawele kana lutogo ng'hatu kusinda hegwe, 9 na yawalaliche hemwe kokuya na kukulonjela, ‘Mlechele ayu honhu aha.’ Baho kodeula hali weng'ha na kuluta kikala kumbele ngatu. 10 Ila houlalikwa kuli mnvina, wikale honhu ha kumbele, leka yula yakulaliche hoyokuyila yakulonjele, ‘Goloko, winuche uye wikale kuno kumwando, honhu hanojile ng'hatu.’ Aho kowa utogoligwe hali wanhu weng'ha wekalise hamwe na hegwe. 11 Kwa vila munhu yoneche yalingikwiniza, koduliswa na yoneche yalingidulisa, kokwinizwa." 12 Hamba Yesu nakamlonjela yula yamlaliche, "Wone kowalalika wanhu kulya chilyo cha nemisi ama cha nechilo, uleche kuwalalika goloko wa hegwe ama wang'holozo ama womlingikalasa habehi wawele na lufufu. Kwa vila wone udite ahyo, hewo nawo wokulalika hakaye hawo na wowa wakuhilulile chila chouwaditile. 13 Ila loudita mnvina, walaliche wazunwa na ng'hochele na vyete na wohambe walole 14 nagwe kotambichizwa na Nguluwi. Kwa vila awo wahela chinhu cha kukuhilusila. Nguluwi kokuhilusila kuli mhela wa kuzilipuligwa uwele na hachi."

15 Yumwe wa wala wanhu wekalise hamwe na Yesu kuli chisaga loyahuliche ago, nakamlonjela, "Nakatambichizwa munhu yula yozangulya chilyo kuli Undewa wa Nguluwi."

16 Yesu nakamwidichila, "Munhu yumwe nakawika goya mnvina ng'hulu nakawalalika wanhu wenji. 17 Mhela wa kulya loufichile, nakamlonjela chitumagwa wa heye yawalonjele wala walalikwe, ‘Muye, chila chinhu cha goya.’ 18 Ila weng'ha nawalema, chila munhu nayali yolonga kana mbuli ya kukola. Munhu wa mwaluko nakamlonjela yula chitumagwa, ‘Nangula mgunda, ahyo ndangugana ndute ndikaulole. Dedede, ndangulanda ung'hundize.’ 19 Munhu yunji nakalonga, ‘Nangula misenga kumi ja kulimila, lelo ndamnzila ndanguluta kujijeza, Dedede, ndangulanda ung'hundize.’ 20 Yunji nakalonga, ‘Nanyhesa, ahyo ndolemwela kuya.’

21 "Yula chitumagwa nakahiluka na kumlonjela mkulu wa heye mbuli ayo. Ayo yawele na ng'handa loyahuliche ago nakazudila, nakamlonjela yula chitumagwa, ‘Ulute himahima nzila ng'hulu na nzila ndodo za miji, uwegale wanhu wawele wazunwa na vyete na wohambe walole na ng'hochele.’ 22 Yula chitumagwa nakamlonjela, ‘Mkulu, gala goundajize nandigakolela mijito kota vyoundajize, ila hang'hali hana honhu hasigale.’ 23 Yula mkulu nakamlonjela chitumagwa wa heye, ‘Ulute kuli nzila ng'hulu na nzila ndodo hanze ha muji na uwegale wanhu kwa lupichi leka ng'handa ya heni imeme. 24 Kwa vila ndangukulonjelani, haduhu ne yumwe kuli wala walalikwe yojeza chilyo kuli mnvina ya heni.’ "

25 Lung'hongola wa wanhu nalwali kuli majendo hamwe na Yesu, naye nakawagalamchila, nakawalonjela, 26 "Munhu yoneche hoyokuya kwa heni howa mlanguswa wa heni wone hanganile ng'hatu heni kusinda mhaza wa heye na mamo wa heye na mdala wa heye na wanage na wang'holoze na walumbuze, ena mbaka kikala kwa heye yuye. 27 Munhu yoneche yohambe yahole msalaba wa heye na kumbinza hambe yaweze kuwa mlanguswa wa heni.

28 "Whaani hali hemwe wone yagane kuzenga ng'handa hambe yekalise leka yejese kota kana sendi za kuhega za kweneza kuzenga? 29 Leka yaleche kulemwela kuzenga hala du hoyosinda kubawa msisi, weng'ha walingulolela wokwaluka kumbeza heye, 30 wolonga, ‘Munhu ayu nakaluka kuzenga, ila nakalemwela kusinda kuzenga!’

31 "Ama ndo mndewa wachi yalingulawa na kuluta kitowa na mndewa yunji ne kijesa wone kowa na wamizi elufu kumi (10,000) koweza kitowa na yula yalinguya na wamizi elufu makumi meli (20,000)? 32 Wone kangona kolemwela, kowalajiza wasenga wamdedeze yula mndewa yang'hali kutali leka waleche kitowa, wekale goya. 33 Hihyo du, yoneche hali hemwe yawele kangulemwela kuleka vyeng'ha vyoyawelenavyo, howeza kuwa mlanguswa wa heni.

34 "Mwino ndo chinhu chinonile, ila wone uwe haunonile, wonojezwa na choni mbaka uwe unonile kahi? 35 Hambe itanze chinhu kuli misanga ne kuli mboto, wanhu woutaga kutali. Yawele na makutu yahuliche!"