1 Mhela wuwo, wanhu wamwe nawamlonjela Yesu mbuli za wanhu wa Galilaya wawele Pilato nayali yawakopole na danda ya awo wanhu nakahanzanya na nhambiko yowawele woilavya. 2 Yesu nakawauza, "Mwangijesa kota Wagalilaya awo wawele nawabagama nawali na gehile ng'hatu kusinda Wagalilaya wanji weng'ha? 3 Hebu! Ndanguwalonjelani, wone namwe hamlonjile gehile ga hemwe kwa Nguluwi, modumigwa kota hewo. 4 Ama wala wanhu kumi na nane wabagame kwa kugwilwa na ilingo ako Siloamu, mwangijesa kota hewo nawali wehile kusinda wanhu weng'ha wawele nawali wochikala Yelusalemu? 5 Hebu! Ndanguwalonjelani, wone namwe hamlonjile gehile ga hemwe kwa Nguluwi, weng'ha modumigwa kota hewo."

6 Hamba Yesu nakawalonjela nhelo ayi, "Munhu yumwe nayali na igodi lya mtini kuli mgunda wa heye wa zabibu. Munhu ayo nakaluta kubawa tini kuli igodi alyo, ila hapatile ne imwe. 7 Ahyo nakamlonjela yalingulolela mgunda, ‘Lole! Kwa mhela wa miyaka jidatu nandali ndikuya kubawa mafuza ga igodi ali ne kupata choneche. Uliteme igodi ali! Lekachoni lilutilile kuwifya misanga hela?’ 8 Ila ayo yalingulolela mgunda nakedichila, ‘Mkulu, tulileche kwa mwaka umwe, nani ndouhalila na kuuwichila mboto. 9 Wone lyolela kuli mwaka ulinguya, goya! Ila wone halilelile, kolitema.’ "

10 Zuwa lya Kwesela, Yesu nayali yolangusa kuli sunagogi. 11 Mhela wuwo nakoya mdala yumwe yawele na chijeni, chijeni acho nachimdita mdala ayo yawe na chiduhi kwa mhela wa miyaka kumi na nane na nayali yolemwela kwima kwa kugoloka. 12 Yesu loyamuwene, nakamchema, nakamlonjela, "Mdala, nakusilwa utamwa wouwele nawo." 13 Yesu nakamuwichila moko yula mdala, baho du yula mdala nakema kwa kugoloka, nakaluka kumtogola Nguluwi.

14 Ila chilongozi wa sunagogi nakazudila kwa vila Yesu nakamusila munhu utamwa kuli Zuwa lya Kwesela. Ahyo nakalulonjela lula lung'hongola lwa wanhu, "Hana mazuwa sita gawele wanhu wanguganigwa kukola mijito. Kuli mazuwa ago, muye musilwe matamwa genu, ila haiwele kuli Zuwa lya Kwesela."

15 Ila Mkulu nakamwidichila, "Hemwe wahadi! Whaani hali hemwe hambe yalichumulile isenga lya heye ama idogowi lya heye kulawa kuli ibani na kulihilika kunwa mazi kuli Zuwa lya Kwesela? 16 Lelo hano kabaha mhinza wa Abulahamu, yawele Limazoga nalimdita yawe chete kwa miyaka kumi na nane. Lelo haganigwe kuloholigwa kuli Zuwa lya Kwesela?" 17 Loyasindile kulonga ago, wala walingitwanza na heye nawona soni, ila wanhu wanji nawasangalala kwa vinduzanduza vyoyaditile.

18 Hamba Yesu nakauza, "Undewa wa Nguluwi wangiwhana na choni? Ndouwhaniza na choni? 19 Nauwhana na nyhadikwa ya haladali, iwele munhu nakaihola na kuinyala kuli mgunda wa heye. Nyhadikwa ayo nayota, hamba naliwa igodi ikulu mbaka videje vya kilanga navizenga vimvulila vyawo kuli nhagala zake."

20 Yesu nakauza kahi, "Ndouwhaniza na choni Undewa wa Nguluwi? 21 Wangiwhana na nungo iwele mdala nakaihola na kuhanzanya na utimbo vidoto vidatu, hamba utimbo weng'ha naufuluma."

22 Yesu nakalutilila na majendo kuluta Yelusalemu. Loyawele mzila, nakakola kuli miji na vijiji kuno yowalangusa wanhu. 23 Munhu yumwe nakamuuza, "Mkulu, ndo wanhu wachefu hela wawele woloholigwa?" 24 Yesu nakamwidichila, "Mikangaze ng'hatu kwinjila kwa kukolela kuli lwizi luzisili, kwa vila ndangukulonjelani kota wanhu wenji wojeza kwinjila, ila wolemwela. 25 Mhela yawele na ng'handa hoyokwinuka na kuhinda lwizi, mokwima kunze kuno muhodiza lwizi na kulonga, ‘Mkulu, tuchumulile lwizi.’ Ila heye kowedichila, ‘Siwazelele ne komlawile.’ 26 Aho ndo mwokwidichila, ‘Natulya na kunwa hamwe na hegwe, kahi nakutulangusa kuli vijiji vya hetwe.’ 27 Ila heye kowedichila, ‘Siwazelele hemwe ne komlawa. Muche hali heni, hemwe wadita gehile!’ 28 Aho ndo molila na kujejeda mizino, homuwona Abulahamu na Isaka na Yakubu na waloli weng'ha wawele hali Undewa wa Nguluwi, ila hemwe namtozigwa kunze! 29 Wanhu wokuya kulawa kolilawilaga isanya na kolizinjilaga isanya na kasikazini na kusini, nawo wochikala kuli mvina ya Undewa wa Nguluwi. 30 Ena, wala wawele kuli kuduma wowa wa mwaluko, na wala wawele wa mwaluko wowa kuli kuduma."

31 Mhela wuwo wamwe wa Mafalisayo nawamlutila Yesu, nawamlonjela, "Uche hano ulute honhu hanji, kwa vila Helodi kangugana kukukopola." 32 Yesu nakawedichila, "Mlute mkalilonjele ahi alyo likanhu, ‘Lehano na mitondo ndanguviwinga vijeni na kuwosela wanhu matamwa, haucha ndosinda mijito ja heni.’ 33 Ahyo lehano na mitondo na haucha, ndanguganigwa ndutilile na majendo, kwa vila haiwele goya mloli wa Nguluwi yakopoligwe hanze ha Yelusalemu.

34 "Yelusalemu! Gwa Yelusalemu! Kwanguwakopola waloli na kuwatowa kwa maganga wala walajizwe kwa hegwe. Lwa kalinga nanjeza kuwakungajiza wana wa hegwe kwa heni kota vila ng'huku vyoilingukungajiza vinziya vya heye hasi ha mabawa gake, ila hegwe huganile! 35 Ulole, ng'handa ya hemwe nailechigwa uchiwa. Ndanguwalonjelani hammbona kahi mbaka mhela wula homlonga, ‘Yatambichizwe ayo yalinguya kwa itagwa lya Mkulu Nguluwi.’ "