1 Zuwa limwe Yesu nayali honhu hamwe yolanda. Loyasindile kulanda, mlanguswa wa heye yumwe nakamlonjela, "Mkulu, twangukulanda utulanguse kulanda kota Yohani Mbatiza vyoyawalanguse walanguswa wa heye."

2 Yesu nakawalonjela, "Lomlanda, mlonje hino,

" ‘Mhaza,

itagwa lya hegwe litogoligwe,

undewa wa hegwe uye.

3 Utugalile chilyo cha hetwe cha chila zuwa.

4 Ugalechele gehile ga hetwe,

kota hila vyotulinguwalechela weng'ha watuditile gehile.

Uleche kutwinjiza kuli kujezigwa.’ "

5 Hamba Yesu nakawalonjela walanguswa wa heye, "Ndo whaani hali hemwe yawele na goloko, nakaluta kwa heye nechilo na kumlonjela, ‘Goloko, ndangukulanda umhe heni mibumunda jidatu, 6 kwa vila goloko wa heni nakoya kwa heni kulawa mmajendo, nani ndahela ne chilyo cha kumha heye.’ 7 Naye yawele mng'handa yahamwidichile, ‘Uleche kunhunya! Heni na wanangu mana tuwasa. Hambe nyhinuche kumha hegwe chinhu choneche chila.’ 8 Ndanguwalonjelani, hanga ayo munhu hokwinuka na kumha ajo mibumunda kwa vila ndo goloko wa heye, ila kwa chiwalo cha kulutilila kulanda kokwinuka na kumha heye chasi choyalingugana.

9 "Ahyo ndanguwalonjelani, mlande namwe mopegwa na mpale namwe mochona na mhodize, namwe mochumulilwa. 10 Kwa vila yoneche yalingulanda kangupewaga na chila yalingupala kanguchonaga na chila yalinguhodiza lwizi kanguchumulilwaga. 11 Ndaze, hana yoneche hali hemwe yawele komha mwanage izoka hoyolanda somba? 12 Ama komha mwana nyinje hoyolanda ifinga? 13 Wone hemwe muwele wehile mwanguvizela kuwamha wana wa hemwe vinhu vinojile, ndikomya Mhaza wa hemwe yawele kilanga kodita mzidi ng'hatu, kowamha Muhe Yelile wala walingumlanda?"

14 Zuwa limwe Yesu nayali yochilavya chijeni chimditile munhu yumwe yawe hambe yalonje. Acho chijeni lochilawile, yula munhu nakaluka kulonga, lung'hongola lwa wanhu nalububuwala. 15 Ila wanhu wanji nawalonga, "Kangulavya vijeni kwa ludali lwa Belisebuli, mkulu wa vijeni." 16 Wanji nawamjeza Yesu, nawagana yawalajile ulajilo kulawa kilanga. 17 Ila Yesu nakavizela chowalingijesa, nakawalonjela, "Undewa woneche ugawanuche kuli vilundo vilingitwanza, hambe uweze kulutilila, hihyo du na lukolo loneche lulingitwanza lodumigwa. 18 Wone Limazoga lyangitwanza liliyeka, undewa wake wokwima ndaze? Ndanguwalonjela, kwa vila mwangulonga kota ndangulavya vijeni kwa ludali lwa Belisebuli. 19 Wone ndangulavya vijeni kwa ludali lwa Belisebuli, ndaze walinguwawinza, hewo walavyaga vijeni kwa ludali lwa whaani? Kwa chiwalo acho hewo ndo wowatagusa hemwe. 20 Ila wone heni ndangulavya vijeni kwa ludali lwa Nguluwi, lelo mvizele kota Undewa wa Nguluwi nawuya kwa hemwe.

21 "Munhu yawele na mong'ho hoyokwamila ng'handa ya heye kwa vinhu vya kitowela ngondo, vinhu vya heye vya kuli kikala goya. 22 Ila wone yoye munhu yawele na mong'ho ng'hatu kusinda heye, komtowa na komsukula vinhu vya kitowela ngondo vyoyali ngitumbila na kuhola vinhu vya heye. 23 Yoneche yohambe yelumbe na heni, kangundema na yoneche yohambe yakungajize hamwe na heni, kangusambalula.

24 "Chijeni hochiwinjigwa kwa munhu, changubemhelaga honhu hagunuche, changupala honhu ha kwesela. Wone hachipatile changilonjelaga, ‘Ndohiluka kaye kwa heni.’ 25 Lochihiluka na kuifika nganda ifajiligwe na kunoligwa, 26 changulutaga kuvihola vijeni vinji saba vihile kusinda heye. Vyeng'ha vyangulutaga na kumwinjila ayo munhu. Ahyo munhu ayo kowa yogazigwa ng'hatu kusinda aho hamwande."

27 Yesu loyawele yolonga ago, mdala yumwe hali lula lung'hongola nakalonga kwa lizi likulu, "Nakatambichizwa mdala yakupondile na kukonyeza!" 28 Yesu nakedichila, "Nawatambichizwa wala walinguhulika na kuhulichiza ulonzi wa Nguluwi."

29 Wanhu lowalutilile konjezeka, Yesu nakalutilila kulonga, "Alu ndo lulelo lwihile. Lwangugana ulajilo, ila halupegwa ulajilo woneche ila wa Yona. 30 Kota hila Yona vyoyawele ulajilo kwa wanhu wa Ninawi, ndo Mwana wa munhu vyoyowa ulajilo kwa wanhu wa lulelo alu. 31 Mndewa wa chidala wa kusini kolawila mhela wa lulelo alu holutagusigwa, naye kolutagusa kota luna wihe. Kwa vila nayali mmajendo kulawa kutali, nakoya kuhulichiza ulonzi wa luhala wa Solomoni na hano hana mkulu kusinda Solomoni. 32 Wanhu wa Ninawi wolawila mhela wa kutagusigwa, nawo wolutagusa lulelo alu kota luna wihe. Kwa vila Wanhu wa Ninawi nawamgalamchila Nguluwi kwa chiwalo cha kudamla kwa Yona, lelo hano hana mkulu kusinda Yona!

33 "Haduhu munhu yalingubwina chenje na kuchigubika na chisaye, ila kanguchiwikaga honhu ha kuwichila chenje leka wanhu howokwinjila wone lumuli. 34 Iziho lya hegwe ndo chenje cha lukuli lwa hegwe. Wone iziho lya hegwe liwe likomu, lukuli lwa hegwe lweng'ha lowa na lumuli. Wone liziho lya hegwe liwe hambe lilole na lukuli lwa hegwe lweng'ha lowa kuli jiza. 35 Lelo wilolele, lumuli louwele mgati mwako luleche kuwa jiza. 36 Wone lukuli lwa hegwe lweng'ha nalumema lumuli ne honhu honeche, kuwa na jiza, lelo kowa lumuli kota hila chenje vyochikulangazila lumuli lwake."

37 Yesu loyawele yolonga, Mfalisayo yumwe nakamlanda yalute haluga hake kulya chilyo, naye Yesu nakaluta, kekalisa kulya chilyo. 38 Mfalisayo ayo nakabubuwala loyamuwene Yesu yolya chilyo ne kuhovuga moko. 39 Mkulu nakamlonjela, "Hemwe Mafalisayo mwanguhovuga chizombe na luhelo kwa kunze, ila mgati mwa nammema ubokaji na wihe. 40 Mwawapoka hemwe! Hamlinguvizela kota yalumbile kunze ndo yalumbile mgati? 41 Mlavye kwa wazunwa vinhu vyomuwele navyo, Nguluwi kosangalala ng'hatu na chila chinhu chomdita chowelizwa.

42 "Mochona hemwe Mafalisayo! Kwa vila mwangumha Nguluwi mwangulavya zaka za vinhu kota vila tangawizi na ibwasi na mboga ziyage zinji za mahamba, ila mwangubeza hachi na igano lya Nguluwi. Namganigwa kudita aga ga keli ne kubeza ago ga mwaluko.

43 "Mochona hemwe Mafalisayo! Kwa vila hemwe mwangugana kikalisa kuli vigoda vya kumwando kuli masunagogi na kulamswa kwa kuhulichiza kuli honhu ha kugula na kuguzila vinhu. 44 Mochona hemwe kwa vila namiwanha kota vilaga vilihela ulajilo, viwele wanhu wanguvibiga ne kuvizela."

45 Yumwe wa walangusa wa Malajizo ga Musa nakamlonjela Yesu, "Mlangusa, vyoulonga ayo kwangutuliga."

46 Yesu nakamwidichila, "Namwe walangusa wa Malajizo mochona! Kwa vila mwanguwadwika wanhu mhomolo ziwele na itunyo ikulu, kuno hemwe hambe mgolole ne chidole kuwatanza. 47 Mochona hemwe! Kwa vila mwanguzenga vilaga vya waloli wa Nguluwi wakopoligwe na wahaza wa hemwe. 48 Namwe mwangulavya ulolezi na kikundiza kwa chila chowaditile wasekulu wa hemwe, nawawakopola waloli, namwe mwanguzenga vilaga vya hewo. 49 Kwa chiwalo cha mbuli hino, luhala lwa Nguluwi lwangulonga hino, ‘Ndowegalila waloli na watumigwa, ila wamwe wowakopola na wanji kuwagaza.’ 50 Ahyo lulelo alu lozapigwa kwa chiwalo cha danda ya waloli weng'ha ibohoche kulawila isi loilumbigwe, 51 kulawa kukopoligwa kwa Abeli mbaka kukopoligwa kwa Sekaliya, yawele nawamkopola hali honhu ha kulavila nhambiko na honhu helile. Ena, ndikomya, lulelo alu lozapigwa kwa madito ago.

52 "Mochona hemwe walangusa wa malajizo! Kwa vila namvisa chichumulilo cha lwizi lwa ng'handa ya luhala, Hemwe hamwinjile na namuwalemeza walingugana kwinjila."

53 Yesu loyawele yokuka hala, wala Mafalisayo na walangusa wa malajizo ga Musa nawaluka kitwanza na heye na kumuuza mbuli nyinji, 54 leka wamgwilize kwa ulonzi wa heye.