1 Zuwa limwe lya kwesela, Yesu na walanguswa wa heye nayali yokola mli migunda ja ngano. Walanguswa wa heye nawaluka kubena mibeleje ja ngano, nawalavya nyhule, nawalya. 2 Mafalisayo wamwenga nawawauza, "Lekachoni mwangudita mbuli hambe ikundigwe kudita kuli Zuwa lya Kwesela?" 3 Yesu nakawedichila nakawalonjela, "Hamilanguse kwa Daudi na wayage lowawele na nzala? 4 Heye nakenjila kuli ng'handa ya Nguluwi, nakahola mibumunda jilavigwe kwa Nguluwi nakalya na kuwapa wayage. Malajizo hambe gakundize wanhu wanji kulya mibumunda ajo, ila wakulu wa watambika hela." 5 Ahyo Yesu nakawalonjela, "Mwana wa munhu ndo Mkulu wa Zuwa lya Kwesela."

6 Zuwa linji lya Zuwa lya Kwesela, Yesu nakenjila kuli sunagogi nakalangusa. Amo namwali na munhu yawele moko wa heye wa kudilo nauzilika. 7 Walangusa wa malajizo ga Musa na Mafalisayo wamwenga nawekala wopala chinhu cha kumlonjeleza Yesu. Ahyo nawali womlola wone komlohola munhu kuli Zuwa lya Kwesela. 8 Ila Yesu nakavizela gowalingijesa, nakamlonjela yula nayali na moko uziliche, "Winuche uye wime hano." Yula munhu kaluta nakema hagati. 9 Hamba Yesu nakawalonjela. "Ndanguwauza, ndaze, yagoya kudita mbuli inojile ama mbuli yihile kuli zuwa lya kwesela, kulohola ukomu ama kudumya?" 10 Nakawalola wanhu weng'ha wawele hala, nakamlonjela yula yaziliche moko, "Ugolole moko wa hegwe." Naye nakagolola moko wa heye nakawa mkomu. 11 Ila hewo nawazudila, nawelonjela ndaze vyowomditila Yesu mbuli yihile.

12 Zuwa limwe Yesu nakaluta kuli chidunda kulanda, nahawasile nechilo yeng'ha yomlanda Nguluwi. 13 Vyokubwemwenzuche, nakawachema walanguswa wa heye, nakawahagula kumi na weli hali hewo wawele nakawachema watumigwa, 14 wawele ndo Simoni yamchemile Petili na Andeleya mng'holoze na Yakubu na Yohani na Filipo na Batolomeo na 15 Matei na Tomasi na Yakubu mwana wa Alufayo na Simoni yachemigwe Selote na 16 Yudasi mwana wa Yakubu na Yudasi Isikalioti yawele yamhinduche Yesu.

17 Yesu loyeduliche hamwe na walanguswa wa heye mchidunda, Yesu nakema honhu hali ibalalika, hamwe na walanguswa wa heye na lung'hongola lwa wanhu walawile nzingo zeng'ha kulawa Yudeya na Yelusalemu na kulawa kuli mwhani ya Tilo na Sidoni. 18 Weng'ha nawoya kumhulichiza Yesu na waloholigwa matamwa gawo. Wala walingugazigwa na vijeni vihile nakawalohola. 19 Wanhu weng'ha nawagana kumdoliza Yesu, kwa vila nawona mong'ho nawali ulawa mgati mwa heye kuwalohola weng'ha.

20 Yesu nakawalola walanguswa wa heye, nakalonga,

"Namtambichizwa hemwe wazunwa,

kwa vila Undewa wa Nguluwi ndo wa hemwe.

21 Namtambichizwa hemwe muwele na nzala sambi,

kwa vila mogutizwa.

Namtambichizwa hemwe muwele ngulila sambi,

kwa vila moseka.

22 Namtambichizwa hemwe, wanhu howokuzudilani,

howowabagulani na kuwaliga,

na kulilema itagwa lya hemwe kota ulonzi wihile,

kwa chiwalo cha mwana wa munhu.

23 Msangalale na kuvina ago hogolawila,

kwa vila chonolo chomuwichilwe kilanga ndo chikulu.

Hihyo ndo wasekulu wa hewo nawawaditila waloli wa Nguluwi.

24 Ila mochona hemwe muwele na lufufu,

kwa vila mhela wa hemwe wa kusechelela naumala.

25 Mochona hemwe muwele miguta sambi,

kwa vila mowa na nzala!

Mochona hemwe mlinguseka sambi,

kwa vila molombocheza na kulila!

26 Mochona hala wanhu howowatogola,

kwa vila wasekulu wa hewo nawawaditila hiho waloli wa udesi.

27 "Ila ndangukulonjela hemwe mlingunyhulichiza, muwagane wang'honyo wa hemwe, muwadile ganojile walinguwazudila. 28 Muwatambichize wala walinguwapanjilani, mlande kwa Nguluwi kwa chiwalo cha walinguwaditila gehile. 29 Wone munhu yakutowe izeze limwe mgalamlile na lya keli. Wone munhu yakusukule ikoti mlechele yahole na igwanda. 30 Umhe chila yalingukulanda, wone munhu yahole lufufu lwako uleche kugana yakuhilulile. 31 Muwaditile wanji kota vyomlingugana wawaditile hemwe.

32 "Wone mowagana wala walinguwagana hela, mopata chonolo chachi? Kwa vila wawele na gehile wanguwaganaga wala walinguwagana. 33 Wone mowaditila ganojile wala wawele nguwaditila hemwe ganojile mopata chonolo chachi? Kwa vila wehile wanguditaga hiho. 34 Wone muwaziche kwa wala muwele na makundo na hewo kota wowahilusila, lelo mopata chonolo chachi? Kwa vila wawele na gehile wangwazikaga kwa wawele na gehile leka wahilusilwe hihila. 35 Ila muwagane wang'honyo wa hemwe, muwaditile ganojile, muwaziche kwa hewo ne kitumbila kota mohilusilwa, aho chonolo cha hemwe chowa chikulu, namwe mowa wana wa Yawele Kuchanya Ng'hatu, kwa vila heye kana isungu na wala wohambe walonje malumbo na wehile. 36 Muwe na isungu kota mhaza wa hemwe vyoyawele na isungu.

37 "Mleche kuwatagusa wanji, namwe hamtagusigwa, mleche kuwag'ung'utila wanji namwe hamng'ung'utilwa. Muwalechele wanji namwe molechelwa. 38 Muwape wanhu vinhu, namwe mopegwa. Chipimilo chimemile lukami, chibatililwe mbaka kubohoka. Kwa vila chipimilo chichila chomlinguwapimila wanji ndo Nguluwi kotumiya kwa hemwe."

39 Yesu kawalonjela nhelo ayi, "Ndaze, yohambe yalole komlongoza yohambe yalole miyage? Hebu! Weng'ha weli wogwa kuli ikulubila. 40 Mlanguswa hambe yamsinde mlangusa wa heye, ila yalanguswe goya na kusinda, koweza kuwa kota mlangusa wa heye.

41 "Lekachoni kwanguchona chibadu kuli iziho lya mng'holozo, ne hambe uyone boliti kuli iziho lya hegwe? 42 Koweza ndaze kumlonjela mng'holozo, ‘Mng'holozangu, ndikuse chibadu chiwele kuli iziho lyako,’ kuno hambe uyone boliti iwele kuli iziho lya hegwe? Kwa mdesi hegwe! Tandi use boliti iwele kuli iziho lyako aho koweza kulavya chibadu chiwele kuli iziho lya mng'holozo.

43 "Igodi linojile halilelaga mafuza gehile, ne haduhu igodi lihile lilingulela mafuza ganojile. 44 Chila igodi lyozeleka kwa mafuza gake. Kwa vila wanhu hambe wabawe tini kuli miwa ne zabibu kuli michongoma. 45 Munhu yanojile kangulavya ganojile, gawichigwe mnhumbula mwa heye na munhu yehile kangulavya gehile kulawa mnhumbula ya heye, kwa vila munhu kangulongaga gala gamemile mnhumbula ya heye.

46 "Lekachoni mwangunyhema, ‘Mkulu, Mkulu’ Kuno hambe mdite gondilinguwalonjela? 47 Ndowalajila ndaze vyoyawele munhu yalinguya kwa heni, yahuliche ulonzi wa heni na kweneza. 48 Ayo nakewhana na munhu yazenjile ng'handa, yabawile hanyi ng'hatu ne kuwika msisi kuli italawe. Mazi tendema hogofichile, mazi nagaitowa yila ng'handa ila haitigasiche, kwa vila naizenjigwa goya. 49 Ila yoneche yalinguhulika ulonzi wa heni ne yaleche kuukolela mijito, ayo nakewhana na munhu yazenjile ng'handa hali sangalaza ne msisi. Mazi tendema ga lwanda nagoya, mazi nagaitowa yila ng'handa naigwa na kuwifigwa ng'hatu!"