1 Mnvina ya mibumunda johajiwichigwe usaso, ilinguchemigwa Pasaka, nayali habehi. 2 Watambika wakulu na walangusa wa malajizo ga Musa nawali wopala ndaze vyowomkopola Yesu, ila nawawadumba wanhu.

3 Lelo, Limazoga nalimwinjila Yudasi yalinguchemigwa Isikalioti, yumwe wa wala walanguswa kumi na weli. 4 Yuda nakaluta kwa wakulu wa watambika na wamizi wa Ng'handa ya Nguluwi, nakalonga nawo kuwala vila vyoyombelenhuka Yesu kwa hewo. 5 Nawo nawasangalala na nawalagana kumha sendi. 6 Yudasi nakakunda na kazangupala mhela uwele goya wa kumbelenhuka Yesu kwa hewo, mhela uwele haduhu lung'hongola lwa wanhu.

7 Lelo, zuwa lya mibumunda johajiwichigwe usaso nalifika. Alyo ndo zuwa liwele lyana ing'holo lya mnvina ya Pasaka lyangudumuligwa singo. 8 Ahyo Yesu nakawalajiza Petili na Yohani nakawalonjela, "Mlute mkatugongomanyile mnvina ya Pasaka tulye." 9 Nawo nawamuuza, "Kohi koulingugana tukugongomanyile?"

10 Nakawedichila, "Mhulichize! Lomuwa mluta mjini, moting'hana na mlume yawele yedwichile chiya cha mazi. Mumuwinze mbaka kuli ng'handa hoyokwinjila. 11 Mumlonjele yawele na ng'handa, ‘Mlangusa kanguuza, chakohi chila chihengo cha wajenzi, chiwele heni na walanguswa wa heni todila Pasaka?’ 12 Naye kowalajila chihengo chikulu cha mchanya chiwele chinoligwe goya. Mgongomanye amo." 13 Lelo nawaluta, nawafika chila chinhu kota Yesu vyoyawalonjele, nawagongomanya mnvina ya Pasaka.

14 Mhela loufichile, Yesu nakekalisa kuli chisaga kulya chilyo hamwe na vitumagwa wa heye. 15 Nakawalonjela, "Nangana ng'hatu kulya hamwe na hemwe mnvina ayi ya Pasaka nding'hali kugazigwa! 16 Kwa vila ndanguwalonjela, silya kahi mbaka aho hoikwenela kuli Undewa wa Nguluwi."

17 Hamba nakachihola chizombe cha divai, nakatambichiza, nakalonga, "Mbochele, munwe mweng'ha. 18 Kwa vila ndanguwalonjela, hambe nyinwe kahi divai ya zabibu mbaka Undewa wa Nguluwi houkuya."

19 Hamba kahola ibumunda, nakatambichiza na nakalimogola, nakawapa walanguswa wa heye yolonga, "Alu ndo lukuli lwa heni, loulavigwa kwa chiwalo cha hemwe. Mdite ahi kwa kung'humbuchila heni." 20 Hihyo du lowasindindile kulya, nakachihola chizombe, yolonga, "Chizombe achi ndo ilagano inyale kuli danda ya heni, ilingubohoka kwa chiwalo cha hemwe.

21 "Ila mlole! Yula yombelenhuka ka hamwe na heni hano mchisaga. 22 Ndikomya Mwana wa munhu kanguluta kukopoligwa kota vyoinuwilwe, ila kochona munhu yula yalingumhinduka."

23 Aho nawaluka kiwuza hewo wawo ndo whaani hali hewo yodita mbuli ayo.

24 Nakulawila kitwanza hali walanguswa kuwala whaani hali hewo yalingujesigwa kowa mkulu kusinda wanji. 25 Yesu nakawalonjela, "Wandewa wa wanhu wa isi wanguwalongozaga wanhu kwa lupichi, nawo wanguchemigwa ‘Wawele na isungu kwa wanhu.’ 26 Ila hemwe mleche kiwhana na hewo, ila yula yawele mkulu hali hemwe naimgana yawe mdodo kusinda weng'ha na yalingulongoza naimgana yawe kota chitumagwa. 27 Kwa vila ndo whaani yawele mkulu? Yula yalingikalisa mchisaga na kulya, ama yula yalingumkolela mijito? Ne lunhwinhwi ndo yula yalingikalisa mchisaga na kulya! Ila heni nda hano hali hemwe kota chitumagwa.

28 "Hemwe ndo msigale na heni kuli mhela weng'ha wa kujezigwa kwa heni, 29 kota mhaza wa heni vyoyamhele undewa, hihyo du nani ndowapa hemwe undewa. 30 Molya na kunwa mchisaga cha heni kuli undewa wa heni na kikalisa kuli vigoda vya undewa na kuzitagusa nhanzi kumi na mbili za Isilaeli."

31 Yesu nakalonga, "Simoni, Simoni! Uhulichize! Limazoga lyangugana kuwabeta hemwe kota munhu yobeta uhemba. 32 Ila heni nandanda kwa chiwalo cha hegwe leka makundo ga hegwe galeche kuwa mado. Nagwe hounhyiluchila, uwakangaze nhumbula wang'holozo." 33 Naye Petili nakedichila, "Mkulu, heni nang'hunda kuluta nagwe mchinweng'ho na mbaka kubagama." 34 Yesu nakamwidichila, "Ndangukulonjela hegwe Petili, kung'hali izogolo halineka lehano kombela mala zidatu."

35 Hamba Yesu nakawauza walanguswa wa heye, "Mhela londiwalajize ne mhako wa sendi ne makwamba, nampunguchilwa ne chinhu choneche?" Nawamwidichila, "Hatupunguchilwe na chinhu choneche." 36 Naye nakawalonjela, "Ila sambi yoneche yawele na mhako wa sendi yauhole na yoneche yalihela ipanga, yaguze ikoti lyake leka yagule ipanga. 37 Kwa vila ndanguwalonjela, uno ulonzi wa Maandiko Matakatifu, ‘Nakawichigwa kuli chilundo chimwe na wehile.’ Wangulapigwa wenele. Ena, gandichigwe kuwala heni gangwenela." 38 Walanguswa wa heye nawamlonjela, "Mkulu ulole hano hana mipanga mili." Naye nakawedichila, "Ihega!"

39 Yesu nakoka na kuluta kuli chidunda cha Mizeituni kota vyoyazowele, nawo walanguswa wa heye nawamuwinza. 40 Lowafichile ako nakawalonjela, "Mlande leka mleche kwinjila kuli kujezigwa." 41 Hamba nakawaleka, nakaluta honhu hatali hado ha munhu kutoza iganga, nakafugama, nakalanda 42 nakalonga, "Mhaza wone ulingugana, umbusile chino chizombe achi. Haiwele kota vyondilingugana, ila kota vyoulingugana hegwe gakoleche." 43 Aho mhilisi kulawa kilanga nakamlawila leka kumkangaza nhumbula. 44 Naye loyawele kuli usungu ukulu, nakalanda kwa kikangaza ng'hatu, chituguti cha heye nachiwa kota midovu ja danda, chiwele nachilagala hali misanga.

45 Loyasindile kulanda, nakahiluka kwa walanguswa wa heye, nakawafika wawasile, kwa vila nawali na masinzo. 46 Naye nakawauza, "Lekachoni namuwasa? Mwinuche mlande, mleche kwinjila kuli kujezigwa."

47 Yesu loyawele yolutilila kulonga, chilundo cha wanhu chilongozwe na Yudasi, yumwe wa wala walanguswa kumi na weli, nachuya. Yuda nakaluta kumlamsa Yesu kwa kumnonela. 48 Ila Yesu nakamlonjela, "Yudasi! Ndaze, kwangumbelenhuka Mwana wa munhu kwa kumnonela?" 49 Wala walanguswa wa Yesu lowagawene ago nawalonga, "Mkulu tuwateme kwa mipanga?" 50 Yumwe wa hewo nakamtowa chitumagwa wa mtambika mkulu kwa ipanga nakamtema ikutu lya kudilo. 51 Ila Yesu nakalonga, "Leka! Ihega." Nakalidoliza lila ikutu lya yula munhu, nakawa mkomu.

52 Hamba Yesu nakawalonjela watambika wakulu na wakulu wa wamizi wa ng'handa ya Nguluwi na wasekulu wawele nawoya kumibata, "Ndaze, namuya na mipanga na nyhimbati kumbata heni kota hila nda yalinguboka? 53 Lombele hamwe na hemwe chila zuwa kuli Ng'handa ya Nguluwi hamimbate. Ila awu ndo mhela wa hemwe, ndo mhela wa ulongozi wa jiza."

54 Ahyo nawamibata Yesu, nawamhola na kuluta naye haluga ha mtambika mkulu. Petili nakawinza kwa kutali. 55 Nawabwina chiluli hagati ha lugagala na kikalisa hamwe, naye Petili nayali hamwe na hewo. 56 Chitumagwa yumwe mdala loyamuwene Petili yekalise habehi na chiluli, nakamnugulila meho, nakalonga, "Munhu ayu kahi nayali hamwe na Yesu." 57 Ila Petili nakabela, nakalonga, "Gwa! Mdala, simzelele." 58 Hamba munhu yunji nakamona Petili, nakalonga, "Hegwe ndo yumwe wa hewo." Ila Petili nakedichila, "Mkulu, siwele heni!" 59 Hoikwete saa imwe, munhu yunji nakakangaza kwa kulonga, "Ndangukomya, munhu yuno nayali hamwe na Yesu, kwa vila heye naye ka Mgalilaya." 60 Ila Petili nakalonga, "Mkulu, sivizelele choulingulonga!" Baho du loyawele yang'hali yolonga, izogolo nalika. 61 Yesu nakahinduka na kumlola Petili, naye Petili nakakumbuchila gala goyalonjelwe Yesu, "Lehano kung'hali izogolo halineka, kombela mala zidatu." 62 Petili nakalawa kunze, nakalila kwa masinzo.

63 Wala wanhu lowawele womlolela Yesu, nawamtowa na kumbeza. 64 Nawamuwoha chibende kumeho, nawamuuza, "Ulavye uloli, whaani yakutowile?" 65 Nawo nawalutilila kumliga.

66 Lokubwemwenzuche, chitala cha wasekulu nachikoleka, mina ndo watambika wakulu na walangusa wa malajizo, naweting'hana hamwe. Yesu nakegaligwa hali chitala acho. 67 Nawo nawamlonjela, "Utulonjele! Ndaze, hegwe ndo Kilistu?" Ila Yesu nakawalonjela, "Wone ndikulonjeleni hamkunda 68 na wone ndowauza, hamkwidichila. 69 Ila kulawa sambi, Mwana wa munhu kochikala ubanzi wa kudilo wa Nguluwi Yawele na Mong'ho."

70 Aho weng'ha nawamuuza, "Lelo hegwe ndo Mwana wa Nguluwi?" Naye nakawedichila, "Hemwe ndo mwangulonga kota heni nda mwana wa Nguluwi." 71 Nawo nawalonga, "Ndaze, twangugana ulolezi wunji? Natuhulika yolonga kwa mlomo wa heye yuye."